Hakusaka kuhonesa vyuma vajinyine vaka-Sunendeline vyakumujiha, Yesu afumine kuze nakuya kunganda yaEfwalime, kunote yaYelusalema. Atwamine kuze natumbaji twenyi kuchina vaka-kole jenyi. (Yowano 11:54) Oloze lwola lwaPaseka yamu 33 C.E. lwapwile nakupandama kwakamwihi, ngocho Yesu kalinwomu akatuke ungeji. Ahichile jila yakuSamaliya nakukaheta kuNgalileya, kaha ou wapwile hiungeji wamakumishilo kungalila kana shimbu kanda afwenga.

Hakuputuka chaungeji wenyi, omu apwile nakuya kulimbo hilimbo, Yesu awanyine vaka-mbumba likumi. Musongo kanou weji kulingisanga vihanda vyamujimba vyakufwana nge minwe yakumavoko nakumahinji, namatwitwi, vilyenyeke. (Kulava 12:10-12) Jishimbi jaKalunga javulukile nge muka-mbumba atela kutambakana ngwenyi: “Ngunapihi, ngunapihi!” kaha nawa atelele kutwama kwauka wenyi.—VyavaLevi 13:45, 46.

Ngocho, vaze vaka-mbumba likumi kavapandamine kwakamwihi naYesuko. Oloze vatambakanyine ngwavo: “Ove Yesu, ove Muka-kunangula, tuteteleko!” Omu Yesu amwene ava vaka-mbumba, avalwezele ngwenyi: “Yenu mukalisolole kuli vapilishitu.” (Luka 17:13, 14) Hakulinga ngocho, asolwele nge avumbikile Jishimbi jaKalunga jize jetavishile vapilishitu vavilike ngwavo vatu vanatomo kumbumba yavo. Kaha navahasa kutwama cheka navakwavo vavakangule.—VyavaLevi 13:9-17.

Vaze vaka-mbumba likumi vafwelelele mungolo jaYesu jakulinga vyuma vyakukomwesa. Vakatukile nakuya kuli vapilishitu numba tuhu vachipwile kanda vahinduke kumbumba yavo. Omu vapwile nakuya mujila, lufwelelo lwavo muli Yesu lwavanganyalishile. Vaputukile kumona mijimba yavo nakwivwa nge vanahinduka kumbumba yavo.

Kaha vatu 9 vaze vatomesele kumbumba yavo valiyililile kwavo. Oloze umwe kalingile ngochoko. Uze lunga wakaSamaliya akindulukile nakutondatonda Yesu. Mwomwo ika? Mwomwo asakile kusakwilila Yesu havyuma amulingililile. Uze lunga aputukile “kutohwesa Kalunga nalizu lyakukanguka,” mwomwo atachikijile ngwenyi Kalunga ikiye amulingishile vamuhindule kumbumba yenyi. (Luka 17:15) Omu awanyine Yesu, afukamine kumahinji enyi nakumusakwilila.

Yesu ambile kuli vatu vaze vapwile kuli ikiye ngwenyi: “Uno ava vatomesanga kavapwanga 10 koko nyi? Nyi ava 9 vali kulihi? Kumana naveka vauchi vanakinduluka nakumutohwesa Kalunga, shinou lunga wakulifuchi lyeka kaha?” Ngocho Yesu alwezele uze kaSamaliya ngwenyi: “Katuka, liyile tuhu kwove. Lufwelelo lwove lunakuhindula.”—Luka 17:17-19.

Omu Yesu ahindwile vaze vaka-mbumba likumi, asolwele nge Yehova Kalunga apwile nakumukafwa. Oloze umwe hali vaze likumi ahindwile Yesu apwile mujila yakuya kukuyoya. Etu katweshi nakuyoyela mulwola luze Kalunga azachishile Yesu ahindule vatu mujila yakukomwesako. Chipwe ngocho, tunahase kupwa mujila yakuya kukuyoya chahaya myaka yosena nge natufwelela Yesu. Uno tweji kusololanga muchima wakusakwilila nge mwauze lunga wakaSamaliya tahi?