Yésu a mal ti banigil bé hihéga hi hi ñunda nseñ i téñbe ni masoohe. (Lukas 11:5-13) Nano a nlama ba i Samaria tole i Galiléa, a nyigye ki nseñ i yé i téñbe ni masoohe. A mboñ hala ni hihéga hipe, a nkal le:

“Nkéés wada a bé i tison yada, a bé kon bé Nyambe woñi, a bé ti bé to mut binam lipém. Yik muda yada i bé mu tison i, i bé waa bé ke yak nkéés, i kalak nye le: ‘Boñ le me kôhna mbagi sép mu nkaa u yé ipôla me lôñni i mut di gwééna.’ Inyu ndék ngéda, nkéés a bi top bé; ndi i mbus, a kalba le: ‘To hala kiki me nkon bé Nyambe woñi, me nti bé to mut binam lipém, m’a boñ le i yik muda ini i bana mbagi sép inyu boñ le i lo ha bañ i tehe me inyu tééñga me ni i jam a mbat.’”​—Lukas 18:2-5.

Yésu a ñôt biniigana bini: “Emblana jam nkéés a nkal, to hala kiki a téé bé sép! Ibabé pééna, baa Nyambe a’ pémés bé mbagi sép inyu mimpohlak nwé mi bôt mi mi nlôndôl nye juu ni njamuha, a hônbaga nwo?” (Lukas 18:6, 7) Kii Yésu a yé niiga inyu Isañ?

I pot maliga, Yésu a ta bé kal le Yéhôva Djob a mpôôna nkéés nu a téé bé sép. Ndi maselna mon a yé boñ. Ibale nkéés nu a téé bé sép a nsôk a timbhe minyemhe mi mut a téñbe, bôô ni ngélé yañen ni Yéhôva. Kiki a yé telepsép a bak ki loñge, a ga timbhe bagwélél bé ba ba ntéñbe ni masoohe. Hala a nene ngéda Yésu a nkal le: “Me nkal bé le, [Djob] a ga pala pémhene nwo mbagi sép?”​—Lukas 18:8

Diyeyeba di mbéna bé kôhna mbagi i téé sép, ki le mintôô mi bôt ni mingwañ mi bôt mi mbéna net minkaa. Ndi hala bé nyen Djob a yé. Kiki ngéda y’a kôla, Yéhôva a ga boñ le bibéba bi bôt bi kôs kogse, ndi bagwélél bé ba kôhna niñ boga.

Njee a gwé hémle kiki yik muda ini? Bôt bañen ba yé nkwoog nkaa le Djob ‘a ga pala pémhene bo mbagi sép?’ (Lukas 18:8) Yésu a ntip ti hihéga hi hi ñunda nseñ i téñbe ni masoohe. Nano, inyu pôdôl hémle ni ngui masoohe, Yésu a mbat le: “Ngéda Man mut a nlo, baa a’ koba yaga i hémle ini hana isi?” (Lukas 18:8) Hala a nsômbôl kal le ngandak i ga bana bé nya hémle i ngéda Kristô a ga loo.

Ngandak baemble Yésu i yé nkwoog nkaa le ba gwé hémle. Ba ntehe ki bomede kiki bôt ba téé sép, jon ba nyan bôt bape. Inyu nya bôt ini, Yésu a nti hihéga hini:

“Bôt iba ba bi bet i témpel inyu soohe, wada a bé Farisai, nuu numpe a bé nkottas. Farisai i telep, i bôdôl soohe haana ikété ñem wé: ‘A Nyambe, me nti we mayéga inyule me ta bé kiki bôt bape: Bôt ba ngadla, bôt ba téé bé sép, bôt ba ndéñg; me ta bé to kiki nkottas nunu. Hiki sonde, me nsôga je ngélé iba;  hiki jam me nkôhna, me nti jôga jada ikété jôm.’”​—Lukas 18:10-12.

Farisai i nyiba kiki bôt ba ngwés unda mbamba le ba yé bôt ba téé sép. Ba mboñ hala inyu hélés bape. Ba gwé lem i sôga je i dilo di bôm kiki Ngwa njañgumba ni i Ngwa mbok inyu nene bisu bi ngandak bôt. Ba nsaa jôga jada ikété jôm kii bo kinjiñkembe. (Lukas 11:42) Ndék sôñ bisu bi ngéda, ba bi unda le ba nyan bôt ba loñ, ni bibañga bini le: “Ndi limut lini li li nyi bé Mbén [inoñnaga ni litehge li Farisai] li yé ntiihege.”​—Yôhanes 7:49.

Yésu a nkena hihéga hié ni bisu ni bini bibuk le: “Ndi nkottas a bi telep haa, a bé gwés bé to pa mis i béñge i ngii, ndi a bé bép tôl yé ibabé waa inyu unda le a ntam, a kalak le: ‘A Nyambe, kon me ngoo, me yé mboñbéba.’” Ñ, nkottas a nyi ni suhulnyuu le a yé kwéha. Yésu a nsôk kal le: “Me nkal bé le, i mut nunu a bi témb i ndap yé, a bak mut telepsép iloo i Farisai ini. Inyule nu a mbédés nyemede b’a wéha nye nyuu; ndi nu a nsuhus nyemede a’ bédhana.”​—Lukas 18:13, 14.

Hala nyen Yésu a ñunda nseñ i bana suhulnyuu. Maéba mana ma yé loñge inyu banigil inyule ba bi néñél i homa Farisai i ndiihe bitel. Ma yé ki nseñ inyu banigil ba Yésu i len ini.