KAPITE 92
Ko Te Tagata Kilia Pe ʼe Tahi ʼAe Neʼe Lotofakafetaʼi
-
ʼE FAKAMALOLO E SESU IA HE ʼU TAGATA KILIA ʼE TOKO HOGOFULU
Neʼe fakatuʼutuʼu e te Sanetualio ke natou matehi ia Sesu, kaʼe neʼe hao ko tana mavae mai te ʼu tafaʼaki ʼo Selusalemi ʼo alu ki Efalaimi. Neʼe nofo ai mo ʼana tisipulo, ʼo mamaʼo mai ʼona fili. (Soane 11:54) Kaʼe kua ovi mai te temi ʼo te Pasikate ʼo te taʼu 33 H.T.S., koia neʼe tonu ki muli age, ke mavae ia Sesu mai ai. Neʼe fakalaka ʼi Samalia ʼo kaku ki Kalilea, pea neʼe ko tana alu fakamuli ʼaia ki ai ʼi muʼa ʼo tona mate.
ʼI te kamata ʼo tanatou faifagona, neʼe alu ia Sesu ki he ʼu kolo kehekehe, pea neʼe felaveʼi mo te ʼu tagata kilia ʼe toko hogofulu. ʼE ʼi ai te faʼahiga kilia ʼe ina fakakaina mamalie te ʼu faʼahi kehekehe ʼo te sino, ohage ko te ʼu kauʼi tuhi, peʼe ko te ʼu kauʼi vaʼe, peʼe ko te ʼu taliga. (Numelo 12:10-12) Neʼe fakamaʼua ʼi te Lao ʼa te ʼAtua ki he tahi ʼe kilia ke kalaga fenei: “Uli! Uli!” pea neʼe tonu ke nofo tokotahi.—Levitiko 13:45, 46.
Koia neʼe tutuʼu mamaʼo mai ia Sesu te ʼu tagata kilia ʼe toko hogofulu. Kaʼe neʼe natou kalaga fenei: “Sesu, ʼAliki, ʼofa mai kia matou!” ʼI tana sio kia natou, neʼe fakatotonu fenei age e Sesu: “Kotou olo ʼo ha ki te ʼu pelepitelo.” (Luka 17:13, 14) Neʼe fakaʼapaʼapa ia Sesu ki te Lao, koteʼuhi ʼi te Lao, neʼe ko te kau pelepitelo ʼae neʼe tonu ke natou fakamoʼoni kua maʼa ia natou ʼae neʼe kilia. Pea neʼe hoki feala ai leva ke natou toe maʼuʼuli mo te hahaʼi.—Levitiko 13:9-17.
Neʼe falala te ʼu tagata kilia ʼaia ʼe toko hogofulu, neʼe feala ke fai e Sesu he milakulo. Koia, logo la neʼe heʼeki fakamalolo natou, kaʼe neʼe natou olo ki te ʼu pelepitelo. Pea ʼi tanatou olo, neʼe fakapale tanatou tui kia Sesu. Neʼe natou kamata sisio pea mo logoʼi kua natou malolo!
Ko te toko hiva ʼi te ʼu tagata kilia ʼae neʼe fakamalolo neʼe hoko atu tanatou fagona. Kaʼe gata pe ki te tokotahi, te Samalitana, neʼe toe liliu ʼo kumi ia Sesu. Kotea tona tupuʼaga? Neʼe lotofakafetaʼi ʼaupito te tagata kia Sesu ʼuhi ko te meʼa ʼae neʼe hoko. Ko te tagata kilia neʼe ina “fakakololiaʼi leʼo lahi te ʼAtua,” he neʼe mahino kia ia neʼe ko te ʼAtua ʼae neʼe ina fakamalolo ia ia. (Luka 17:15) ʼI tana maʼu ia Sesu, neʼe tuʼutuli ifo ʼi ʼona muʼa, ʼo fakafetaʼi kia te ia.
Neʼe ui fenei e Sesu ki te hahaʼi ʼae neʼe fakatahi mo ia: “Neʼe mole koa la ko te toko hogofulu ʼae neʼe fakamaʼa? Koia kofea te toko hiva ʼae? ʼE gata pe koa ki te tagata ʼaeni ʼo he tahi age fenua neʼe haʼu ʼo fakakololiaʼi te ʼAtua?” Pea neʼe ui fenei e Sesu ki te Samalitana: “Tuʼu ake la ʼo alu, kua fakamalolo koe e tau tui.”—Luka 17:17-19.
ʼI te fakamalolo e Sesu te ʼu tagata kilia ʼe toko hogofulu, neʼe ina fakaha ai neʼe lagolago ki ai ia Sehova ʼAtua. Kaʼe neʼe ko te tokotahi pe ʼae neʼe fakamoʼoni ki ai, pea ʼe lagi neʼe ʼi te ala ʼae ʼe ina taki ki te maʼuli. ʼI te temi nei, ʼe mole fakaʼaogaʼi e te ʼAtua ia Sesu moʼo fakahoko he ʼu milakulo feia. Kaʼe, ʼaki tatatou tui kia Sesu, ʼe tou ʼi te ala ʼae ʼe ina taki ki te maʼuli, te maʼuli heʼe gata. Koia, ʼe tou fakaha koa tatatou lotofakafetaʼi, ohage ko te tagata Samalitana ʼaia?