Ase hë Iesu hamë ceitun göi aqane troa thithi sipo. (Luka 11:5-13) Ma nyidrëti hë e Samaria e Galilaia, nge nyidrëti hmaca a qaja laka, nyipiewekë troa catre sipo. Nyidrëti a hamëne pi la ketre ceitun. Öni nyidrë:

“Hetrenyi ngöne la ketre traon, la ketre atre iameköti ka tha xoue Akötresie, nge ka pë metrötr. Nge hetrenyi fe e cili la ketre sine föe ka majemine tro lapa kowe la atre iameköti, me hape: ‘Isenyine jë matre meköti pi ni qëmekene la ithupëjiang.’ Ame lo xötrei, xele kö lo atre iameköti, ngo e thupen öni angeic, ‘Ngacama tha ka xoue Akötresieti kö ni, nge pëkö atr hnenge hna metrötrën, ngo pine laka, kolo pala hi a ikucahmë hnene la sine föe celë, tro hë ni a kapa la sipo i eahlo, wanga tro ni a kucakuca hnei eahlo.’ ”—Luka 18:2-5.

Iesu a hamëne jë la ini me hape: “Drenge fe hi nyipunie la hna qaja hnene la atre amekötin, ngacama tha ka meköti kö angeic? Matre hapeu, tha tro kö Akötresieti lai a hane isenyine thatraqane la itre hnei nyidrëti hna iën, itretre treije koi nyidrë e lai me jidr? Nge goi tro fe nyidrëti lai a hane xomihnin aqeanyi angatr.” (Luka 18:6, 7) Nemene la hna amaman hnei Iesu?

Tha Iesu kö a qaja ka hape, ceitu i Iehova memine la atre iameköti. Ngo kolo pe mama la isa pengöi nyidro: Maine tro la atre ka tha meköt a kapa la hna sipone lapan, nga the qaja pala ha Akötresie. Ka meköti nyidrë, nge tro pala hi nyidrëti a sa, e tro la itre hlue i nyidrë a sipone lapan. Kola mama lai ngöne la itre trengewekë i Iesu, öni nyidrë: “Eni a qaja hnyawa koi nyipunie, tro nyidrëti lai a canga isine troa jelemeköti angatr.”—Luka 18:8.

Isa pengöne kö la aqane amekötine la itre ka ipië me ka pë ewekë, me itre trene mus me trenamo. Eloine hi, tha aqane waiewekë i Iehova kö. Nge e traqa ha elany la ijin hna sa, tro kö Iehova a ameköti itre ka kuca la ngazo, me hamë mele ka pë pun koi itre hlue i nyidrë.

Iesu a ase qaja la enyipiewekën troa sipo lapa. Nge enehila, nyidrë a amamane laka, nyipiewekë troa lapaun kowe la mene ne la thith. Ngo drei la ka lapaun tune la sine föe? Nge Ijetre la ka mejiune tro Akötresie a “canga isine troa jelemeköti angatr”? Öni nyidrë: “Ngo hapeu e traqa pi elanyi la Nekö i atr, tro kö nyidrëti a öhne la ketre atr ka hane lapaune tun e celë fen?” (Luka 18:8) Ame la Iesu a hnyinge tun, tre nyine amamane laka, e traqa jë nyidrë, tha tro kö a ala nyimu hnei ka lapaun.

Thene la itre ka drei Iesu, hetre ka mekune laka, ka catrecatre la lapaune i angatr. Angatr a isa jelemeköti angatr, me wangaconyi itre xan. Matre Iesu a hamëne pi koi angatre la ceitun celë. Öni nyidrë:

 “Hnene la lue atr hna lö hnine la uma ne hmi troa thith, Faresaio la ketre, nge atre hle mani la ketre. Ame hnene la Faresaio hna cil me nyiqaane thithi thaup ka hape, ‘Akötresieti fe, oleti laka, tha ceitunge kö me itre xa atr—itre ka atrekënö, me ka tha meköti kö, me ka nyixetë—maine tune pena la atre hle mani celë. Ke ka alua tha xeni ni ngöne la wiik, me hamëne la hnaatrenene la nöjei ewekë hnenge hna kapa.’ ”—Luka 18:10-12.

Ka hlemu itre Faresaio troa nyi ka meköt, nge pi tro catr angatr a nyi drön. Matre, e nöjei Thupenehmi me Draikaco, angatr a tha xen ngöne la hna maketr, ke gaa tru atr. Nge e cili, angatr a thupëne hnyawa troa kuiëne la hnaatrenene la nöjei ewekë, uti fe hë la itre dröne hnitr. (Luka 11:42) Itre hnepe treu qëmeken, hnei angatr hna qaja la aqane waipengön angatr la itre atr. Öni angatr: “Ame la ka ala nyimu celë, itre ka thatre la Wathebo [mekuna i itre Faresaio] matre ka hnëjin angatr.”—Ioane 7:49.

Iesu a qaja hmaca jë la ceitun me hape: “Ame la atre hle mani, angeice hi a nango cile iananyi, nge goi tha gala draië fe angeic, ngo angeice pe a lepelepe la imano i angeic, me hape: ‘Akötresieti fe, epi utipi ni, ke atr ka ngazo ni.’ ” Eje hi, ka ipië la atre hle mani, ke atre hi angeic la itre ngazo i angeic. Matre Iesu a nyipune jë me hape: “Eni a qaja hnyawa koi nyipunie laka, meköti kö la atre cili ngöne la angeic a bëeke koi hnalapa, hune lo Faresaio. Ke ame la atre sipu selë angeice kö, tre tro ha thaipiën, ngo ame la atre ipië, tro ha adraiën.”—Luka 18:13, 14.

Thupene lai, Iesu a amamane jë la enyipiewekëne troa ipië. Eamo lai ka lolo koi itretre dreng, ke angatr a mel ngöne la ketre nöj laka, itre Faresaio ka pi mama a catre fë la götrane qa. Ngo eamo ka lolo fe koi nöjei atr ka pi xötrethenge Iesu.