Jesusqa Diosmanta mana saykʼuspa mañakunata yachacherqaña. Chayta yachachinanpajtaj uj kikinchayta yachachisqasninman willarerqa (Lucas 11:5-13). Chantá Samariapi kashaspasina chayri Galileapi kashaspachus, watejmanta mana saykʼuspa Diosmanta mañakunata yachachillarqataj.

Jesús nerqa: “Uj llajtapi uj juez kasqa, payqa Diosta mana manchachikojchu, nitaj runastapis kasuta ruwajchu. Chay llajtapeqa uj viuda kallasqataj, paytaj chay juezpaman rillajpuni: ‘Uj runawan demandapi purishayku, justiciata ruwapuway’, nispa. Jueztaj unayta mana uyariyta munasqachu. Chaymantaraj sonqonpi nisqa: ‘Diostaqa mana manchachikunichu, nitaj runastapis kasunichu. Kay viudataj sapa kuti umayta nanachiwan, chayrayku justiciata ruwapusaj, amaña kutin kutita jamuspa umayta nanachinawanpaj’, nispa” (Lucas 18:2-5).

Chantá Jesusqa sutʼincharqa: “¿Reparankichejchu imatachus juez nisqanta mana cheqan runa kaspapis? ¿Manachu Diosqa ajllasqasninpaj justiciata ruwaponqa tuta pʼunchay paymanta mañakojtinku? Diosqa pacienciayoj”, nispa (Lucas 18:6, 7). Chayta nispa, ¿imatataj Tatanmanta Jesús nisharqa?

Jesusqa Diosta mana manchachikoj juezmanta parlarqa, manataj nerqachu Jehová Dios chay juez jina kasqanta. Astawanpis nerqa, Diosqa sapa kuti mañakusqanchejta uyarinantapuni. Imaynatachus mana cheqan kajta ruwaj juez, uj viudaj sapa kuti mañakusqanta uyarerqa, ajinata. Diosqa cheqan kajta ruwan, kʼachataj. Chayrayku paypa kamachisnin sapa kuti mañakojtinku, payqa mañakusqankuta uyarenqapuni. Jesús nerqa: “Noqa niykichej: Payqa usqhayllata justiciata paykunapaj ruwaponqa”, nispa (Lucas 18:8).

Runasqa wajcha runaspaj, pisipaj qhawasqa kajkunapaj ima mana justiciata ruwapunkuchu. Astawanpis qhapaj runasllapaj chayri jatunpaj qhawasqa runasllapaj justiciata ruwapunku. Diostajrí mana chayta ruwanchu. Payqa maychus tiemponpi tukuypaj justiciata ruwanqa. Chaypachataj sajra runas castigasqa kanqanku, kamachisnintaj wiñay kausayta japʼenqanku.

Jesusqa viudamanta kikinchayninwan mana saykʼuspa orakunata yachachisharqa. Chantapis pay sutʼincharqa orakunapaj sinchʼi creeyniyoj kana kasqanta. Chayrayku nerqa: “Noqa jamojtiy, ¿tarisajchu kay jallpʼapi chay jina creeyniyoj runasta?”, nispa (Lucas 18:8). Jesús kutimunan tiempopi, ¿mashkha runastaj Jesuspa kikinchayninmanta viuda jina sinchʼi creeyniyoj kanqanku? ¿Mashkha runastaj creenqanku Diosninchej “usqhayllata justiciata paykunapaj” ruwapunanta? Chaytaqa pisi runaslla creenqanku.

Jesusta uyarejkunamanta wakenqa, sinchʼi creeyniyoj kasqankuta, cheqan imasta ruwasqankuta yuyakoj kanku. Chantapis wajkunata pisipaj qhawaj kanku. Chayrayku Jesusqa waj kikinchaymantañataj parlarqa.

 Pay nerqa: “Iskay runas temploman risqanku Diosmanta mañakoj, ujnin fariseo kasqa, ujnintaj impuestero. Fariseoqa sayaykuspa sonqonpi Diosmanta mañakusqa: ‘Diosníy, agradecekuyki. Noqaqa mana wajkuna jina suwachu, sajrachu, qhenchachu kani, nitaj kay impuestero jinallapischu. Noqaqa semanapi iskay kutita ayunani, tukuy imasta japʼisqaymantataj sapa chunkamanta ujta qoni’, nispa” (Lucas 18:10-12).

Fariseosqa runasta tʼukuchiyta munasqankurayku runaspa ñaupaqenpipuni cheqan imasta ruwaj kanku. Ayunotapis feria diaspuni ruwaj kanku, ashkha runas ayunasqankuta rikunankupaj. ¿Ima diastaj feria kaj? Lunesta, juevesta ima. Chantapis paykuna sapa chunkamanta ujta qojpuni kanku, juchʼuy hojitasniyoj qhorasmantapis (Lucas 11:42). Fariseosqa waj runasta pisipaj qhawaj kanku. Chayrayku uj mashkha killas ñaupajllata nerqanku: “Jesusta uyarej runasqa mana Leyta rejsisqankurayku maldecisqa kanku”, nispa (Juan 7:49). Arí, runasqa fariseospa churasqanku kamachiykunata mana rejserqankuchu.

Chantá Jesús nillarqapuni: “Impuestero runatajrí, karullapi sayaspa mana cielollatapis qhawarisqachu, manachayqa pechonta takakuspa nisqa: ‘Diosníy, khuyarikuway ari, noqaqa juchasapa runa kani’, nispa”. Arí, chay impuesteroqa juchasapa kasqanta Diosman willakorqa. Chayrayku Jesús nerqa: “Chay impuesteroqa wasinman ripusqa aswan allin runapaj qhawasqa, chay fariseomanta nisqaqa. Ajina ari, pichus jatunchakojqa kʼumuykachachisqa kanqa, kʼumuykukojtajrí jatunchasqa kanqa”, nispa (Lucas 18:13, 14).

Ajinata Jesusqa yachacherqa kʼumuykukoj sonqo kananchej kasqanta. Chay yachachisqanqa may sumajpuni yachachisqasninpaj karqa. Imajtinchus paykunaqa fariseospa chaupinkupi wiñarqanku. Fariseostajrí cheqan imasta ruwasqankuta yuyaj kanku, jatunpaj qhawachikuytataj maskʼaj kanku. Chantapis Jesuspa yachachisqanqa, tukuy noqanchejta yanapallawasunmantaj.