Yesu byo akijinga mu Samaliya nangwa mu Ngalilea, Bafaliseo bamushikishe pa kimye kikeya Bufumu. Baitabijile’mba Bufumu pa kwiya kukekala lusekelo lukatampe. Bino, Yesu wibambijile’mba: “Bufumu bwa Lesa kechi bukeya kya kuba ne bonse saka bebumona ne; kabiji bantu kechi bakamba’mba, ‘Abuno kuno!’ nangwa’mba, ‘Abwa kokwa!’ ne. Mambo Bufumu bwa Lesa buji pakachi kenu.”—Luka 17:20, 21.

Bamo balangulukile’mba Yesu walumbulwilenga’mba Bufumu bulama mu michima ya bakalume ba Lesa. Nangwa byonkabyo, Bufumu bwa Lesa kechi bwajinga mu michima ya Bafaliseo Yesu bo aambilengako ne. Pano bino, bwajinga pakachi kabo mambo Mfumu watongolwa wa mu Bufumu bwa Lesa aye Yesu wajinga pakachi kabo.—Mateo 21:5.

Kyamweka Bafaliseo byo bafuminepo, Yesu wabuujile baana banji ba bwanga bishinka bikwabo pa kwiya kwa Bufumu. Pa mambo a kwikalapo kwanji pa Bufumu wibajimwineko amba: “Moba abena kwiya po mukakebesha kumona juba jimo ja oa moba a Mwana muntu, bino kechi mukejimona ne.” (Luka 17:22) Yesu walumbulwilenga’mba kulama kwa Mwana muntu mu Bufumu kukekala kulutwe. Kino kimye saka kikyangye kwiya, baana ba bwanga bamo bakakebesha bingi kwibumona, bino, bakapembelela kimye kyatongola Lesa kikeshilamo Mwana muntu.

Yesu watwajijile kwamba’mba: “Bantu bakemwambila’mba, ‘Talai awa uji kokwa!’ nangwa’mba, ‘Talai uno uji kuno!’ Kange mukayeko nangwa kwibalondela ne. Byonkatu bibesha mvula mwiulu kuku ne kuku, byo byo kikekala ne pa kwiya kwa Mwana muntu mu juba janji.” (Luka 17:23, 24) Pano baana ba bwanga ba kwa Yesu bafwainwe kuchinuzhuka byepi kulondela bamesiasa ba bubela? Yesu waambile’mba, byonkatu bibesha mvula mwiulu byo byo kikekala ne pa kwiya kwa Mesiasa wa kine. Bantu bonse bakamumona saka aji mu Bufumu bwanji.

Kepo Yesu aambile pa bintu byamwekele kala pa kumwesha byubilo bya bantu byo bikekala mu kimye kya kwikalapo kwanji. Waambile’mba: “Byonkatu byo kyajinga mu moba a kwa Nowa, byo byo kikekala ne pa kwiya kwa Mwana muntu . . . Kabiji byonkatu byo kyajinga ne mu moba a kwa Lota: Bajiilenga, batomenenga, bapotelenga, bapoteshenga, bajiminenga kabiji bashimikilenga. Bino pa juba Lota jo afumine mu Sodoma, mwiulu mwafumine mujilo ne mabwe ateema ne kwibonaunatu bonse shata. Byo byo kikekala ne pa juba Mwana muntu jo akasoloka.”—Luka 17:26-30.

Yesu kechi waambilenga’mba bantu ba mu moba a kwa Nowa ne Lota bebonawine na mambo a kuba bino bintu bijitu bulongo nabiji kuja, kutoma, kupota, kupotolwesha, kujima ne kushimika ne. Mambo nangwatu Nowa, Lota ne bisemi byabo baubilenga bino bintu. Pakuba bakwabo baubilenga bino bintu kwa kubula kutesha muchima kuba kyaswa muchima wa Lesa. Kino kyo kyalengejile Yesu kukambizha baana banji ba bwanga  kwibikako kuba kyaswa muchima wa Lesa ne kwikala bapayankana mu mwingilo wa Lesa. Pa kwamba bino, Yesu wamwesheshenga baana banji ba bwanga jishinda ja kupulukilamo, ko kuba’mba kutwajijila kwikala na bumi kimye Lesa kyo akaleta lonaiko kulutwe.

Baana ba bwanga bafwainwe kuchinuzhuka kulabikwa na bintu bya mu ntanda, ko kuba’mba ‘bintu byo bashile kunyuma.’ Yesu waambile’mba: “Pa joja juba, muntu uji pa musemi uji na bipe byanji mu nzubo kange akekile na kwibisenda ne, kabiji muntu uji mu bujimi kange akabwelele bintu byo asha kunyuma ne. Vulukai muka Lota.” (Luka 17:31, 32) Muka Lota waalukile ke jibwe ja mukele.

Yesu byo atwajijile kulumbulula Mwana muntu byo akalamanga pa Bufumu kulutwe, wabuujile baana banji ba bwanga amba: “Nemwambila namba mu bobwa bufuku, bantu babiji bakalaala pa mwanya umo; umo bakamusenda, bino mukwabo bakamusha.” (Luka 17:34) Onkao mambo, bamo bakekala na bumi bwa myaka, bino bakwabo kechi bakekala na bumi ne.

Baana banji ba bwanga bamushikishe’mba: “Nkambo, nanchi kwepi kukamwekela kino?” Aye wibakumbwile’mba: “Konka kuji mubiji, ne bampungu ko ko bakakonkena.” (Luka 17:37) Kya kine, bamo bakekala nobe bampungu bamwena palepa. Bano baana ba bwanga ba kine bakakonkana ku Mwana muntu, Kilishitu wa kine. Pa kyo kya kimye, Yesu ukafunjisha baana banji ba bwanga bukine bupana bumi.