Ua uma nei ona feiloaʻi Iesu iā Mareta ma Maria e lata i Petania, ona latou ō atu lea i le tuugamau o Lasalo, o se ana o loo taatia ai se maa e pupuni ai. Ua fetalai atu Iesu: “Ia aveese le maa.” Ae ua popole Mareta, ona e lē o malamalama i le mea o loo fai atu ai Iesu. Ua tali mai o ia: “Le Alii e, ua tatau ona manogi lona tino, auā o lona fā lenei o aso.” Peitaʻi ua fetalai atu Iesu: “Po ou te leʻi fai atu ea iā te oe, afai e te talitonu, e te vaai i le mamalu o le Atua?”—Ioane 11:39, 40.

Ua aveese nei le maa, ona tepa aʻe lea o fofoga o Iesu i le lagi ma tatalo leotele: “Loʻu Tamā e, ou te faafetai atu iā te oe ona ua e faafofoga mai iā te aʻu. E moni ua ou iloa, e te faafofoga mai pea iā te aʻu. Ae ona o le motu o tagata o loo tutū mai, ua ou tautala atu ai ina ia latou talitonu ua e auina mai aʻu.” Ua faia e Iesu lenei tatalo i luma o le lautele, ina ia latou iloa ai e mafai ona ia faia lenei vavega ona o le mana mai i le Atua. O lea, ua alaga atu ai ma le leotele Iesu: “Lasalo e, inā sau ia i fafo!” Ona sau ai lea i fafo o Lasalo, o loo fusi ona vae ma ona lima i ʻie ma o loo fusi foʻi ona foliga i se ʻie. Ua fetalai atu Iesu: “Ia tatala o ia ma tuu atu e alu.”—Ioane 11:41-44.

Ua vāai le toʻatele o tagata Iutaia o ē na ō mai e faamāfanafana iā Maria ma Mareta i lenei vavega, ma ua latou faatuatua ai iā Iesu. Peitaʻi, ua ō nisi ma taʻu atu i le ʻau Faresaio lenei vavega. Ona faapotopoto faatasi lea e le ʻaufaitaulaga sili ma le ʻau Faresaio o le Saniterini (o le Faamasinoga Sili faa-Iutaia) ina ia faia se fono. E aofia ai foʻi i le Saniterini le ositaulaga sili o Kaiafa. Ua faitio nisi o i latou e faapea: “O le ā sa tatou mea a fai, auā ua faia e lenei tagata le tele o faailoga? Afai tatou te tuu ai pea o ia, o le a faatuatua tagata uma iā te ia, ona ō mai lea o tagata Roma ma aveese o tatou fale ma lo tatou nuu.” (Ioane 11:47, 48) E ui lava ua faalogo nei tane i faamatalaga a i latou ua vāaitino o faia e Iesu “le tele o faailoga,” ae e latou te lē o fiafia i galuega ua faia e le Atua e ala mai iā Iesu. E pau lava le mea o loo latou popole ai, o o latou tulaga aloaʻia ma le pule ua iā i latou.

O se matuā toʻilalopopo lava mo le ʻau Satukaio o ē e lē talitonu i le toetū, le toe faatūina mai o Lasalo mai i le oti. Ua faapea atu Kaiafa o se Satukaio: “Tou te lē iloa lava se mea, ma tou te lē o manatu foʻi e faapea, e mo lo outou lava lelei le oti o le tagata e toʻatasi mo le nuu, ae ia lē faaumatia le nuu atoa.”—Ioane 11:49, 50; Galuega 5:17; 23:8.

ʻE lē o Kaiafa’ le pogai o nei upu. Ae ona o lona tofiga paia, ua uunaʻia ai o ia e le Atua e faia lenā faamatalaga. O le uiga o le faamatalaga a Kaiafa, e tatau ona fasiotia Iesu ina ia taofia ai o ia mai i le atili ona taʻufaatauvaaina o le pule ma taaʻiga a taʻitaʻi lotu Iutaia. E ui i lea, e faasino atu le valoaga a Kaiafa i le mea moni e faapea e ala i le maliu o Iesu, ua ia saunia ai se togiola e lē mo na o tagata Iutaia, ae mo “le fanau [uma] a le Atua o loo taape solo.”—Ioane 11:51, 52.

Ua taulau Kaiafa e taaʻina le Saniterini e faia fuafuaga ina ia fasioti Iesu. Po o le a faailoa atu e Nikotemo o se tasi o le ʻau Saniterini e fiafia iā Iesu, nei fuafuaga iā te ia? Po o le ā lava le tulaga, ae ua vave ona tuua e Iesu Ierusalema ma ʻalofia ai le fasiotia o ia a o leʻi oo i le taimi atofaina a le Atua.