Muna fungisa makani ma Mbazi a Nkanu bazolele kumvonda, Yesu wele kwandi kuna mbanza Eferaime, kuna node ya Yerusaleme. Kuna kanangini ye alongoki andi, otinini mbeni zandi. (Yoane 11:54) Kansi e Nduta ya mvu wa 33 ifinamene, o Yesu ke kolo ko yaluka diaka keyaluka. Yesu oyalukidi, wele kuna node ya Samaria yakuna Ngalili, owau i nkumbu a nsuka kele mu zunga yayi vitila lufwa lwandi.

Vava bekwendanga yo viokela muna mavata, Yesu owananene ye akwa wazi kumi. Kibemvo kiaki kiambi yikwa ya nitu kizatunanga, nze nlembo mia moko yo matu. (Ntalu 12:10-12) Muna Nsiku a Nzambi, diasikidiswa vo, o nkwa wazi kafwete kazanga vo, “Wafunzuka, wafunzuka!” ye va fulu kia yandi mosi kaka kafwete kala.—Fuka 13:45, 46.

Dianu vo, akwa wazi kumi ke bafinamene Yesu ko. Bakazidi kaka kuna vala, oku vo: “E Yesu, e Nlongi, utufwil’e nkenda!” O Yesu vava kabamwene, ubavovese vo: “Nwenda kuyisonga kwa anganga.” (Luka 17:13, 14) Yesu ozitisi Nsiku a Nzambi uvananga o nswa kwa anganga mu vova diambu kwa akwa wazi kimana bawukwa mu kimbevo kiau. Avo bawukilu, bavutukanga kala vamosi yo wantu bena yo vimpi wambote.—Fuka 13:9-17.

Akwa wazi kumi vuvu bena kiau vo Yesu una yo nkuma wavanga masivi. Bele kukisonga kwa anganga, vitila bawukwa. Wau bekwendanga, o lukwikilu lwau muna Yesu lubatwasidi nsambu. Bayantikidi mona vo e nitu zau zivutukidi o vimpi wambote!

Evua muna yau, bele kwau muna nzo zau. Kansi o mosi osidi. Muntu ndioyo, musi Samaria, ovutukidi wele vavi Yesu. Ekuma? Ozolele vutula matondo kwa Yesu muna diambu divangamene muna nitu andi. O muntu ndioyo wau kasasukidi, “okembele Nzambi muna nding’angolo,” obakwidi wo vo Nzambi unsaswidi. (Luka 17:15) Vava kalueke kwa Yesu, ofukamene vana ntwala, ovutwidi matondo.

Yesu ovovese ana bakala vana ndambu vo: “Nga ke kumi ko diveleleso e? Ozevo, evua akweyi bena? Ke mosi ko ovutukidi kakembela Nzambi, ndioyo kaka mwisi kanda diankaka?” I bosi, Yesu ovovese musi Samaria vo: “Telama, wenda kwaku; lukwikilu lwaku lusaswidi.”—Luka 17:17-19.

Wau kawukidi akwa wazi kumi, Yesu osongele vo lusadisu lwa Yave wa Nzambi kena lwau. O muntu ndioyo owukilu kwa Yesu, nanga osolwele e nzila a moyo. Omu lumbu yeto, Nzambi ke sadilanga diaka Yesu ko muna wuka wantu. Kansi avo tukwikidi muna Yesu tulenda vua moyo a mvu ya mvu. Nga tuvutulanga matondo nze una kavanga o musi Samaria?