Akxni Jesús wi kSamaria o kʼGalilea, fariseos kgalhskinkgo tuku kilhtamaku namin Tamapakgsin. Xlakan lakpuwankgo pi lu kaks namalakawaninan chu pi natasiya akxni namin. Pero Jesús kawani: «Wa xTamapakgsin Dios ni katimilh lata tlan naʼakxilhkan; niti katiwa: “¡Kaʼakxilhtit unu!”, o, “¡Amacha!”. Xlakata ¡kaʼakxilhtit!, xTamapakgsin Dios anta wi kmilakgstipankan» (Lucas 17:20, 21).

Max makgapitsin akgatekgskgo pi Tamapakgsin wa tuku kskujnin Dios linkgo kxnakujkan. Pero uma nichuna, xlakata tiku katachuwinama Jesús wa fariseos, chu Tamapakgsin ni wi kxnakujkan. Pero xlakgstipankan wi, xlakata Jesús, tiku laksakkanit Mapakgsina nawan kxTamapakgsin Dios, anta katawi (Mateo 21:5).

Akxni fariseos max ankgonita, Jesús tlakg kalitachuwinan xtamakgalhtawakgen xlakata akxni namin Tamapakgsin. Pulana kalitachuwinan xlakata la Mapakgsina ama litaxtu: «Namin kilhtamaku akxni lu naʼakxilhputunatit akgtum xkilhtamaku xKgawasa chixku, pero ni katiʼakxilhtit» (Lucas 17:22). Uma tachuwin limasiya pi xtamapakgsin xKgawasa chixku aku ama min. Max makgapitsi xtamakgalhtawakgen lu katsiputunkgo tuku kilhtamaku natsuku mapakgsinan, pero xlikgalhkgalhitkan asta akxni nachin kilhtamaku nema Dios laklhkawilinit xlakata namin xKgawasa chixku.

Alistalh, Jesús wampara: «Nakawanikanatit: “¡Kaʼakxilhtit amacha!”, o, “¡Kaʼakxilhtit unu!”. Ni kataxtutit chu ni tokgosun kakastalanitit. Xlakata chuna la makglipni makaxkgakge lakatum kxtampin akgapun asta alakatum kxtampin akgapun, chuna nawan kxkilhtamaku xKgawasa chixku» (Lucas 17:23, 24). ¿Tuku nakamakgtaya xtamakgalhtawakgen xlakata ni nastalanikgo nixaxlikana mesías? Jesús kawani pi akxni nachin Mesías la chatum Mapakgsina, xtachuna nawan la makglipni nema tasiya lata lakgamakgat. Uma wamputun pi putum tiku skgalalh wilakgo tlan na’akxilhkgo tuku litasiya pi Jesús mapakgsinamaja.

Alistalh Jesús wili makgapitsi li’akxilhtit xala makgasa nema limasiya tayat nema nakgalhikgo latamanin: «Chuna la lalh kxkilhtamaku Noé, nachuna nawan kxkilhtamaku xKgawasa chixku [...]. Na xtachuna la lalh kxkilhtamaku Lot: xwayamakgolh, xkgotnamakgolh, xtamawanamakgolh, kstanamakgolh, xchananamakgolh, xtlawamakgolh chiki. Pero kilhtamaku akxni Lot taxtulh kSodoma, taktachi kʼakgapun lhkuyat chu azufre chu putum kamalakgsputulh. Nachuna nawan ama kilhtamaku akxni xKgawasa chixku nakatasiyani latamanin» (Lucas 17:26-30).

Jesús ni wamputun pi kamakgnika latamanin xalak xkilhtamaku Noé chu Lot xlakata xwayankgo, xkgotnankgo, xtamawanankgo, kstanankgo, xchananankgo chu xchikinankgo. Asta Noé, Lot chu xfamiliajkan na tlawakgolh uma. Pero amakgapitsin kajwatiya uma xlilakgaputsakgo chu ni kuenta xtlawakgo xtalakaskin Dios chu tuku kilhtamaku  xlamakgo. Wa xlakata Jesús kawanima xtamakgalhtawakgen pi kakatsikgolh tuku xtalakaskin Jehová chu kaliskujkgolh namakgantaxtikgo. Kawani la tlan nalakgtaxtukgo akxni Dios nakamasputu tiku nitlan likatsikgo.

Xtamakgalhtawakgen Jesús kuenta xlitlawatkan xlakata ni nalitaʼakgskgawikgo tuku anan kkakilhtamaku. Jesús kawani: «Ama kilhtamaku, tiku waka kxʼakgstin chiki, pero tuku kgalhi tanuma kxchik, ni kataktalh xlakata namaxtu; nachuna, tiku lama kxpukuxtu ni kataspitli xlakata naʼan tiya tuku makgxtakgli. Kalakapastaktit xpuskat Lot» (Lucas 17:31, 32). Chuna la katsiyaw, xla matsat wa.

Jesús chuntiya lichuwinan tuku nala akxni namapakgsinan xKgawasa chixku: «Ama katsisni chatiy lataman makgolh nawan kʼakgtum putama; chatum nalinkan, pero achatum naʼakgxtakgmikan» (Lucas 17:34). Wa xlakata, makgapitsi nalakgtaxtukgo pero amakgapitsi nakaʼakgxtakgwilikan, uma wamputun pi nanikgo.

Akxni xtamakgalhtawakgen kgaxmatkgo uma, kgalhskinkgo: «¿Niku Malana?». Chu xla kakgalhti: «Niku natama xmakni nin, na anta natamakgstokgkgo águilas» (Lucas 17:37). Chuna, makgapitsi nalitaxtukgo la águilas nema makgat lakachankgo. Umakgolh tamakgalhtawakgen nalakgapaskgo xaxlikana Cristo, xKgawasa chixku, chu natamakxtumikgo niku xla wi. Uma kilhtamaku, Jesús nakamasiyani xtamakgalhtawakgen tiku ni makgxtakgkgo xaxlikana nema nakalakgmaxtu.