Ndali ti so azo ti Sanhédrin aleke ti fâ lo, Jésus ague na gbata ti Éphraïm, mbeni kodro so ayeke nduru na Jérusalem, na mbage ti nord-est. Lo na adisciple ti lo angbâ na ndo ni so, yongoro na awato ti lo (Jean 11:54). Me, ngoi ti matanga ti Pâque ti ngu 33 aga nduru awe, tongaso kete na pekoni, Jésus akiri ahon. Lo gue na mbage ti nord, na hongo na yâ ti Samarie, juska na yâ ti Galilée. Tanga ti tene lo gue na ando ni so kozo na kuâ ti lo la.

Na tongo nda ti tambela ni so, tongana lo yeke hon na yâ ti akete kodro ni so oko na oko, Jésus atingbi na ambeni zo ti buruma bale-oko. Tongana kobela ti buruma aninga na tere ti mbeni zo, tere ti zo ni ayeke te yeke na yeke, na tapande kobela ni ayeke te ali ti maboko ti lo, ali ti gere ti lo nga na amê ti lo (Nombre 12:10-12). Ndia ti Nzapa ahunda ti tene mbeni zo ti buruma adekongo atene: ‘Mbi ga sioni awe, mbi ga sioni awe!’ Na ndo ni, a hunda na lo ti duti yamba na tanga ti azo kue.—Lévitique 13:45, 46.

Ndali ni la, azo ti buruma ni so angbâ yongoro na tere ti Jésus. Ye oko, ala dekongo na kota go atene: “Jésus, Maître, sara nzoni bê na e!” Tongana Jésus abâ ala, lo tene na ala, lo tene: “Ala gue ala fa tere ti ala na aprêtre.” (Luc 17:13, 14). Na tenengo tongaso, Jésus afa so lo bâ Ndia ti Nzapa na nene ni. Ndia ni so afa so a yeke gi aprêtre la apeut ti fa so mbeni zo ti buruma akiri aga nzoni awe. A yeke na pekoni fadeso awe la si zo ni so apeut ti duti na popo ti azo senge.—Lévitique 13:9-17.

Azo ti buruma bale-oko so ahinga so Jésus ayeke na ngangu ti sara amiracle. Ala mû lege ti gue na mbage ti aprêtre, même kozo ti tene ala wara sava. Na ngoi so ala yeke na lege, ala wara futa ti peko ti mabe ti ala so ala yeke na ni na Jésus. Ala komanse ti bâ nga ti hinga so ala wara sava awe!

Gumbaya na popo ti azo ti buruma so, so awara sava awe so, amû ti ala lege ahon. Me, mbeni oko asara ti lo tongaso ape. Koli ni so, so ayeke mbeni zo ti Samarie, akiri na lo yeke gi place so Jésus ayeke dä. Ngbanga ti nyen? Koli ni aye ti kiri merci mingi na Jésus ndali ti ye so alondo ti passé so. Koli ni “ayeke mû gloire na Nzapa na kota go,” ndali ti so lo hinga so a yeke Nzapa la asara si lo wara sava ti tere so (Luc 17:15). Tongana lo wara Jésus, lo tï na sese na devant ti lo, na lo kiri merci na lo.

Jésus atene na azo so ayeke nduru na lo na ndembe ni so, lo tene: “Ala bale-oko la tere ti ala aga nzoni so ape? Ka atanga ni gumbaya ayeke na ndo wa? Mbeni zo oko ti kiri ti mû gloire na Nzapa ayeke dä ape, gi koli so, so ayeke zo ti mbeni mara nde so?” Na pekoni, Jésus atene na koli ti Samarie ni, lo tene: “Londo mo gue; mabe ti mo asava mo awe.”—Luc 17:17-19.

Na savango azo ti buruma bale-oko so, Jésus afa so a yeke Jéhovah Nzapa la amû na lo ngangu ti sara miracle ni so. A yeke gi sava ti tere la koli ti Samarie so awara ape, me lo wara nga lege ti fini. Laso na ngoi ti e, Nzapa ayeke sara kua na Jésus ti sava azo na mara ti fason ni so ape. Me, tongana e yeke na mabe na Jésus, e peut ti wara lege ti fini, so ayeke fini ti lakue lakue. Eskê e nga kue e yeke fa bê ti kiri singila tongana ti so koli ti Samarie so asara lani?