Raban Kunsil Orang Judah deka munuh Jesus. Nya alai, iya mupuk ngagai Efraim, iya nya tunga ngagai begian timur laut Jerusalem. Jesus diau ba dia enggau bala murid iya. (John 11:54) Enda lama da agi, orang deka ngintu Pengerami Paska kena taun 33 M. Nya alai, Jesus neruska pejalai iya. Iya mansang ngagai begian utara nengah Samaria datai ke Galili. Nya kali ke penudi iya ngelawa endur nya sebedau iya mati.

Ba pejalai Jesus, iya tama ngagai siti genturung pendiau lalu iya betemu enggau 10 iku lelaki ke sakit lan. Nya sebengkah penyakit kulit ti balat ke makai isi lalu ulih ngujungka orang lenyau sekeda perengka tubuh baka tunjuk jari, tunjuk kaki tauka pending. (Penyampau 12:10-12) Nitihka Adat Petara, orang ke kena penyakit nya patut manjung enggau nyawa ti inggar: “Enda tuchi! Enda tuchi!” Lalu iya patut diau kediri, jauh ari orang bukai.—Adat Lewi 13:45, 46.

Nya alai, sida ke 10 iku nya meda Jesus ari jauh. Sida ngangau enggau nyawa ti inggar: “Jesus, Pengajar, kasih meh ke kami!” Lebuh Jesus meda sida, iya madah ngagai sida: “Mupuk kita lalu betemu enggau bala imam.” (Luke 17:13, 14) Utai ke digaga Jesus nunjukka iya bebasaka Adat Petara. Nitihka Adat Petara, semina bala imam aja ulih meresa orang ke sakit lan kena nentuka orang nya udah gerai tauka enda. Enti sida udah gerai, sida ulih begulai baru enggau orang bukai.—Adat Lewi 13:9-17.

10 iku lelaki ke sakit balat nya pechaya Jesus ulih ngeraika sida. Nya kebuah sida terus mupuk betemu enggau bala imam taja pan sida bedau gerai. Lebuh sida ba rantau jalai, sida pan ngasaika diri udah gerai! Sida diberekat ketegal pengarap sida.

Semilan iku ke udah gerai nya neruska pejalai sida. Tang siku lelaki ari bansa Samaria nikal baru ngiga Jesus. Nama kebuah? Lelaki nya amat beterima kasihka Jesus ke udah ngeraika iya. Lalu iya “ngemuliaka Petara enggau nyawa ti inggar,” laban iya nemu Petara ke ngeraika iya. (Luke 17:15) Lebuh lelaki nya betemu enggau Jesus, iya nyungkurka diri semak kaki Jesus, lalu beterima kasih ke iya.

Jesus bejaku ngagai orang ke ngelingi iya: “Ukai enda 10 iku digeraika? Ni semilan iku da agi deh? Nama kebuah sida enda nikal lalu ngemuliaka Petara? Semina orang ke ari bansa bukai tu ke ngereja nya?” Udah nya, ku Jesus madah ngagai orang Samaria nya: “Angkat, lalu pulai. Pengarap nuan udah ngeraika nuan.”—Luke 17:17-19.

Lebuh Jesus ngeraika 10 iku orang ke sakit kulit nya, iya nunjukka iya disukung Petara Jehovah. Lalu siku ari sida ukai semina digeraika, tang iya ba pejalai nuju ngagai pengidup ti meruan. Tang kemayaharitu, Petara enda agi ngena Jesus ngeraika orang ngena pengawa ajih. Taja pia enti kitai arapka Jesus, kitai bisi peluang bulih pengidup ti meruan belama iya. Baka ke digaga orang Samaria nya, kati kitai nunjukka diri beterima kasih?