ISI NKE 92
Jizọs Gwọrọ Ndị Ekpenta Iri, ma Naanị Otu n’Ime Ha Bịara Kelee Ya
-
JIZỌS AGWỌỌ NDỊ EKPENTA IRI
Jizọs gawara n’otu obodo a na-akpọ Ifrem nke dị nso n’ebe ugwu Jeruselem. Ebe a ọ gawara mere ka nkata ndị Sanhedrin kpara igbu ya kụọ afọ n’ala. Ya na ndị na-eso ụzọ ya nọtụrụ n’Ifrem ka ndị iro ya ghara ịkpara ya aka. (Jọn 11:54) Ma, oge Ememme Ngabiga nke afọ 33 eruwela. N’ihi ya, Jizọs malitere njem ọzọ. O si Sameria banye Galili. Ihe a bụ nke ikpeazụ ọ gara ebe ahụ tupu ya anwụọ.
Ka Jizọs si n’otu obodo nta na-aga n’obodo nta ọzọ, ọ hụrụ ụmụ nwoke iri bụ́ ndị ekpenta. E nwere ụdị ọrịa ekpenta ndị na-eji ntakịrị ntakịrị eribisi ahụ́ onye na-arịa ya, dị ka mkpịsị aka onye ahụ, mkpịsị ụkwụ ya ma ọ bụ ntị ya. (Ọnụ Ọgụgụ 12:10-12) Iwu Chineke kwuru na onye ekpenta ga na-eti mkpu, sị: “Adịghị m ọcha, adịghị m ọcha.” Iwu ahụ kwukwara na ọ ga-ebipụ iche.—Levitikọs 13:45, 46.
Ndị ekpenta iri ahụ mere ihe iwu ahụ kwuru. Ha abịaghị Jizọs nso, kama ha nọ n’ebe dị anya tie mkpu, sị: “Jizọs, Onye Ozizi, meere anyị ebere!” Mgbe Jizọs hụrụ ha, ọ sịrị ha: “Gaanụ gosi ndị nchụàjà onwe unu.” (Luk 17:13, 14) Ihe a Jizọs kwuru gosiri na ọ kwanyeere Iwu Chineke ùgwù n’ihi na Iwu Chineke kwuru na ọ bụrụ na onye ekpenta agbakee, ọ bụ ndị nchụàjà ga-ekwu na ahụ́ adịla ya mma. Malite mgbe ahụ, ya na ndị mmadụ nweziri ike ibikọta.—Levitikọs 13:9-17.
Obi siri ndị ekpenta iri ahụ ike na Jizọs ga-agwọli ha. N’ihi ya, ha gawara ịhụ ndị nchụàjà n’agbanyeghị na ha agbakebeghị. Mgbe ha ka nọ n’ụzọ, ha chọpụtara na ahụ́ adịla ha mma. Ọ bụ maka na ha nwere okwukwe na Jizọs mere ahụ́ ji dị ha mma.
Otu onye Sameria nke so ná ndị ekpenta iri ahụ a gwọrọ laghachiri ka ọ hụ Jizọs. Ma, mmadụ itoolu ndị ọzọ alaghachighị. Gịnị mere nwoke Sameria ahụ ji gawa ịhụ Jizọs? Ọ chọrọ ikele ya maka ihe o meere ya. O ji “oké olu na-enye Chineke otuto” n’ihi na ọ ghọtara na ọ bụ Chineke mere ka a gwọọ ya. (Luk 17:15) Mgbe ọ hụrụ Jizọs, ọ dara n’ụkwụ ya, na-ekele ya.
Jizọs gwara ndị nọ ebe ahụ, sị: “Ọ́ bụghị mmadụ iri ka e mere ka ha dị ọcha? Oleekwanụ mmadụ itoolu ndị ọzọ? È nwere onye a hụrụ lọghachitere inye Chineke otuto ma ọ́ bụghị nwoke a bụ onye mba ọzọ?” Ọ gwaziri nwoke Sameria ahụ, sị: “Bilie lawa; okwukwe gị emewo ka ahụ́ dị gị mma.”—Luk 17:17-19.
Ọgwụgwọ Jizọs gwọrọ ndị ekpenta iri ahụ gosiri na Jehova Chineke nọnyeere ya. Ma, uru onye ekpenta nke a lọghachirinụ ritere abụghị naanị na a gwọrọ ya, kama o yikwara ka Jizọs ò nyeere ya aka ịbanye n’ụzọ ga-eduba ya ná ndụ. N’oge anyị a, Chineke ejighị Jizọs na-agwọ ndị mmadụ ọrịa otú o mere n’oge ochie. Ma, ọ bụrụ na anyị e nwee okwukwe na Jizọs, anyị ga-enwe ike inweta ndụ ebighị ebi n’ọdịnihu. Ànyị na-ekele Chineke maka ndụ ebighị ebi ọ ga-enye anyị n’ọdịnihu, otú nwoke Sameria ahụ kelere Jizọs?