Yesu pa kuyuka nkuku ya Sanedini ya kumwipaya, waenda ku kibundi kya Efelaimi, kidi dya pa bukata bwa kungala ne kutunduka kwa Yelusalema. Washikata’ko na bandi bana ba bwanga, kulampe na balwana nandi. (Yoano 11:54) Ino kitatyi kya Pashika ya mu 33 Yesu ke mwiye kibafwena, o mwanda Yesu kaeteakanya kwenda monka. Waenda dya kutunduka mu dishinda dipityila ku Samadia ne kukanda ku Ngadilea, musunsa wandi wa mfulo kuno’ku kufika’nka ne byasa kufwa.

Yesu kaendele ne kulampe kwine, upita’tu kibundi kimo pa kwenda ku kikwabo, wetana na bana-balume dikumi ba makopo. Makopo i musongo udyanga bityebitye kikoba kya ngitu, kimfwa minwe ne maná, nansha matwi. (Umbadilo 12:10-12) Bijila bya Leza bisoñanya wa makopo kwela lubila amba “Ne wa disubi, ne wa disubi!” mu uno muswelo, ushikatanga kwa bunka.​—Levi 13:45, 46.

Mo monka ne ba makopo dikumi nabo badi kulampe na Yesu. Ino abaela lubila amba: “A Yesu, Mufundiji, witufwile’ko lusa!” Yesu pa kwibamona, webanena’mba: “Endai mukelombole kudi babitobo.” (Luka 17:13, 14) Nanshi Yesu walēmeka Bijila bya Leza, bine bipa babitobo lupusa lwa kutela ba makopo amba abakoma ku misongo yabo. Ebiya babwanye nabya kushikata monka na bantu bonso.​—Levi 13:9-17.

Ba makopo dikumi bakulupile amba Yesu udi na bukomo bwa kulonga bingelengele. Abaenda kukamona babitobo abo papo kebabelukile ne kubeluka. Pobakidi mwishinda abapalwa mpalo mwanda wa lwitabijo lwabo mudi Yesu. Abamone ne kwiivwana’mba abakoma!

Ba makopo kitema batōkejibwa’ba abo abaenda lonso. Ino umo, aa. Uno muntu mwine Samadia, wajoka kukakimba Yesu. Mwanda waka? Mwanda wa kufwija’ko bininge Yesu pa byaamulongela. Yewa wadi na makopo’wa “katumbija Leza na diwi dikatampe,” mwanda wayuka’mba Leza ye wamubelula. (Luka 17:15) Aye pa kutana Yesu, wapone ku meso andi ne kumufwija’ko.

Yesu wanena boba bamujokolokele amba: “Mwene bonso dikumi abatōkejibwanga? Penepo, le bakwabo kitema badi kwepi le? Le i kutupu mukwabo wajoka kutumbija Leza kutalula’mo uno muntu wa muzo ungi?” Ebiya Yesu wanena mwine Samadia’wa amba: “Imana wende; lwitabijo lobe lubakukomeja.”​—Luka 17:17-19.

Yesu pa kubelula ba makopo dikumi, walombola’mba Yehova Leza udi nandi. Uno umo, mu bano dikumi, wabelulwa na kilongwa kya Yesu ino kadi bimweka bu watwela mu dishinda ditwala ku būmi. Ketudipo mu kitatyi Leza kyaingidija Yesu kubelulañana uno muswelo. Inoko, kupityila ku lwitabijo lwetu mudi Yesu, tubwanya kwikala mu dishinda ditwala ku būmi​—ke būmi bwa nyeke kadi. Le tulombolanga’mba tufwijanga’ko na mwālongēle uno mwine Samadia?