Nĩ kana Yesũ aalavany’e mũvango wa Nzama ya Ayuti ya kũmũaa, nĩwaendie ndũanĩ ya Evalaimu. Ndũa ĩsu no ta yaĩ ngalĩko ya ĩũlũ ya Yelusaleme welekele wumĩlonĩ wa syũa. Aendie kwĩkala vau na amanyĩw’a make nĩ kana ethĩwe e vaasa na amaitha make. (Yoana 11:54) Ĩndĩ ĩvinda ya Vasaka ya mwaka wa 33 ĩtina wa Klĩsto nĩyathengeee, na kĩu nĩkyatumie Yesũ athi kyalo kĩngĩ. Aendie na ngalĩko ya ĩũlũ esĩla Samalia ambata Kalilii, na yĩu nĩyo yaĩ ĩvinda yake ya mũthya kũkinya kĩsionĩ kyu atanamba kũkw’a.

Ambĩĩsya kyalo oou nĩwavĩtĩle ndũanĩ mbingĩ, na kavindanĩ kau nĩwakomanie na aũme ĩkũmi maĩ na mangũ. Mĩthemba ĩmwe ya ũwau ũsu nĩtumaa mũndũ atilĩka mamutha o kavola. Kwa ngelekany’o, no atilĩke syaa sya moko, sya maaũ, kana akatilĩka matũ. (Motalo 12:10-12) Mĩao ya Ngai yaĩtye kana mũndũ wĩ na mangũ oona mũndũ aĩlĩte kwasya na wasya mũnene, “Mũvuku, mũvuku”! Na eka ũu, ndaaĩlĩte kũvulana na andũ ala angĩ o na vanini.—Alivai 13:45, 46.

Nũndũ wa kĩtumi kĩu, andũ asu ĩkũmi maĩ na mangũ maũngamie vaasa na Yesũ. Ĩndĩ nĩmaneenie na wasya mũnene masya: “Yesũ, Mũmanyĩsya, twĩw’ĩe tei!” Nake Yesũ amona ameie atĩĩ: “Endai mũkeyonany’e kwa athembi.” (Luka 17:13, 14) Kwoou yĩla weekie ũu, oonanisye kana nũkũnenga ndaĩa Mĩao ya Ngai ĩla yoonanĩtye kana athembi nĩmo maĩlĩte kũtw’a kana mũndũ wĩ na mangũ nĩwavoa vyũ. Ĩtina wa vau, mũndũ ũsu aĩ atonya kũvulana na andũ ala angĩ mate awau.—Alivai 13:9-17.

Andũ asu maĩ na mũĩkĩĩo kana Yesũ nũtonya kũmavosya kwa nzĩa ya kyama. Nũndũ wa ũu, nĩmaendie kwona athembi o na matanamba kũvoa. Me nzĩanĩ, nĩmaathimiwe nũndũ wa mũĩkĩĩo woo. Meewie mavoa, na meesisya meethĩa nĩ w’o nĩmavoa!

Aũme kenda ala mavoiw’e nĩmaendeeie na kyalo kyoo. Ĩndĩ ũmwe waĩ Mũsamalia eewie ataendeea. Avangie kũsyoka akamanthe Yesũ. Amũmanthĩaa kyaũ? Mũndũ ũsu eewie akiitwa ngoo mũno nĩ ũndũ ũla Yesũ wamwĩkie. Na nũndũ wa ũu, nĩwaendie “aimũkumya Ngai na wasya mũnene” nũndũ nĩwamanyie vyũ kana Ngai nĩwe watuma avoa. (Luka 17:15) Yĩla wakomanie na Yesũ nĩwavalũkile mbee wake na amũtũngĩa mũvea.

Yesũ eeie ala maĩ vau vakuvĩ ũũ: “Onthe me ĩkũmi nĩmathew’a, kana ti w’o? Yu ĩndĩ ala angĩ kenda me va? Vaiĩ ũngĩ ũnasyoka amũtaĩe Ngai eka mũndũ ũũ wa mbaĩ ĩngĩ?” Na ĩndĩ Yesũ eea Mũsamalia ũsu atĩĩ: “Ũkĩla na ũithi; mũĩkĩĩo waku nĩwakũvosya.”—Luka 17:17-19.

Yĩla Yesũ wavoisye andũ asu ĩkũmi, nĩwoonanisye kana Yeova Ngai nũmũkwete mbau. O vamwe na kũvow’a, ũla mũndũ wasyokie kũtũnga mũvea nũtonya kwĩthĩwa akwatie nzĩa ya thayũ. Ũmũnthĩ Ngai ndatũmĩaa Yesũ kwĩka syama sya kũvosya ũndũ weekaa ĩvinda yĩu. Ĩndĩ twamũĩkĩĩa Yesũ, no tũkwate nzĩa ya thayũ, naw’o nĩ thayũ wa tene na tene. Ĩndĩ ithyĩ nĩtwonanasya kana nĩtũũtũnga mũvea o tondũ Mũsamalia ũsu weekie?