E gole ina korolevu o Ifireimi ena vuaicake kei Jerusalemi o Jisu, mani seva kina nodra sasaga na Sanadrini mera vakamatei koya. Ena nona tiko voli e kea kei ratou na tisaipeli, e yawaki ira kina na kena meca. (Joni 11:54) Ia sa voleka na Lakosivia ni 33 G.V., sa na toso tale kina na ilakolako i Jisu ina vualiku. Ena takosovi Samaria me gole sara i Kalili. Qo na iotioti ni gauna ena butuka kina na vanua qo ni bera nona mate.

Ni curuma tiko o Jisu na veikoro ena ilakolako qo, e sotava sara e tini na tagane vukavuka. Na mate qo e rawa ni kania vakamalua na viciko, me vaka na iqaqalo ni liga, iqaqalo ni yava se daliga. (Tiko Voli Mai na Lekutu 12:10-12) Era vakaroti ena Lawa ni Kalou na vukavuka mera kacivaka “Dukadukali, dukadukali!,” mera tiko tale ga vagalala.​—Vunau ni Soro 13:45, 46.

Eratou mani sega ni volekati Jisu yani na le tini na vukavuka. Eratou kaci ga vakadomoilevu: “Jisu, Qasenivuli, ni lomani keitou!” Ni raici ratou na vukavuka o Jisu, e kaya: “Dou lai vakaraitaki kemudou vei ira na bete.” (Luke 17:13, 14) E vakaraitaka e keri o Jisu na nona doka na Lawa ni Kalou, ni nodra itavi na bete mera vakarogoya ni sa vakabulai na vukavuka mai na kena mate. Oti era sa qai rawa ni maliwai ira tale na lewenivanua.​—Vunau ni Soro 13:9-17.

Eratou vakabauta na tini na vukavuka ni rawa ni veivakabulai vakacakamana o Jisu. Eratou gole sara vei ira na bete, ia e se bera mada ga ni ratou vakabulai. Ni ratou se lako tiko, sa vakalougatataki nodratou vakabauti Jisu. Eratou vakila, eratou raica tale ga ni ratou sa vakabulai!

Eratou gole sara na le ciwa ni ratou vakabulai oti, ia e lesu me lai vaqarai Jisu e dua na kai Samaria. Dua na ka nona vakavinavinakataka na veika sa yaco vua. E “vakacaucautaka na Kalou ena domolevu,” ni kila ni vakabulai koya na Kalou. (Luke 17:15) Ni rau sota kei Jisu, e tekicuva e matana qai vakavinavinaka vua.

E kaya sara o Jisu vei ira na tu e kea: “A sega beka ni vakabulai e le tini? I vei ga o ratou na le ciwa? Na kaitani ga qo e lesu mai me mai vakacaucautaka na Kalou? Sega tale ni dua?” E tukuna o Jisu vua na kai Samaria: “Tucake mo lako, e sa vakabulai iko nomu vakabauta.”​—Luke 17:17-19.

E vakaraitaka o Jisu ena nona vakabulai ratou na tini na vukavuka ni tokoni koya na Kalou. Dua vei ratou na tini e vakabula o Jisu sa rairai muria sara na sala ina bula. Sa sega ni vakayagataki Jisu nikua na Kalou me veivakabulai. Ia e rawa nida muria na sala ina bula tawamudu ke da vakabauti Jisu. Vakacava eda dau vakaraitaka noda vakavinavinaka me vakataki koya na kai Samaria?