Jesu anahe arutwo ake ngerekano ĩgiĩ mũndũ kũhoya ategũtigithĩria. (Luka 11:​5-13) No kũhoteke rĩu arĩ Samaria kana Galili, na o rĩngĩ agatĩtĩrithia bata wa mũndũ kũhoya ategũtigithĩria. Akonania ũguo kũgerera ngerekano ĩno:

“Itũũra-inĩ rĩmwe nĩ kwarĩ na mũcirithania ũteetigĩrĩte Ngai na ũtaaheete andũ gĩtĩo. Ningĩ itũũra-inĩ rĩu nĩ kwarĩ na mũtumia ũmwe wa ndigwa wathiaga kũrĩ we maita maingĩ akamwĩra, ‘Tigĩrĩra atĩ nĩ ndona kĩhooto cira-inĩ wakwa.’ Kwa ihinda ndeendaga gwĩka ũguo, no thutha-inĩ akiuga na ngoro atĩrĩ, ‘O na gũtuĩka ndiĩtigĩrĩte Ngai na ndirĩ mũndũ heete gĩtĩo, na tondũ mũtumia ũyũ wa ndigwa nĩ athĩnagia mũno, ngũtigĩrĩra atĩ nĩ ona kĩhooto nĩguo ndagatindage agĩũka kũnogia na mathaithana make.’”​—Luka 18:​2-5.

Jesu agataarĩria ngerekano ĩyo akoiga: “Ta iguai ũrĩa mũcirithania ũcio oigire, o na gũtuĩka ndaarĩ mũthingu! Kwoguo-rĩ, githĩ Ngai ndarĩtigagĩrĩra atĩ andũ ake arĩa athuure, arĩa mamũkayagĩra mũthenya na ũtukũ nĩ mona kĩhooto, o akĩmakiragĩrĩria?” (Luka 18:​6, 7) Kwoguo nĩ ũndũ ũrĩkũ Jesu ararutana wĩgiĩ Ithe?

Jesu ndaroiga atĩ Jehova Ngai ahaana ta mũcirithania ũcio ũtaarĩ mũthingu. No aramaringithania kuonania ngũrani atĩ angĩkorũo mũcirithania ta ũcio ũtaarĩ mũthingu no athikĩrĩrie thutha wa gũthaithwo mũno, hatarĩ nganja o na Ngai ndangĩaga gũthikĩrĩria. We nĩ mũthingu na nĩ mwega, na nĩ athikagĩrĩria andũ ake mangĩhoya mategũtigithĩria. Ũndũ ũcio nĩ ũronanio nĩ ciugo ici Jesu aracoka kũgweta: “Ngũmwĩra atĩrĩ, [Ngai] arĩtigagĩrĩra nĩ mona kĩhooto o na ihenya.”​—Luka 18:8.

Kaingĩ andũ arĩa athĩni na a kĩrathi gĩa thĩ mekagwo maũndũ matarĩ ma kĩhooto, ngũrani na arĩa marĩ na hinya na atongu. No ũguo tiguo Ngai ekaga. Ihinda rĩrĩa aigĩte rĩakinya, nĩ agaatigĩrĩra atĩ arĩa aganu nĩ maniinwo na ndungata ciake nĩ ciaheo muoyo wa tene na tene.

Hihi nĩa marĩ na wĩtĩkio ta wa mũtumia ũcio wa ndigwa? Nĩ aigana metĩkĩtie na ma biũ atĩ Ngai nĩ “arĩtigagĩrĩra nĩ mona kĩhooto o na ihenya”? Jesu akorũo aheana ngerekano ĩronania bata wa mũndũ kũhoya ategũtigithĩria. Rĩu, ũhoro-inĩ wĩgiĩ gwĩtĩkia atĩ mahoya nĩ marutaga wĩra, akoria: “Hĩndĩ ĩrĩa Mũrũ wa mũndũ agaakinya-rĩ, hihi kũna nĩ agaakora wĩtĩkio ta ũcio gũkũ thĩ?” (Luka 18:8) Arenda kuonania atĩ wĩtĩkio ta ũcio no ũkorũo ũtarĩ na andũ aingĩ rĩrĩa Kristo agaakinya.

Amwe arĩa marathikĩrĩria Jesu meyonaga marĩ na wĩtĩkio mũrũmu. Metĩkĩtie atĩ o nĩ athingu, ĩndĩ monaga arĩa angĩ matarĩ kĩene. Jesu akaheana ngerekano ĩno kũrĩ andũ ta acio:

“Andũ erĩ nĩ maambatire magĩthiĩ hekarũ-inĩ kũhoya, ũmwe aarĩ Mũfarisai, nake ũcio ũngĩ aarĩ mwĩtia wa mbeca cia igooti. Mũfarisai ũcio akĩrũgama na akĩambĩrĩria kũhoya maũndũ maya ngoro-inĩ yake, ‘Nĩ ndagũcokeria ngatho Ngai, nĩ gũkorũo niĩ nditariĩ ta andũ arĩa angĩ othe​—atunyani, andũ matarĩ athingu, itharia​—o na kana ta mwĩtia ũyũ wa mbeca cia igooti. Ndĩĩhingaga kũrĩa maita merĩ o kiumia; ngaruta gĩcunjĩ gĩa ikũmi kĩa indo ciakwa ciothe.’”​—Luka 18:​10-12.

 Afarisai nĩ moĩkaine ũrĩa mendete kwĩyonania atĩ nĩ athingu. Mekaga ũguo nĩguo makenie andũ. Mehingaga mĩthenya ya Njumatatũ na Aramithi, mĩthenya ĩrĩa gũkoragwo na thoko nene nĩguo andũ aingĩ mamone. Ningĩ nĩ merutanagĩria kũruta gĩcunjĩ gĩa ikũmi kĩa nginya mĩmera ĩrĩa mĩnini. (Luka 11:42) Mĩeri ĩigana ũna mĩhĩtũku, nĩ monanirie ũrĩa manyararĩte andũ a kĩrathi gĩa thĩ makiuga: “Kĩrĩndĩ gĩkĩ gĩtoĩ Watho [kũringana na muonere wa Afarisai] nĩ kĩrume.”​—Johana 7:49.

Jesu agathiĩ na mbere gũtaarĩria ngerekano ĩyo akoiga: “No mwĩtia ũcio wa mbeca cia igooti, arũgamĩte haraya, ndeendaga o na kũroria maitho make na igũrũ, no kwĩhũũra eehũũraga gĩthũri akiugaga, ‘Ngai ndagũthaitha, njiguĩra tha, tondũ niĩ ndĩ mwĩhia.’” Mwĩtia ũcio wa mbeca cia igooti nĩ eenyihirie agĩtĩkĩra atĩ we nĩ mwĩhia. Jesu akarĩkĩrĩria na kuuga: “Ngũmwĩra atĩrĩ, mũndũ ũcio aainũkire gwake arĩ mũthingu gũkĩra Mũfarisai ũcio. Nĩ gũkorũo mũndũ o wothe wĩtũũgagĩria nĩ akaanyihio, no ũrĩa wothe wĩnyihagia nĩ agaatũũgĩrio.”​—Luka 18:​13, 14.

Kwoguo Jesu akonania wega bata wa mũndũ gũkorũo arĩ mwĩnyihia. Ũtaaro ũcio nĩ wa bata harĩ arutwo ake tondũ marereirũo kũndũ Afarisai acio arĩa meyonaga marĩ athingu mekĩrĩire mũno ũnene na igweta. Na nĩ wa bata harĩ arũmĩrĩri othe a Jesu.