Na ngoi so Jésus angbâ encore na Samarie wala na Galilée, aFarizien aga ahunda lo na ndo ti tënë ti gango ti Royaume, so ala pensé atene a yeke ga dandara na a yeke sara matanga ni. Me, Jésus atene: “Royaume ti Nzapa ayeke ga dandara tongaso ape, nga azo ayeke tene ande pëpe: ‘Bâ ndo ge!’ wala: ‘Bâ ndo kâ!’ ndali ti so ala bâ, Royaume ti Nzapa ayeke na popo ti ala.”—Luc 17:20, 21.

Ambeni zo atene so Jésus aye ti fa so Royaume ni ayeke komande gi na yâ ti bê ti awakua ti Nzapa. Me, a peut ti duti tongaso ape ndali ti so Royaume ni ayeke pëpe na yâ ti bê ti aFarizien so Jésus angbâ ti sara tënë ni na ala so. Ye oko, Royaume ni ayeke na popo ti ala ngbanga ti so lo so a soro lo ti duti Gbia ti Royaume ti Nzapa ni, so ti tene Jésus, ayeke ge na popo ti ala na ndembe ni so lani.—Matthieu 21:5.

Peut-être a yeke na peko ti so aFarizien ni ahon awe la si Jésus akiri afa ambeni ye mingi na adisciple ti lo na ndo ti gango ti Royaume ti Nzapa ni. Na ndo ti tënë ti ngoi so lo yeke si na lo yeke duti dä tongana Gbia ni, Jésus agboto mê ti adisciple ti lo kozo, lo tene: “Ambeni lango ayeke ga ande so ala yeke ye ti bâ ngoi so Molenge ti zo ayeke duti dä, même gi lango oko, me ala yeke bâ ni ape.” (Luc 17:22). Jésus afa so komandema ti Molenge ti zo, tongana Gbia ti Royaume ni so, ayeke mbeni ye so ayeke si na yâ ti angoi so ayeke ga. Kozo na ngoi ni so, ambeni disciple ayeke ku ande ngoi ni so kungo. Me, a lingbi ala ngbâ lakue ti ku ngoi ni so, juska ngoi so Nzapa asoro ti tene Molenge ti lo aga alingbi awe si.

Jésus akiri atene: “Azo ayeke tene ande na ala: ‘Ala bâ ndo kâ!’ wala: ‘Ala bâ ndo ge!’ Ala sigi ape nga ala gue na peko ti azo ni ape. Legeoko tongana ti so wâ ti bekpa ayeke za na mbeni mbage ti lê ti nduzu ague asi na mbeni mbage ni, ngoi so Molenge ti zo ayeke dä ande ayeke duti nga tongaso.” (Luc 17:23, 24). Tongana nyen la adisciple ti Jésus ayeke kpe ande ti tene amessie ti wataka ahanda ala? Jésus atene so gango ti tâ Messie ni ayeke duti ande tongana ti so bekpa aza wâ. So ti tene, a yeke gi azo so ahinga ti bâ ndo la apeut ti hinga ande polele ngoi so lo yeke si na lo yeke duti dä tongana Gbia ti Royaume ni.

Na pekoni, ti fa sarango ye ti azo ande na ngoi ni so, Jésus ahaka sarango ye ti azo ni na mbeni ye so asi ândö. Lo tene: “Gi tongana ti so aye asi lani na ngoi ti Noé, a yeke duti ande nga tongaso na ngoi so Molenge ti zo ayeke duti dä. . . . Aye asi nga ândö tongaso na ngoi ti Lot: Lani azo ayeke te, ala yeke nyon, ala yeke vo ye, ala yeke kä ye, ala yeke lu ye nga ala yeke leke ada. Me na lango so Lot asigi na Sodome, wâ na soufre alondo na yayu atï na ndo ti ala tongana ngu-nzapa na afuti ala kue. A yeke duti tongaso nga na lango ni so Molenge ti zo ayeke fa tere ti lo na gigi.”—Luc 17:26-30.

Jésus ayeke tene lani pëpe so a fâ azo ti ngoi ti Noé na ti Lot, ndali ti so ala yeke te kobe, ala yeke nyon sämba, ala yeke vo ye, ala yeke ka ye, ala yeke lu kobe na yaka nga ala yeke leke ada. Noé, Lot nga na afami ti ala ayeke mû nga lani ngoi ti ala ti sara ambeni ye so a londo ti fa ni ge so. Me, atanga ti azo ni lani ayeke sara aye ni so sân ti gi ti hinga ye so bê ti Nzapa aye nga ala girisa même na ndo ti ngoi so ala yeke dä. A yeke ndali ni la Jésus ahunda na adisciple ti lo ti gi ti hinga ye so bê ti Nzapa aye nga ti gi ti sara akua so lo hunda. Tongaso, Jésus ayeke fa na ala ye so a lingbi ala sara ti tene a sö ala, so ti tene lege ti tene ala ngbâ na fini, tongana Nzapa aga ande ti futi dunia so.

A lingbi adisciple ni akpe ti tene aye ti dunia so angoro ala wala “aye so angbâ na peko,” agboto lê ti ala nde. Jésus atene: “Na lango ni so, zia zo so ayeke na li ti da ti lo me so akungba ti lo ayeke na yâ ti da ni adescend pëpe ti mû ni, na zo so ague na yaka, zia lo kiri pëpe ndali ti aye so angbâ na peko. Ala dabe ti ala na wali ti Lot.” (Luc 17:31, 32). Lo ga lani statue ti ingo.

Lakue na ndo ti tënë ti aye so ayeke si ande na ngoi so Molenge ti zo ayeke komande ande tongana Gbia, Jésus atene na adisciple ti lo atene: “Na bï ni so, azo use ayeke na ndo ti gbogbo oko, a yeke mû oko a hon na lo, me a yeke dö oko ni a zia.” (Luc 17:34). Tongaso, ambeni ayeke wara ande salut, me ambeni ayeke girisa ande fini ti ala, ndali ti so ala dö lege ti mabe azia.

Na pekoni, adisciple ni ahunda Jésus atene: “Seigneur, na ndo wa?” Jésus akiri tënë na ala atene: “Ndo so kuâ ayeke dä, a-aigle nga ayeke bungbi tere dä.” (Luc 17:37). Tënë so aye ti fa so, ambeni ayeke duti ande tongana a-aigle so abâ ndo ayo. Adisciple ni so ayeke bungbi ande na tere ti tâ Christ ni, so ti tene Molenge ti zo. Na ngoi ni so, Jésus ayeke mû ande kobe ti yingo na adisciple ti lo so ayeke na mabe.