Yesu amanle okumana ni Marta voocharela ni Mariya waacamela o Petaniya, awo annaya o nihiye ovithiwewo Lasaro. Nikhuku nciyeliwe ni nluku. Yesu onnalamulela: “Vìhanvo nluku.” Marta onnooniherya wuukhuwa, ahiiwexexaka echu Yesu onachuneiye opaka. Owo onnaloca: “Pwiya, onnankha, ntakhara àvira mahiku masese ninvinthahu.” Nyenya Yesu onnamuleela: “Nkolenle wi wemereryà, onamona ovuwa wa Muluku?”—Yohani 11:39, 40.

Mwawiihiiha nluku ninnaviihiwavo. Voocharela Yesu onnaweha osulu nave onnavekela: “Tithi, kinnothamala wona wi wòkìwa. Miyo kòsuwela phama wi onnakìwa, nto kilontxe ela wa  nthowa na atxhu ala ari vava wi yemererye vawi ti weyano okirumme.” Nivekelo na vanlakani na Yesu ninnooniherya wa achu wi yeeyo owo onayeiye opaka tinthowa na owerya onarweela wa Muluku. Voocharela Yesu onnakhuwela ni masu oovuwa ariki: “Lázaro, khumelá vate!” Nave Lasaro onnakhumela vaate, ni mata ni inaani sawe nlelo simakiwe ni ikuwo aavithiweiyeno nave ethoi awe ekhuneeliwe ni ekuwo. Yesu onnaloca: “Mmutaphule ni mmuhiye aroweke.”—Yohani 11:41-44.

Ayuta ancipale arwiile omuhakararya Mariya ni Marta annoona yootikhiniha yeela nave annamweemererya Yesu. Nyenya akina annarowa nave annaaleela Afarisi yeeyo Yesu opankeiye. Afarisi ni asitokweene a mukucho annathukumana mu nipuro noothoriha na Ayuta, o Sineetriyu. Mu nikhuuru nenlo ookhalavo mutokweene a mukucho Kaifa. Akina a yaawo anniikhupanyerya: “Nereni? Mulopwana ola onnera ineneryo sintxipale. Hiyo namuhiyà hiha, atxhu othene anammwemererya yowo, nave Aroma anamurwa emwarye empa ya Muluku ni nloko nahu.” (Yohani 11:47, 48) Naamwi ekhanlevo anamoona wi Yesu “onnera ineneryo sintxipale,” alopwana ala hahakalanle ni yeeyo Muluku onapakeiye moorweela wa yoowo. Echu etokotoko enaweeriha okhala awuukhuwa ori murici aya ni olamulelo.

Osuwela wi Lasaro ooviihiwa mookhwani chiryene yohaapwatiha Asatuki, yaawo ahineemererya ovinya mookhwani. Kaifa, Musatuki, vano onnaloca ni masu oovuwa ariki: “Nyuwo himunasuwela etxhu. Himunupuwela wi eri etxhu yaphama okhwa mutxhu mmoharu wa nthowa na nloko, ohiya okhwa nloko nothene?”—Yohani 11:49, 50; Saweriwa T’arummwa 5:17; 23:8.

Mwawiiwanana ni ekupweete yaweela ya Kaifa, Muluku onnamweeriha oloca masu yaala—owo “halotxa yela ni ikuru sawe.” Kaifa aalonce wi Yesu onaphwanela wiiphiwa wi olamulelo awe ohipwate nave ahaavolowele ahooleli Ayuta. Naamwi hiiha, yooloherya ya Kaifa yaathoonya wi moorweela wa okhwa wawe, Yesu aahaala ovahererya woopola, ohiya pahiru wa Ayuta, nyenya wa “anamwane othene a Muluku amwalamwanle.”—Yohani 11:51, 52.

Kaifa onnakhumelela phaama mu waavolowela achu yaathukumanne mu Sineetriyu wi epake marehereryo a omwiipha Yesu. Apwanne Nikotemu, mutokweene mmoha o Sineetriyu, yoowo orino onthamwene ni Yesu, onnamuleela sa marehereryo yaala? Moohipwacha yaweereya ene, Yesu mwawaakuveya onnakhuma o Yerusalemu, asepaka okhwa ehaakumve elukuluku Muluku olakelenleiye.