Yesu oomala waaleela amuhuserya awe niphwanaphwaniho vooloca sa otitelela mmavekelo. (Luka 11:5-13) Vano akhweya owo ori o Samariya naari o Kalileya, nave wanawiili onnacicimiherya ochuneya waya ohihiyererya ovekela. Owo oneerano yeela mu niphwanaphwaniho nikina:

“Nipoma nimoha àkhalavo muthoriha mmoha àhamova Muluku ni àhatxitximiha akhwawe. Nipoma nenle àkhalawotho namukhweli mmoha àya olotxa ni yowo ariki: ‘Okithorihele mulatxu aka ni mwitxana aka.’ Àlekela ahakhunle. Alekenleiye, àhupuweIa mekheiye: ‘Eparipari miyo nkinamova Muluku, nari nkinàtxitximiha akhwaka; nto wona wi namukhweli ola onnakùkhula, kinammuthorihela mulatxu awe wi atxharuwe okùkhula.’”—Luka 18:2-5.

Apharihelaka muteko, Yesu onnaloca: “Wiriyanani onlotxeiye muthoriha ola òtakhala! Nave Muluku hawerya owerela wokololowa òthanliwa awe ananvekela othana ni ohiyu, nto onàwehereriha?” (Luka 18:6, 7) Tiheeni Yesu onaloceiye sa Atiithi awe?

Mweeparipari Yesu hanaloca wi Yehova Muluku onalikana ni muthoriha oohookololowa. Mwaha awe onaloca echu yoohiyana: Yaakhanle wi muthoriha oohookololowa onnaakhulela yooveka yoonyesererya, Muluku onahaala weerano hiiha. Owo tawookololowa ni aphaama nave onahaala owaakhula achu awe waakhala wi hahin’ye ovekela. Nnanwerya woona yeeyo moorweela wa yeeyo Yesu onaacereryeiye: “Miyo kinnolèlani: [Muluku] onamwerela wokololowa vohilekela.”—Luka 18:8.

Achu ooceecheya ni ohaawa ikwaha ikina hanakhalihiwa mwawookololowa, koma oowerya ni ooreela tanakhala oophwanelela. Nto eyo heneereya ni Muluku. Vaavaa elukuluku eneeraaya yaakhwanele, owo onahaala weerano mwawookololowa wi amutakhali elakiwe nave alapeli awe yaakhele ekumi yoohimala.

Taani orino nroromelo ntoko naamukhwele yoole? Ti mwawiihai ancipale anaroromelaaya wi Muluku “onamwerela wokololowa vohilekela?” Yesu oolikanyiha ochuneya waya otitelela ovekela. Vano, vanthowa na ororomela ikuru sa nivekelo, owo onnakoha: “Nto Mwana a mutxhu akòkà, onarwa aphwanya wemererya velaponi yavathi?” (Luka 18:8) Mwaha ti wawi achu aweemererya ntoko yaawo eni ekhalevo vakhaani Kristu aphiya.

Akina a yaawo ananwiriyana Yesu annoona okhala oophareleleya mu nroromelo naya. Awo anniiroromela wi tawookololowa, enawoona akina ohikhala echweenevo. Wa achu yaawo, Yesu onnaaleela niphwanaphwaniho nla:

“Alopwana eli yàya ovekela mpa mwa Muluku. Mmoha àri farisi, mukina ari mulipa a musokho. Farisi emenle ànavekela mmurimani mwawe ariki: ‘Muluku kinnothamala, ntakhara nkiri ntoko atxhu akina ari ampava, òhokolola,  òraruwa, navetho nkilikanne ni mulipa a musokho ola. Vasumanani kinninanela solya itila piili, nave kinanliva musoko wa orèla waka wothene.’”—Luka 18:10-12.

Afarisi annasuweliwa wi anniisooneiha vanlakani ntoko achu awookololowa. Awo aneerano yeela wi yaalekeche achu. Ntoko yookhovelela aya yaanapaka saweereya saya sa wiinanela yoolya mmahiku a Noomorela ni Naneesese, yaawo yaari mahiku a misika mitokweene mummo achu yaahaalaaya owoonaka. Nave awo yaanaliva yaneekhumi mwawiikosoopa ophiyeryatho mimiso mikhaani. (Luka 11:42) Mu miyeeri vakhaani muculi, yaahaanyemula achu pure eriki: “Nto atxhu ale ahisuwenle malamulo [mwawiiwanana ni moonelo wa Afarisi] ari awulumeliwa!”—Yohani 7:49.

Yesu onnatitelela nniphwanaphwaniho nawe ariki: “Mulipa a musokho ari otxaiwene, hàwerya mano otxhukhulela mitho wirimu. Owo ànikhupanyerya ariki: ‘Muluku aka kimorele ikharari, kà mulipa òtxheka!’” Aai mulipa musokho mwawiiyeviha onnasuwela soocheka sawe. Yesu onnakuchula ariki: “Miyo kinnolèlani wi mulipa a musokho ole àkòkela owani eriwe awokolola ompwaha ole mukina; ntakhara yole onisunnuwiha, onamuyevihiwa; ni yole oniyeviha, onamunnuwihiwa.”—Luka 18:13, 14.

Mmukhalelo yoola, Yesu onnahiya vanlakani ochuneya waya okhala awiiyeviha. Ola olopola wamphurelo ntakhara amuhuserya awe, yaawo yaaphuiwale variyari va Afarisi yaawo anacicimiherya mukhalelo ni murici. Nave ela ekano ya miruku wa oomuchara oothene a Yesu.