Asu na bôte ya Sanhédrin be bo teke nye wôé, Yésus a ke Éphraïm, tison é ne nord-est ya Jérusalem. A tabe vôm ate a beyé’é bé, ôyab a besiñe bé. (Jean 11:54) Ve da, Pâque ya mbu 33 É.J. a nto bebé, ajô te Yésus a mbeme beta taté a dulu. A ke dulu mfa’a ya nord, a tyi’ilan Samarie a Galilée, a su’ulane ke jome vôm ate ôsusua na a wu.

Atata’a ya dulu ete, nté Yésus a ke a ke male mal, a tôbane minzezam awôm. E mefatan mevo’o ya ôkon ôte, bibu’a biziñe ya nyule môt bi ne taté na bia sibi ôtete’e ôtetek, ane anyui ya mebo, a melo. (Nlañane Bôt 12:10-12) Atiñe Zambe da jô na môt a kone zam, a yiane yôtan a jô’ô na: “Te mfuban, te mfuban.” A yiane fe nyiñ étam.​—Lévitique 13:45, 46.

Ajô te, minzezam mite mi ne ôyap a Yésus. Ve ja’a nalé mia yôtan a ngul ése mi jô’ô na: “A Tat, Yésus, ko bia éngôngo.” Éyoñe Yésus a yene be, nde a jô be na: “Kele’ litane beprêtre menyôle menan.” (Luc 17:13, 14) A liti fo’o na a semé Atiñe Zambe, nde da jô na prêtre nnye a yiane kate na minzezam mi maneya bo mvo’é. Fo’o ve a zen éte nje ba ye kui na be beta ke nyiñe zañe bôte bevok.​—Lévitique 13:9-17.

Minzezam awôm mite mia buni ngule Yésus a bili na a bo mesimba. Ba ke yene beprêtre ôsusua na ba bo mvo’é. Nté be ne zen, ba bi ma’an amu mbunan be bili e be Yésus. Ba taté na ba yen, a wô’ôtane na be nto mvo’é!

Minzezam ébu mi ntoo fuban a mia bulan. Ve wua ô nji bo nsamba a be. Môt ate, a ne mone Samaritain, a bulane ke jeñe Yésus. Amu jé? Môt ate a ne angôndô ya mevak, amu jame Yésus a te bo. Môt a nga too nzezam, “a bete tyiñe yôp a kañe Zambe,” amu a yemelane na Zambe nye fo’o a te bo na a bo mvo’é. (Luc 17:15) Éyoñ a yene Yésus, a ku mebo mé si, a ve nye akéva.

Yésus a jô bôte be ne nye fefele na: “Ke be nga bo mvo’é awôm? Ba bevo’ ébu be ne vé? Ye be nji bulan a zu ve Zambe duma, ve nyô a ne môte ya ayoñ afe?” Nde Yésus a jô Samaritain te na: “Kô’ôlô si, ô ke: mbunane wôé ô boya wo mvo’é.”​—Luc 17:17-19.

Éyoñ a saé minzezam awôm, Yésus a liti na Yéhôva Zambe nnye a su’u nye. Môte wua ya minzezam mite awôm ô nji bi ve mvo’é ya minsôn, ve a ne ngule ya bo e zene ya ényiñ. Den Zambe a nji beta belane Yésus asu na a bo avale mesimba ete. Ve da, nge bia liti na bi bili mbunan e be Yésus, bi ne top na bia wulu zen y’ényiñ, e ji ya nnôm éto. Ye bia ye fo’o liti na bia ve akéva ane mone Samaritain?