Jesu naasongana na Marta na Maria phedo no Bhetania, vanoenda vese ku guva ra Razaro. Guva rakona ndho bambha rakafungwa ngo buwe. Jesu anoti: “Bvisanyi buwe!” Marta anokaya-kaya ngokuti aazwisisi zvinoda kuitwa ndi Jesu. Iyena anoti: “Tenji, wonuha wari, ngo kuti zuva iri ra rocirongomuna.” Asi Jesu anomubvunja kudari: ‘Andizivi kukubvunja kuti ukatenda unozovona goja ra Mwari?’—Johani 11:39, 40.

Buwe riya rinobviswa. Perepo Jesu anosota mugore, wokumbira aciti: “Baba, ndinomubonga ngokuti makandipurukira. Inini ndaizviziva kuti munondipurukira mazuva ese, kaveta ndazvinanga ngo njiyo yo vandhu vari pano, kuti vatende kuti makandituma ndimwi.” Kuita mukumbiro ka Jesu pano vandhu vakawanda kunokhombija varipo waro kuti zvaanodari kuita, anozviita ngo  simba rinobva ka Mwari. Perepo anomimira ngo izwi guru, eciti: “Lázaro, budai kunja!” Zve Razaro anobuda wakapombehwa nguvo mu nyara no mu murenje zve wakafukijwa mu meso ngo nguvo imweni. Jesu anoti: “Musunungurenyi, mumuregere apinde.”—Johani 11:41-44.

VaJudha vazinji vakaviya weya koembejera Maria na Marta povanovona mushamaiso uu, vanodira gonda kuna Jesu. Asi vamweni vanopinda zve vanobvunja vaFarisi zvaitwa ndi Jesu. VaFarisi no vapiri vakuru vanoita musongano no banje guru ro ciJudha, rinozwi Sinedriyo. Mukhumbi uu unobatanijavo mupiri mukuru anozwi Kaifasi. Vamweni vavo vanocumba vaciti: “Tinoitenyi? Ngokuti mundhu uu anoita muxamaiso muzinji. Tikamuregera kudaro, vese vanozomutenda, vaRoma vanozoza, vozophwanya ndau yakacena no nyika yedu.” (Johani 11:47, 48) Ivona vakaita ngo kuzwa ngo vandhu vakavona Jesu eciita “muxamaiso muzinji.” Asi vaFarisi no vapiri vakuru ava, avarambi kuti ndi Mwari ari kumushandisa pa kuita zviro zvakadaro. Ivona vanokaya-kaya maningi ngo cigaro cavo no utongi hwovanahwo.

Kumuswa ka Razaro i kunyiswa kukuru kuna vaSadhuki, vacikatendi weya kuti rumuko huriyo. Kaifasi no muSadhuki umweni, vanoti: “Imwimwi amuzivi ciro! Amuvoni kuti bziri nane kotiri kuti mundhu umwe afire nyika yese, kuciripi kuti vandhu vese vapere?”—Johani 11:49, 50; Maitiro o Vapostori 5:17; 23:8.

Zvecivoneka kuti Kaifasi i mupiri mukuru, ndi Mwari wamuita kuti anange zviro izvi—kuciripi kuti wazvinanga ega “pacake.” Kaifasi ari kunanga kuti Jesu anodikana kuurawa kuitira kuti zvigaro no utongi hwo vatungamiriri vo zviara zvo ciJudha, zvitame kuva pa ngozi. Ngokudaro, uphorofita hwa Kaifasi hunokhombija kuti Jesu anozonasirira muripo ngo kufa kwake. Muripo uu aazounasiriri kuitira vaJudha, asi kuitira vana vese va “Mwari vainga vakaparajika.”—Johani 11:51, 52.

Kaifasi anobudirira pa kuita kuti banje ro Sinedriyo rironge kuuraya Jesu. Kureva kuti Nikodhemo, umwe wo vari mu Sinedriyo anozwiranaya na Jesu, anomusumurira zvarongwari here? Azvinenyi kuti anomubvunja kana kuti haiwa, Jesu anobuda ngo kukasika mu ndharaundha yo Jerusarema kuitira kuti acadourawa icito yakwana nguva yakagajwa ndi Mwari.