Jesu gbẹ́ pò to Samalia kavi Galili. Todin, Falesi lẹ kanhose e gando wiwá Ahọluduta lọ tọn go, na yé lẹndọ e na wá to gigo daho mẹ bọ hùnwhẹ na yin bibasi do ota etọn mẹ. Ṣigba, e dọmọ: “Ahọluduta Jiwheyẹwhe tọn ma na wá to aliho he na dọ̀n ayidonugo mẹ; mọdopolọ gbẹtọ lẹ ma to na dọ, ‘Mì pọ́n fi!’ kavi, ‘Dọ́n!’ Na, mì pọ́n! Ahọluduta Jiwheyẹwhe tọn tin to mì ṣẹnṣẹn.”—Luku 17:20, 21.

Mẹdelẹ sọgan wá tadona lọ kọ̀n dọ Jesu to didọ dọ Ahọluduta lọ to gandu to ahun devizọnwatọ Jiwheyẹwhe tọn lẹ tọn mẹ. Amọ́, e họnwun dọ e ma sọgan yinmọ, na Ahọluduta lọ ma tin to ahun Falesi he Jesu to hodọna lẹ tọn mẹ. Ṣogan, e tin to ṣẹnṣẹn yetọn, na Jesu he yin Ahọlu dide Ahọluduta Jiwheyẹwhe tọn to ṣẹnṣẹn yetọn wutu.—Matiu 21:5.

Vlavo to whenue Falesi lẹ ko yì godo, Jesu na devi etọn lẹ nudọnamẹ delẹ dogọ gando wiwá Ahọluduta lọ tọn go. Na nuhe dù tintin tofi etọn to huhlọn Ahọluduta tọn mẹ, e na yé avase jẹnukọn dọmọ: “Azán lẹ ja whenue mìwlẹ na jlo nado mọ dopo to azán Visunnu gbẹtọ tọn lẹ tọn mẹ, ṣigba bọ mì ma na mọ ẹn.” (Luku 17:22) Jesu to didohia dọ gandudu Visunnu gbẹtọ tọn to Ahọluduta lọ mẹ na wá aimẹ to sọgodo. Whẹpo azán enẹ nido pé, devi delẹ sọgan to nukundo e vẹkuvẹku, ṣigba yé dona nọte kakajẹ whenue ojlẹ he Jiwheyẹwhe de na Visunnu gbẹtọ tọn nido wá na sọ̀.

Jesu zindonukọn dọmọ: “Gbẹtọ lẹ nasọ dọna mì dọ, ‘Mì pọ́n dọ́n!’ kavi, ‘Mì pọ́n fi!’ Mì tọ́nyi kavi doafọna yé blo. Na dile abì nọ gbòdlán sọn awà dopo ji to olọn glọ jẹ awà awetọ ji to olọn glọ do, mọ wẹ azán osọhia Visunnu gbẹtọ tọn na te.” (Luku 17:23, 24) Etẹwẹ na gọalọna devi Jesu tọn lẹ ma nado dómọna Mẹsia lalo lẹ? Jesu dọ dọ wiwá Mẹsia nugbo lọ tọn na taidi lehe abì nọ gbòdlán bo nọ yin mimọ to fisusu do. Kunnudenu tintin tofi etọn to huhlọn Ahọluduta tọn mẹ tọn na họnwun hezeheze na ayidonugotọ lẹpo.

Enẹgodo, Jesu donù nujijọ hohowhenu tọn delẹ go nado do lehe gbẹtọ lẹ na yinuwa do to ojlẹ sọgodo tọn enẹ mẹ hia. E dọmọ: “Kẹdẹdile e jọ to azán Noa tọn lẹ gbè do, mọdopolọ wẹ e na te do ga to azán Visunnu gbẹtọ tọn lẹ tọn gbè . . . Mọdopolọ, kẹdẹdile e jọ to azán Lọti tọn lẹ gbè do: Yé to dùdù, yé to nùnù, yé to hihọ̀, yé to sisà, yé to dido, yé to ohọ̀ gbá. Ṣigba, to gbeegbe Lọti tọ́n sọn Sodọmi, jikun miyọ́n po whèmi po tọn ja sọn olọn mẹ bo và yemẹpo sudo. Mọdopolọ wẹ e na te do to azán enẹ gbè whenue Visunnu gbẹtọ tọn na yin hinhẹn sọawuhia.”—Luku 17:26-30.

Jesu ma to didọ dọ gbẹtọ lẹ yin vivasudo to azán Noa po Lọti po tọn lẹ gbè, na yé doafọna nuwiwa jọwamọ tọn lẹ taidi dùdù, nùnù, hihọ̀, sisà, jinukun dido, po họ̀gbigbá po wutu gba. E whè gbau, Noa po Lọti po gọna whẹndo yetọn lẹ doalọ to delẹ to onú ehelẹ mẹ. Ṣigba, omẹ diẹ lẹ to mọwà bo ma na ayidonugo depope ojlo Jiwheyẹwhe  tọn, podọ yé ma doayi ojlẹ he mẹ yé to gbẹnọ te go. Enẹwutu, Jesu to avase na devi etọn lẹ nado na ayidonugo ojlo Jiwheyẹwhe tọn bosọ yí zohunhun do wà ẹ. Gbọnmọ dali, e to didohia yé lehe yé na luntọ́n do—yèdọ nuhe yé na wà nado to gbẹnọ zọnmii—to whenue Jiwheyẹwhe na hẹn vasudo wá to sọgodo.

Devi lẹ ma dona dike nuhe to aihọn he lẹdo yé lọ mẹ lẹ, yèdọ “nuhe to godo lẹ” ni fẹayihasẹna yé. Jesu dọmọ: “To azán enẹ gbè, mì gbọ mẹhe to họta bọ nutindo etọn lẹ tin to họmẹ ni ma jẹte nado wá bẹ yé blo, podọ mọdopolọ mẹhe to glemẹ ni ma lẹkọ do nuhe to godo lẹ kọ̀n blo. Mì flin asi Lọti tọn.” (Luku 17:31, 32) Asi Lọti tọn lẹzun dòtin ojẹ̀ tọn.

Jesu zindonukọn to zẹẹmẹ etọn mẹ gando ninọmẹ he na wá aimẹ to whenue Visunnu gbẹtọ tọn na dugán taidi Ahọlu go, bo dọna devi etọn lẹ dọmọ: “To ozán enẹ mẹ, omẹ awe na tin to adọzan dopo ji; dopo na yin yíyí, ṣigba awetọ na yin jijodai.” (Luku 17:34) Mẹdelẹ na yin whinwhlẹngán, ṣigba mẹdevo lẹ na yin jijodai bo na hẹn ogbẹ̀ yetọn bu.

Devi lẹ kanse dọmọ: “Fie wẹ enẹ na jọ te, Oklunọ?” Jesu gblọn dọmọ: “Fie onú kúkú te, finẹ wẹ akùn lẹ na pli dopọ te ga.” (Luku 17:37) Mọwẹ, mẹdelẹ na mọnú hlan nukọn di akùn. Devi enẹlẹ na pli do Klisti nugbo lọ dè, yèdọ Visunnu gbẹtọ tọn. To ojlẹ sọgodo tọn enẹ mẹ, Jesu na na nugbo gbẹwhlẹngán tọn lọ devi etọn he tindo yise lẹ.