Sa vakamacalataka o Jisu vei ratou nona tisaipeli e dua na vosa vakatautauvata me baleta na masu vagumatua. (Luke 11:5-13) De dua sa tiko qo e Samaria se Kalili, sa qai vakamacalataka ena dua tale na vosa vakatautauvata ni bibi me kua ni cegu na masu:

“E tiko ena dua na koro e dua na turaganilewa e sega ni rerevaka na Kalou, e sega tale ga ni doka na tamata. E tiko tale ga ena koro ya e dua na yada e dau lai tukuna tiko vua, ‘Au vinakata me tau vakadodonu na lewa vei koya e via veilewaitaki au tiko.’ Dua toka na gauna nona sega ni via kauai na turaganilewa, e muri sa qai kaya e lomana, ‘Au sega ni rerevaka na Kalou, au sega tale ga ni doka e dua na tamata, ni sa rui vakasosataki au na yada qo, au na raica me tau vua na lewadodonu, de lakolako au na ciba tale ena levu ni nona veivakasosani.’”​—Luke 18:2-5.

Sa qai tukuna o Jisu na ivakavuvuli ni italanoa qo, e kaya: “E sega ni turaga yalododonu na turaganilewa, ia rogoca na ka e kaya! Me na qai sega vakacava ni raica na Kalou me vakayacori na lewadodonu vei ira nona digitaki era tagi vua ena siga kei na bogi, dina ga ni dau vosoti ira?” (Luke 18:6, 7) Na cava e tukuna tiko e ke o Jisu me baleti Tamana?

E sega ni tukuna o Jisu ni sega ni yalododonu na Kalou o Jiova me vakataki koya na turaganilewa. E veidutaitaka tiko ga eso na ka me baleti rau: Ke sa rawa ni kauaitaka e dua na turaganilewa e sega ni yalododonu nona cikecike se kerekere tiko ga e dua, e macala ga ni na cakava tale ga qori na Kalou. E yalododonu qai vinaka o Jiova, ena rogoci ira na nona dauveiqaravi ke ra sega ni cegu na masu. Eda vakadinata qori ena ka e cavuta qo o Jisu: “Au tukuna vei kemuni, ena raica [na Kalou] me tau vakatotolo vei ira na lewadodonu.”​—Luke 18:8.

E sega ni dau tau na lewadodonu vei ira na tauvanua kei ira na dravudravua, era kauaitaki ga vakalevu na vutuniyau kei na rogo. Ia qori e sega ni loma ni Kalou. Ena nona gauna lokuci, ena totogitaki ira na tamata ca ra qai bula tawamudu na nona dauveiqaravi.

O cei e vakabauta me vaka na yada? O cei e vakabauta dina ni na raica na Kalou me “tau vakatotolo vei ira na lewadodonu”? Se qai vakamacalataka ga o Jisu na bibi ni masu vagumatua. Qo sa taro me baleta na vakabauta kei na yaga ni masu: “Ia ni yaco mai na Luve ni tamata, ena kunea e vuravura na vakabauta?” (Luke 18:8) E vakamacalataki tiko e keri ni levu era na rairai sega ni vakabauta ena gauna e lako mai kina o Jisu.

Era nuidei eso na vakarogoci Jisu tiko ni sa dei tu nodra vakabauta. Era kaya nira yalododonu ra qai beci ira eso tale. Sa qai vakamua vei ira o Jisu na vosa vakatautauvata qo:

“Erau lako cake ina valenisoro e rua na tagane me rau lai masu, e dua na Farisi kei na dua na daukumuni ivakacavacava. E tucake na Farisi qai masu lo ni kaya, ‘Kemuni na Kalou, au vakavinavinaka vei kemuni niu sega ni vakataki ira na so, era dau kocokoco, era sega ni yalododonu, era dau veibutakoci, seu vakataki koya na daukumuni ivakacavacava qo.  Au lolo vakarua ena dua na macawa, au solia na ikatini ni ka kece au rawata.’”​—Luke 18:10-12.

E dau vakarairai na nodra yalododonu na Farisi mera dokai kina. Era dau lolo ena Moniti kei na Lotulevu ni siga osooso ni veivoli, ena laurai levu kina na ka era cakava. Era raica vakabibi mera solia na ikatini ni itei. (Luke 11:42) Ena vica na vula yani e liu, era beci ira na tauvanua nira kaya: “Ira na ilala levu qo era tamata cudruvi [ena nodra rai na Farisi], era sega ni kila na Lawa.”​—Joni 7:49.

E tomana o Jisu nona vosa vakatautauvata: “Ia e duri tu mai vakayawa na daukumuni ivakacavacava, e sega mada ga ni tacake rawa i lomalagi. E tavia tiko ga na serena, e kaya, ‘Kemuni na Kalou, ni lomani au niu tamata ivalavala ca.’” Io, e vakadinata na daukumuni vakacavacava na nona malumalumu. E tukuna o Jisu: “Au tukuna vei kemuni, e vakadonui na tagane qo ni lako sobu i nona vale, e sega ni vakadonui na Farisi. Ni o koya e vakacerecerei koya ena vakalolovirataki, o koya e vakamalumalumutaki koya ena vakacerecerei.”​—Luke 18:13, 14.

E vakamatatataka e keri o Jisu ni bibi na yalomalumalumu. Ena yaga sara vei ratou na nona tisaipeli na ivakasala qori ni ratou susugi ena vanua era vakabibitaka kina na itutu kei na rogo na Farisi viavia yalododonu. E ivakasala yaga tale ga qori vei ira kece na imuri i Jisu.