Yesu watelele kala alongoki andi e kingana kisonganga o mfunu wa kwaminina muna sambu. (Luka 11:5-13) Owau, nanga mu Samaria yovo Ngalili kena. Ovovele o mfunu wa kwaminin’o samba muna kingana eki:

“Muna vata dimosi mwakala mfundisi walembi vuminanga Nzambi, ngatu zitisa muntu. Mwakala mpe nkento wafwilwa yakala muna vata diadina wayendanga kwa yandi, oku vo, ‘Undungisa kwa ntantu ame.’ Kuna lubantiku kazola wo ko, kansi kuna kwalanda ovovele vo, ‘Kanele vo kivuminanga Nzambi ko, ngatu zitisa muntu, wau vo nkento ndioyo wafwilwa yakala okwamanananga kuntokanesa, ikunlungisa kimana kayambula kuntokanesa muna ndomb’andi.’”—Luka 18:2-5.

Muna songa e nsas’a kingana kiaki, Yesu ovovele vo: “Nuwa, owu uvovele mfundisi, kana una vo nkwa vilwa! O Nzambi, nga kalendi lungisa awana kasola ko, ana bekumbokelanga fuku yo mwini, wau kekubasonganga ntim’avunda mbidi a kolo e?” (Luka 18:6, 7) Adieyi o Yesu kazolele vova mu kuma kia Se diandi?

O Yesu kavovele ko vo Yave wa Nzambi una nze mfundisi ndioyo wa nkwa vilwa. Yesu edi kazolele vova: Avo mfundisi wa nkwa vilwa olungisa e ndomb’a nkento ndioyo wau kasiandamene, o Nzambi mpe diau dimosi kesinga vanga. O Nzambi nkwa unsongi ye wambote, olungisa e ndomba za nkangu andi avo bakwamanene muna sambu. Tulenda mona e ziku kia diambu diadi muna mvovo mia Yesu: “Inusamunwini vo, [Nzambi] oyambula vo balungiswa-lungiswa.”—Luka 18:8.

Nkumbu miayingi, asukami ye mpasi wantu ke belungiswanga ko. Kansi akwa wisa ye mvuama yau belungiswanga. Kansi o Nzambi kalendi wo vanga nkutu ko. Vava kifwana e ntangwa, kuna unsongi wawonso Yave ofwasa yimpumbulu yo vana moyo a mvu ya mvu kwa selo yandi.

Nani una yo lukwikilu nze lwa nkento ndioyo wafwila yakala? Wantu kwa bekwikilanga vo Nzambi “oyambula vo balungiswa-lungiswa”? Muna kingana kiaki, Yesu osongele o mfunu wa kwaminin’o samba. Muna songa o mfunu wa lukwikilu muna sambu, Yesu oyuvuidi vo: “O Mwan’a muntu vava kekwiza, nga owana kikilu lukwikilu ova nza?” (Luka 18:8) E mvutu i zazi: o wantu ke bekala yo lukwikilu lwa mpila yayi ko vava Kristu kekwiza.

Akaka muna awana bewanga Yesu bekuyisananga vo lukwikilu bena lwau. Bekuyibundanga vuvu vo yau akwa unsongi yo veza akaka. Yesu ubatelele kingana eki: “Wantu wole batomboka kuna tempelo basamba, omosi Mfarisi, owaka mvakulwisi a mpaku. O Mfarisi otelamene, osambidi vo, ‘E Nzambi, itondele, kadi kina nze wantu awaya ko—mivi, avilwa, minta-zumba—musungula mvakulwisi a mpaku ndioyu. Muna lumingu, lumbu yole ifionkononanga; ivanang’e tini kiekumi muna yawonso mbakanga.’”—Luka 18:10-12.

Afarisi bazayakene vo bekuyisonganga kwa wantu vo yau i akwa unsongi. Bevanganga wo muna sivikisa akaka. Nkumbu miayingi befionkononanga kina Kiamosi ye Kiayá, kimana bamoneka kwa nkangu, kadi eyayi i lumbu ina o wantu betanga e zandu. Bavananga mpe tini kiakimu kia mbongo yakete-kete. (Luka 11:42) Muna ngonde zaviokele, Afarisi baveza o nkangu wasakalala muna mvovo emi: “E ndonga yayi ilembele zaya o Nsiku [muna ngindu za Afarisi], yasibwa.”—Yoane 7:49.

Yesu okwamanene kingana kiandi, oku vo: “Kansi, o mvakulwisi a mpaku, otelamene kuna vala, kazolele nkutu sengola meso ku zulu ko, tulu kiandi kaka kabundidinge, oku vo, ‘E Nzambi, umfwil’e nkenda, i nsumuki kwame.’” Kieleka, o mvakulwisi a mpaku kuna lulembamu lwawonso ozeye wo vo nkwa masumu. I bosi, Yesu ofokwele kingana kiandi mu mvovo emi: “Inusamunwini vo, muntu ndioyo okulumukini kuna nzo andi se nkwa unsongi ke mu Mfarisi ko. Kadi konso ona okuyitundidika, okululwa, kansi konso ona okuyikulula, otundidikwa.”—Luka 18:13, 14.

Yesu otomene kiesesa o mfunu wa kala nlembami. E longi diadi diamfunu kwa alongoki andi, kadi basansukila muna fulu ina Afarisi bekuyibadikilanga vo akwa unsongi, akwa tunda yo lusanu. Ekwe longi diamfunu kwa awonso belandanga Yesu!