Wi eheereye marehereryo a achu yaathukumanne o Sineetriyu wi emwiiphe Yesu, owo onnaya muceche wo Efarayimu makupa makina oomokoni wo Yerusalemu. Owo onnakhala weiwo vamoha ni amuhuserya awe ocai wa amwiicani awe. (Yohani 11:54) Nyenya, ennaacamela elukuluku ya Paskha a 33 E.K., mwawiihiiha ohilekelen’yevo Yesu onampaka mukwaha wanaawiili. Owo onnavira omoko wo Samariya ophiyerya o Kalileya, ekwaha yookuchula oxekurya nipuro nenla ahakumve okhwa.

Omapacereryo wa mukwaha, vaavaa Yesu onavireiye muceche mmoha ayaaka mukina, onnaaphwanya alopwana khumi yaawo arino mareca. Ereca yoothene ya mukhalelo yoola, vakhaani vakhaani ennananariha makupa a mwiili, ntoko ohikhalano ikatha sa mmatani, sa inaani naari maaru. (Namarepela 12:10-12) Nlamulo na Muluku nnaloca wi muchu a mareca akhuweleke okhwipi “Kòthanyeya! Kòthanyeya!” nave akhaleke mukhateiye.—Onamukutxho 13:45, 46.

Mwawiihiiha, alipa a mareca annakhala ocai wa Yesu. Mweeparipari, awo annakhuwela eriki: “Yesu, muhusiha, nimorele ikharari.” Aawehaka alipa a mareca Yesu onnaalamulela: “Haweni, mwisoneihe wa asitokwene amukutxho.” (Luka 17:13, 14) Owo onnooniherya ncicimiho Nlamulo na Muluku, naweemererya anamukucho olokoha wi alipa a mareca aapenuwa wa ereca aya. Voocharela awo yanawerya okhala wanaawiili variyari va achu.—Onamukutxho 13:9-17.

Alipa a mareca annaroromela ikuru sootikhiniha sa Yesu. Awo annapwaha wi yaaphwanye anamukucho, naamwi ehaakumve openuwa. Vaavaa awo aryaaya mphironi, nroromelo naya mwa Yesu ninnareelihiwa. Awo annapacerya woona ni wuupuwela wi mwiili aya woopenuwa.

Alipa oopenuxiwa mareca athanu naxexe annatitelela weeca mphironi. Nyenya mmoha hooye. Mulopwana ola Musamariya, onnakooka wi amwaavye Yesu. Ntakhara heeni? Owo oosareya ohakalala mwa yeeyo Yesu opankeiye. Mulopwana a mareca ‘onnanvuwiha Muluku alipihaka nsu,’ asuwelaka wi ti Muluku eerinhe wi apenuwe. (Luka 17:15) Vaavaa onamphwanyeiye Yesu, onnuuwela vakhiviru vawe amuthamalelaka.

Yesu onnaloca wa yaale amurukurenrye: “Miyo nkapenunse atxhu khumi? Aruwi akinaku athanu nasese? Honen’ye awerya okòkela mutxhuli wi anvuwihe Muluku omuhiya namarwa ola?” Voocharela Yesu onnaloca wa Musamariya: “Vinyà ni hawé. Nroromelo nà nìhopenusa.”—Luka 17:17-19.

Moorweela wa waapenuxa achu khumi a mareca, Yesu onnooniherya wi ookhalano nikhaviheryo na Yehova Muluku. Vano mmoha wa ale khumi tahi wi pahiru openusiwe moorweela wa meerelo a Yesu, nyenya akhweya ori mu ephiro ya okumi. Hiyaano hannakhala mu elukuluku yeeyo Muluku onamphariheleiye Yesu wi apenuse. Nyenya, moorweela wa okhalano nroromelo mwa Yesu, nnanwerya okhala mu ephiro ya ekumi—ekumi yoohimala. Apwanne ninnooniherya othamalela, ntoko Musamariya enreiye?