Yésu a ngi yii i Samaria, i Galiléa. Nano Farisai i yé bat nye mambadga inyu malo ma Ane, ba nhoñol le i ga lo ni ngandak minyiñgha ni liyôgbe. Ndi Yésu a nkal le: “Ane Nyambe i nlo bé i nya i nene i mis ma bôt bobasôna; bôt b’a kal bé to le: ‘Béngnana, yo ini hana!’ tole: ‘Béngnana, yo ii nyoo!’ Inyule nuna-ki! Ane Nyambe i yé ipôla nan.”​—Lukas 17:20, 21.

Bahogi ba nhoñol le Yésu a nkal le Ane i yé ikété miñem mi bagwélél ba Djob. Ndi maliga bé ma, inyule Ane i nla bé ba ikété miñem mi Farisai Yésu a yé pôdôl. Ane i yé ipôla yap ni njel ini le, i nwet ba bi tep inyu ba Kiñe i Ane Djob le Yésu a yé ipôla yap.​—Matéô 21:5.

Bebek i ngéda Farisai i nke, nyen Yésu a nkônde toñle banigil mam mape ma Ane. Kiki Kiñe i Ane, a mbéhe bo ni bini bibuk le: “Dilo di nlo le n’a bana ngôñ i tehe hilo hiada mu dilo di Man mut, ndi n’a tehe bé hio.” (Lukas 17:22) Yésu a yé éba le énél i Man mut kiki Kiñe i ga ba dilo di nlo. Ilole ngéda i i nkola, bahogi mu banigil ba mba ba nyamnda i tehe yo, ndi ba ga hônba letee ngéda Djob a ntéé inyu boñ le Man mut a loo i kola.

Yésu a nke ni bisu i kal le: “Bôt b’a kal bé le: ‘Béñgnana nyoo!’ tole: ‘Béñgnana hana!’ Ni pam bañ, ni noñ bañ to bo. Inyule kiki nwegnwek a nwek ibôdôl i pes ngii yada ikepam ii pes ngii ipe, hala nyen Man mut a’ ba i hilo hié.” (Lukas 17:23, 24) Kii i ga hôla banigil inyu boñ le ba noñ bañ bôt ba nkadba le ba yé mésia? Yésu a nkal le malo ma bañga Mésia ma mba kiki mapubi ma mbai homa nyensôna. Malo mé kiki Kiñe i Ane m’a nene i mis ma bôt bobasôna ibabé le mut nye ki nye a pééna.

Yésu a ngwélél ngim ñañ u bi tagbe inyu éba maselna m’a ba ipôla libak li bôt ha ngéda i, a nkal le: “Ndik kiki mam ma bi tagbe i dilo di Nôa, hala nyen mam m’a ba i dilo di Man mut . . . Nlélém jam ki, ndik kiki mam ma bi tagbe i dilo di Lôt: Ba bé je, ba nyok, ba sombok, ba nuñlak, ba belek, ba oñok. Ndi i kel Lôt a bi nyodi i Sôdôm, nop hié ni solfa a no, a lôlak i ngii, a tjé bobasôna. Hala ki nyen y’a ba i kel Man mut a’ yis bôt njee a yé.”​—Lukas 17:26-30.

Yésu a ta bé kal le bôt ba ngéda Nôa tole i Lôt ba bi tjiba inyule ba bé boñ mam ma hiki kel kiki bo je, nyôba, sômba, bel, ni maoñ. Nôa, Lôt ni mahaa map ba bé boñ mam ma. Ndi bôt bape ba bééna bé ngéda i boñ sômbôl Djob, ba bé nyi bé to imbe ngéda  ba bé niñil. Ndi, Yésu a bi béhe banigil bé le ba yoñ ngéda i boñ sômbôl Djob ni le ba yoñ ngaba keñi i mam ma mbuu. A yé unda bo njel tohi inyu boñ le ba kôhna niñ ngéda Yéhôva a’ lona tjiba.

Banigil ba nlama bé nwas le mam ma nkoñ isi ma yoña bo, hala wee ‘i gwom ba nyék i mbus.’ Yésu a nkal le: “I kel i, i mut a yé i ngii ndap, ndi gwom gwé bi bak ikété ndap, a sôs bañ inyu yoñ gwo; nlélém jam ni mut a yé i wom, a nlama bé témb inyu yoñ gwom a nyék i mbus. Bigdana nwaa Lôt.” (Lukas 17:31, 32) A bi yila jél li bas.

Mu kiki a nke ni bisu i toñol lelaa mam m’a ba ngéda Man mut a’ bôdôl ane kiki Kiñe, Yésu a nkal banigil bé le: “I u u, bôt iba b’a ba i ngii nañi yada; b’a yoñ wada, ba tjôô nuu numpe.” (Lukas 17:34) Jon bahogi ba ga kôs niñ ndi bape ba ga yégle, hala wee ba nimis niñ yap.

Banigil ba mbat nye le: “A Nwet, hee mam mana m’a bôña?” Ni nye a kal bo le: “I homa mim u yé, ha nyen yak minyôgôl nw’a kodba.” (Lukas 17:37) Bape ba ga ba kiki miyôgôl mi mi ntehna haa. Banigil ba ga kodba ipañ bañga Kristô, Man mut. Dilo di nlo, Yésu a ga niiga i bet ba ga hémle maliga ma nkena i niñ.