Samariachö o Galilëachö këkaptinmi, Diospa Gobiernun imë shamunampaq kaqta fariseukunaqa Jesusta tapuyarqan. Pëkunaqa pensayaq, yapë kutimunampaq kaqqa alläpa espantëpaq kanampaq kaqtam. Peru Jesusqa kënömi nirqan: “Diospa Gobiernunqa manam pï mëpa rikëninchötsu shamun; ni manam ‘¡rikäyë, këchömi këkan!’, o, ‘¡washachömi këkan!’ niyanqatsu. Porqui ¡rikäyë!, Diospa Gobiernunqa qamkunawanmi këkan” (Lücas 17:20, 21).

Itsachi Jesus nikanqantaqa, wakinqa entiendiyarqan Diosta sirweqkunapa shonqunkunachö tsë Gobiernu këkanqantanö. Peru Jesusqa fariseukunawanmi parlëkarqan, y pëkunapa shonqunkunachö Diospa Gobiernun mana këkanqanqa clärum rikakïkarqan. Peru pëkunapa chowpinchömi sï këkarqan, porqui tsë Gobiernuchö mandakunampaq Dios akranqan Rey Jesusmi pëkunachö këkarqan (Mateu 21:5).

Tsëpitanam, itsachi fariseukuna ëwakuyanqanchöna, tsë Gobiernu imanö shamunampaq kaqta qateqninkunata Jesus mas entienditsirqan. Puntataqa, Reynöna këkämunqan rikakänampaq parlarmi “chämunqam nunapa Tsurimpa junaqninkunapita juk junaqta rikëta munayanqëki junaqkuna, peru manam rikäyankitsu” nirqan (Lücas 17:22). Tsënö nirqa, nunapa Tsurinqa shamoq tiempuchöraq gobernar qallanampaq kaqtam rikätsikïkarqan. Wakin qateqninkunaqa tsëkuna imë qallanampaq kaqtaqa jinan hörachi musyëta munayarqan, peru Dios dispuninqan hörachö nunapa Tsurin shamunampaq kaqtaqa shuyararninran sïguiyänan karqan.

Tsëpitanam Jesusqa kënö nirqan: “Kënömi niyäshunki: ‘¡Washaman rikäyë!’ o, ‘¡këman rikäyämï!’. Ama yarquyëtsu ni qepankunata ëqiyëtsu. Porqui imanömi usya relampapis ciëlupa juk kuchumpita, ciëlupa juknin kuchunyaq atsikyan, tsënömi nunapa Tsurimpis junaqninchö kanqa” (Lücas 17:23, 24). ¿Imaraq qateqninkunata yanapanqa Diospa Akrashqan tukoqkunata mana qatiyänampaq? Diospa Akrashqan Reynöna këkanqanqa, usya relampa atsikyanqan më tsëpitapis cläru rikakanqannölla chänampaq kaqtam Jesusqa nirqan. Juk parlakïchöqa, llapan mäkoq mäkoq këkaqkunam Jesus gobernëkanqantana cuentata qokïtaqa puëdiyänan karqan.

Tsëpitanam, tsë witsankunachö imanö kayänampaq kaqta rikätsikur kënö nirqan: “Imanömi Noëpa tiempunchö pasakurqan, tsënöllam nunapa Tsurimpa junaqninkunachöpis kanqa [...]. Jina tsënöllam Lotpa tiempunchöpis pasarqan: mikuyaq, upuyaq, rantikuyaq, rantiyaq, muruyaq y wayikunatam sharkatsiyaq. Peru Sodömapita Lot yarqunqan junaqmi, ninawan azufri ciëlupita tamyamurqan, y llapankunatam ushakäratsirqan. Jina tsënöllam pasanqa nunapa Tsurin rikakanqan junaqpis” (Lücas 17:26-30).

 Jesusqa manam Noëpa y Lotpa tiempunchö mikur, upur, rantikur, rantir, murur y wayikunata shäritsir kayanqampita ushakätsishqa kayanqantatsu nikarqan. Porqui Noë, Lot y kastankunaqa tsëkunata rurayaqmi. Peru wakinkunaqa Diospa munëninta y ima tiempuchö kawëkäyanqanta cuentaman mana churashpam tsëkunata rurëkäyarqan. Tsëmi Diospa munënin ima kanqanta y tsëta rurëchö kallpachakuyänampaq qateqninkunata nikarqan. Jesusqa, mana alli nunakuna ushakäyanqan junaqchö salvakuyänampaq imata rurayänampaq kaqtam nikarqan.

Qateqninkunaqa, alläpam cuidakuyänan karqan munduchö cösaskunawan mana nitipakashqa kayänampaq. Tsëmi, “tsë junaq wayi jananchö këkaqqa, ama wayi rurinchö këkaq cösasninkunata ëlloq urätsuntsu, jina tsënölla chakrachö këkaqpis, ama qepachö jaqinqan cösaskunaman kutitsuntsu. Yarpäyë Lotpa warminta ima pasanqanta” nirqan (Lücas 17:31, 32). Musyanqantsiknöpis, pëqa kachi rumimanmi tikrarirqan.

Jina Jesusqa, gobernar qallëkuptin ima pasakunampaq kaqta parlarmi kënö nirqan: “Tsë paqasmi ishkaq nunakuna juk cämallachö këkäyanqa, juk kaqmi apashqa kanqa, peru juknin kaqqa jaqishqam kanqa” (Lücas 17:34). Awmi, wakinmi salvakuyanqa, peru wakinqa jaqishqam kayanqa, juk parlakïchöqa, wanuyanqam.

Tsëta wiyarirnam qateqninkunaqa, “¿mëchötaq tsëqa kanqa, Teytë?” nir tapuyarqan. Jesusnam, “mëchömi aya këkan, tsëmanmi wiskurkunapis ëllukäyanqa” nir contestarqan (Lücas 17:37). Awmi, wakinqa wiskurkunanömi raslla rikäriyanqa. Juk parlakïchöqa, rasumpa Cristu o nunapa Tsurin pï kanqantam cläru musyariyanqa y pë këkanqanman ëwayanqa. Jesusqa tsë witsankunam, salvacionman chätsikoq rasumpa kaq yachatsikïkunata pëkunata yachatsinqa.