Ke fakamavale a aofaga a te Sanetulini ke tamate a ia, ne faimalaga atu a Iesu ki te fa‵kai o Efalaima, i te feitu ki matū saegala o Ielusalema. Ne nofo atu a ia i konā fakatasi mo ana soko, telā e ‵mao mai i ana fili. (Ioane 11:54) Kae ko pili atu eiloa ki te taimi o te Paseka i te 33 T.A., tela la, ko pili foki o toe fano a Iesu. Ne faimalaga atu ki matū kae ui atu i Samalia i tena auala ki Kalilaia, ko tena toe āsiga ki te koga tenei a koi tuai o mate a ia.

I te kamataga o te malaga tenā, i te taimi ne fanatu a Iesu mai te suā fa‵kai ki te suā fa‵kai, ne fetaui a ia mo tāgata lepela e toko sefulu. A te masaki tenei e mafai o ‵to malielie atu kea‵tea a vaega o te foitino e pelā mo lima, vae, mo taliga. (Numela 12:10-12) Ne fakatonu mai i te Tulafono a te Atua ke kalaga atu se lepela: “Sē ‵mā, Sē ‵mā,” kae e ‵tau o ‵vae keatea a ia mai tino.—Levitiko 13:45, 46.

Ona ko te Tulafono tenā, ne ‵tu ‵mao ei a lepela e toko sefulu mai i a Iesu. Kae ne ‵tagi paka‵laga atu latou: “Iesu, te Faiakoga, alofa mai ki a matou!” I te laveaga ne ia o lepela konā, ne fakatonu atu a Iesu ki a latou: “Olo o fakaasi atu koutou ki faitaulaga.” (Luka 17:13, 14) Ne fakaasi atu ne ia te āva ki te Tulafono a te Atua, telā ne talia ke faka‵pula atu ne faitaulaga me ko ‵lei a lepela kolā ne ma‵saki. Ko mafai ei o toe ‵nofo fakatasi latou mo tino sē ma‵saki.—Levitiko 13:9-17.

Ne tali‵tonu eiloa a lepela e tokosefulu konā ki te malosi fakavavega o Iesu. Ne olo atu latou ki faitaulaga, a koi tuai foki eiloa o ‵lei latou. I te lotou auala, ne taui atu te lotou fakatuanaki ki a Iesu. Ne kamata o matea kae lagona foki ne latou me ko toe foki atu eiloa te ma‵losi o latou!

Ne olo eiloa a lepela e tokoiva kolā ne faka‵māgina. Kae ne seki fai penā a te lepela e tokotasi. A te tagata tenei, se tino Samalia, ne toe foki atu o ‵sala a Iesu. Kaia? Ne lasi tena loto fakafetai ki a Iesu mō mea kolā ne ‵tupu. Ne “tavae atu ki te Atua” a te lepela muamua tenei, ona ko te iloa atu me ne māfua mai i te Atua a te faka‵leiga tenei. (Luka 17:15) I te taimi ne maua ei ne ia a Iesu, ne fakasiga ifo i ana mua, kae fakafetai atu ki a ia.

Ne fai atu a Iesu ki tino i ana tafa: “E a, e se toko sefulu a tino ne faka‵magina? Ko fea la te suā tokoiva? E a, e seai se tino i a latou ne foki mai o ‵viki atu ki te Atua kae na ko te tagata fua tenei mai se isi fenua?” Tenā ne fai atu ei a Iesu ki te tino Samalia: “Tu ki luga kae fano; ko tou fakatuanaki ne ‵lei ei koe.”—Luka 17:17-19.

Mai i te faka‵leiga o lepela e toko sefulu, ne fakaasi atu ei ne Iesu me ne ‵lago atu a Ieova te Atua ki a ia. Nei la, ne seki faka‵lei aka fua se lepela e tokotasi mai i te toko sefulu ona ko mea ne fai ne Iesu kae kāti ko fanatu foki nei a ia i te auala ki te ola. E se ola tatou i se taimi telā e fakaaoga ne te Atua a Iesu ke fai a vaegā faka‵leiga penā. Kae e auala i te fakatuanaki ki a Iesu, e mafai eiloa o olo atu tatou i te auala ki te ola—ko te ola se-gata-mai. E mata, e fakaasi atu ne tatou me e loto fakafetai tatou, e pelā mo te mea ne fai ne te tagata Samalia?