Tei Samaria aore ra Galilea â Iesu. Ui maira te mau Pharisea ia ˈna afea te Faatereraa arii e tae mai ai, ma te unauna rahi i to ratou manaˈo. Na ô atura oia: “Eita te Faatereraa arii a te Atua e tae mai a ite atu ai te taata, e ore atoa e parauhia: ‘A hiˈo na, to ǒ nei!’ aore ra: ‘A hiˈo na, to ǒ atu!’ Inaha, tei rotopu te Faatereraa arii a te Atua ia outou.”—Luka 17:20, 21.

Ua manaˈo paha vetahi e te parau ra Iesu e te mana ra te Faatereraa arii i roto i te aau o te mau tavini a te Atua. E ere râ te reira. Aita te Faatereraa arii i roto i te aau o te mau Pharisea ta Iesu e paraparau ra, tei rotopu râ ia ratou. Tei rotopu hoi ia ratou te Arii o te Faatereraa arii ta te Atua i maiti, o Iesu.—Mataio 21:5.

Eita e ore e i muri iho i to te mau Pharisea haereraa i faataa ˈtu â ˈi Iesu i ta ˈna mau pǐpǐ i te taeraa mai o te Faatereraa arii. No nia i te tau o to ˈna hoˈiraa mai ei Arii o te Faatereraa arii, ua faaara ˈtu oia na mua: “E tae mai te mau mahana e hinaaro ai outou e ite i te tau e hoˈi mai ai te Tamaiti a te taata nei, eita râ outou e ite atu i te reira.” (Luka 17:22) Te faaite ra Iesu e a muri aˈe te Tamaiti a te taata e faatere ai i roto i te Faatereraa arii. I tiai ru na paha te tahi mau pǐpǐ i te reira. Ua tiai â râ ratou e tae roa i te taime ta te Atua i faataa e tae mai ai te Tamaiti a te taata.

Parau atura Iesu: “E na ô atoa mai te taata ia outou: ‘A hiˈo na, to ǒ atu!’ aore ra: ‘A hiˈo na, to ǒ nei!’ Eiaha e haere atu, eiaha atoa e pee ia ratou. Mai te uira hoi e anapa mai te hoê pae raˈi i te tahi atu pae raˈi, mai tera atoa ïa i taua mahana ra e faaitehia mai ai te Tamaiti a te taata.” (Luka 17:23, 24) E nafea ta Iesu mau pǐpǐ e ore ai e pee i te mau Mesia haavare? Ua parau Iesu e ia haere mai te Mesia mau, mai te uira ïa e itehia mai te hoê pae raˈi i te tahi atu pae raˈi. E taa maitai ïa i te feia e haapao maite ra e ua tae mai te tau o to ˈna hoˈiraa mai ei Arii o te Faatereraa arii.

Faaau atura Iesu i te tau o to ˈna hoˈiraa mai i tei tupu i tahito ra no te faaite i te huru o te taata: “Mai i te tau o Noa, oia atoa ïa i te tau o te Tamaiti a te taata . . . Mai i te tau atoa o Lota: Te tamaa ra te taata, te inu ra, te hoo mai ra, te hoo atu ra, te tanu ra, te patu ra. I te mahana râ i faarue ai Lota ia Sodoma, mairi maira te auahi e te mau ofai ura mai te raˈi mai e mou aˈera ratou pauroa. Mai tera atoa ïa ia tae i te mahana e faaitehia mai ai te Tamaiti a te taata.”—Luka 17:26-30.

Aita Iesu e parau ra e ua haamouhia te taata o to Noa tau e to Lota no te mea ua tamaa ratou, ua inu, ua hoo mai, ua hoo atu, ua tanu e ua patu. Ua rave atoa hoi Noa e o Lota e to raua utuafare vetahi o teie mau mea matauhia o te oraraa. Ua na reira atoa te tahi atu, aita râ ratou  i haapao noa ˈˈe i te hinaaro o te Atua, aita atoa i tâuˈa i te tau ta ratou e ora ra. No reira Iesu i aˈo ai i ta ˈna mau pǐpǐ ia haapao i te hinaaro o te Atua e ia rohi i te rave i te reira. Te faaite ra ïa oia i te ravea e paruruhia ˈi, e ora ˈtu ai ratou ia tae mai te haamouraa a te Atua a muri aˈe.

Eiaha te mau pǐpǐ e vaiiho i te mau mea o teie nei ao, te mau mea “i muri,” ia haafifi ia ratou. Na ô atura Iesu: “I taua mahana ra, te taata i nia iho i to ˈna fare e to roto ta ˈna mau taoˈa i te fare, eiaha ïa e pou mai e tii i ta ˈna mau taoˈa, e oia atoa te taata i roto i te faaapu, eiaha ïa e hoˈi i muri. A haamanaˈo i te vahine a Lota.” (Luka 17:31, 32) Ua riro oia ei pou miti.

Faataa ˈtura â Iesu i ta ˈna mau pǐpǐ i te ohipa e tupu ia faatere mai te Tamaiti a te taata ei Arii: “I taua po ra, e piti taata to nia i te hoê â roˈi. E ravehia hoê, e vaiihohia râ te tahi.” (Luka 17:34) E faaorahia ïa vetahi, e vaiihohia râ te tahi atu, a pohe atu ai.

Ui maira te mau pǐpǐ: “Ihea ïa, e te Fatu?” Pahono atura Iesu: “I te vahi e tino pohe to reira e amui atoa mai ai te mau aeto.” (Luka 17:37) E riro vetahi mai te mau aeto o te ite atea. E amui teie mau pǐpǐ i te Mesia mau, te Tamaiti a te taata, a muri aˈe. I taua taime ra e haapii ai Iesu i ta ˈna mau pǐpǐ haapao maitai i te parau mau o te faaora.