Diosar walja kuti oracionan mayisiñajj wali wakiskiriwa, Jesusajj mä uñachtʼäwimpiw discipulonakapar uk yatichjjäna (Lucas 11:5-13). Jichhajj Samaria jan ukajj Galilea toqenkpachänwa. Jesusajj oración jan qarjtas lurañatjja mayampiw mä uñachtʼäwimpi akham sas yatichäna:

“Mä markanjja mä juezaw utjäna, jupajj Diosar janiw ajjsarkänti ni jaqerus respetkänti. Mä viuda warmiw uka markan utjarakïna, jupasti kutin kutiniw uka juezan ukar saräna, akham sasa: ‘Maynimpiw quejar puripjjta, leyinakarjamay cheqapar uñjita’ sasa. Jupajj walja tiempow uka warmir jan yanaptʼañ munkänti. Qhepatjja jupajj akham sasaw chuymapan säna: ‘Janiw nayajj Diosarus ajjsarkti ni khiti jaqerus respetkti, ukampis aka viuda warmejj sapa kutiw akan colerayitu. Ukhamajj cheqapar uñjatäñapatak yanaptʼjjakï, ukhamat akar jan jukʼamp jutañapataki. Aka warmejj quejapampiw coleratsa jiwayjjetani’ sasa” (Lucas 18:2-5).

Jesusajj akham saskakïnwa: “Uka juezajj janis cheqapar uñjir jaqëkchïnjja, ¡kuntï jupajj siskän uk istʼapjjam! Ukhamasti ¿janit Diosajj uruy aruma arnaqasir ajllitanakaparojj yanaptʼkani, ukhamat cheqapar uñjatäpjjañapataki? Ukhamarus Diosajj wali pacienciampiw jupanakarojj uñjaraki” sasa (Lucas 18:6, 7). Jesusajj ¿kunsa Awkipat yatichañ munäna?

Diosajj jan cheqapar uñjir juezjamäkaspasa, ¿ukhamti Jesusajj sañ munpachäna? Janiwa. Uka juezajj jan cheqapar uñjirïkchïnsa, walja kuti mayitajj istʼänwa. Diosajj jupat sipansa istʼarakiniwa sañwa munaskäna. Diosajj cheqapar uñjiri suma Diosawa. Servirinakapatejj jan qarjtas mayisipkakini ukhajja, istʼaniwa. Ukjja Jesusan arunakapanwa amuytanjja, jupajj saskakïnwa: “Nayasti sapjjsmawa: jupanakar cheqapar uñjasiñapatakejj jankʼakiw Diosajj yanaptʼani” sasa (Lucas 18:8).

Jilapartejj humildenakasa pobrenakasa janiw cheqaparjam uñjatäpkiti, qamirinakampi munañan jaqenakampikiw sum uñjatäpjje. Ukampis Diosajj janiw jaqenakarojj ukham uñjkiti. Horasaparuw cheqaparjam uñjani, jan wali jaqenakarojj castiganiwa, servirinakaparusti wiñay jakañwa churarakini.

¿Khitinakas viuda warmjam Diosar confiyapjje? ¿Qhawqhanis cheqapar uñjatäñatakejj ‘jankʼakiw Diosajj yanaptʼitani’ sasin confiyapjje? Jesusajj walja kuti oración lurañajj wali wakiskiriwa sasaw qhanañchäna. Jichhajja, qhawqsa oracionajj yanaptʼistaspa ukar confiyañ toqetwa parlarakïna, jupajj akham sänwa: “Jaqen Yoqapajj purinkani ukhajja, ¿Diosar ukham confiyir jaqenak oraqen jikjjataniti?” sasa (Lucas 18:8). Uka arunakampejj jupajj purinkani ukhajja, jukʼanikiw Diosar confiyapjjani sañ munaskäna.

Jesusar istʼapkäna uka jaqenakatjja, yaqhepajj Diosar walsa confiyapkaspa, taqe kunsa cheqaparus lurapkaspa ukham amuyasipjjäna. Mayninakarojj jiskʼachapjjarakïnwa, jupanakaruw Jesusajj akham säna:

 “Pä chachanakaw oración lurirejj templor makatapjjäna, maynisti fariseo, maynejja impuesto cobriri. Fariseojj saytʼasisaw akham sasin chuymapan mayisïna: ‘Diosay yuspärsmawa, janiw nayajj mayni jaqenakjamäkti. Jupanakajj lunthatasiri, jan cheqapar sarnaqeri, adulterio jucha luriri ukhamäpjjewa, janirakiw ni aka impuesto cobrir jaqjamäktsa. Nayajj semanan pä kutiw ayuntjja, kunanaktï jikjjatkta ukanakatsa diezmo churaraktwa’ sasa” (Lucas 18:10-12).

Fariseonakajja cheqaparjam uñjirïpkaspas ukhamaw jaqenak nayraqatan tukupjjerïna, ukhamat jachʼañchayasiñataki. Lunesampi juevesampejja walja jaqenakaw qhatur jutapjjerïna, ukatwa fariseonakajj uka urunakan ayunapjjerïna, ukhamat jaqenakampi uñjatäñataki. Ukatjja jan faltaw taqe kunat diezmo churapjjerïna, jiskʼa chʼojjña alinakatsa churapjjerïnwa (Lucas 11:42). Maysa toqetjja, fariseonakajj jiskʼachasir jaqenakäpjjänwa, mä qhawqha phajjsinak nayrakiw jaqenakar akham sas jiskʼachapjjäna: “Ley jan uñtʼir aka jaqenakajj maldisitawa” sasa. Jupanakajj amuyunakaparjamaw jaqenakar ukham uñjapjjäna (Juan 7:49).

Jesusajj saskakïnwa: “Impuesto cobriristi jaya cheqanakwa saytʼasïna, janiw alajjpacharus uñtañ munkänti, jan ukasti akham sasaw chuym leqʼesïna: ‘Diosay khuyaptʼayasikitaya, nayajj jucharar jaqëtwa’ sasa”. Impuesto cobriri jaqejja, juchararätap humilde chuymampiw arsusïna. Tukuyañatakejj Jesusajj akham sänwa: “Nayajj sapjjsmawa, aka jaqejj uka fariseot sipansa Dios nayraqatan jukʼamp cheqapar uñjataw utapar sarjje. Khititï jachʼa jachʼa tukki ukajja jiskʼachatäniwa, khititï jiskʼar tukki ukajja jachʼar aptatäniwa” sasa (Lucas 18:13, 14).

Ukhamatwa Jesusajj humilde chuymanïñajj kunja wakiskirisa uk yatichäna. Discipulonakapatakejja uka yatichäwejj wali wakiskirïnwa, jupanakajj jachʼa jachʼa tukuri fariseonak taypinwa jakasipjjäna, fariseonakatakejj jilïrïñasa qamirïñasa jukʼamp wakiskirïnwa. Jesusan yatichatapajja, taqe arkirinakapatakejj wali wakiskiriwa.