Jesusqa rikchanachiyta willakuspanmi ña yachachirqaña Diosta sapa kuti mañakunamanta (Lucas 11:5-13). Ichaqa kaqmantam Diosta hinalla mañakunamanta yachachirqa ichapas Samaria lawpi utaq Galilea lawpi kachkaspan.

Nirqam: “Huk llaqtapim karqa Diosta mana manchakuq hinaspa runakunatapas mana respetaq juez. Chay llaqtapiqa karqataqmi huk viudapas, chay viudam juezman ripayaspan nirqa: ‘Quejanakuqniywanyá justiciata ruwaykullaway’, nispan. Juezqa unayña justicia ruwayta mana munachkaspanpas sunqullanpim nirqa: ‘Diosta mana manchakuq hinaspa runakunatapas mana respetaq kachkaspaypas, kay viuda hamuspan sapa kuti rabiachiwasqanraykuyá justiciata ruwaykusaq, chaynapi amaña sapa kuti hamupayaspan umayta amaña nanachinanpaq’”, nispa (Lucas 18:2-5).

Hinaspam ima ninan kasqanmanta nirqa: “Chay mana allin ruwaq juezpa nisqantayá umaykichikman churaychik. Sichum chay juez justiciata ruwachkaptinqa, ¿manachu Diosqa tuta-punchaw mañakuq akllasqankunapaq justiciata ruwanqapuni paykunawan pacienciakuchkaspanqa?”, nispa (Lucas 18:6, 7). ¿Imatam chayqa Jehova Diosmanta yachachiwanchik?

Chaynata nispanmi Jesusqa qawachirqa mana allin ruwaq runallapas mañakuqninpaqqa imatapas ruwapusqanta. Chaynaqa aswanraqchiki Jehova Diosqa yupaychaqninkunapa mañakusqankutaqa uyarin. Payqa kuyakuqmi, hinaspapas allin ruwaqmi, chaymi yupaychaqninkunapa achkakama mañakusqankuman hina yanapan. Chay yachachisqan aswan sutilla kananpaqmi Jesusqa nirqa: “Nikichikmi: Diosqa chayllam [...] justiciata ruwanqa”, nispa (Lucas 18:8).

Runakunaqa manam kaqpaqpas hapiqkuchu wakchakunataqa hinaspa chiqnisqa kaqkunataqa, apukunatawan riqsisqa kaqkunatam ichaqa allinpaq hapiqku. Diosmi ichaqa allin ruwaq kaspan tanteasqan punchawpi mana allin ruwaqkunataqa chinkachinqa hinaspa allin ruwaqkunamanñataq wiñay kawsayta qunqa.

Chaynaqa, ¿pikunataq chay viuda warmi hina mana iskayrayankuchu Jehova Diosqa paykunapaq ‘justiciata chaylla ruwapunanmanta’? Jesusqa achkakama Jehova Diosta mañakunamantam yachachirqa. Chaywanpas mañakusqanchiktaqa Dios uyariwasqanchikmanta mana iskayrayanamanta rimaspanmi nirqa: “¿Yaqachu runapa churin chayamuspan iñiyniyuq runakunata kay pachapi tarinman?”, nispa (Lucas 18:8). Jesusqa chayamuspanmi maskanqa mañakusqankuta Dios uyarisqanmanta mana iskayrayaq runakunata, ichaqa asllatam tarinqa.

Jesusta uyariq wakin runakunaqa Diospi ancha iñiyniyuq kasqankupaqmi hapikuqku. Llumpay allin ruwaqpaq hapikuspankum wakin runamasinkutaqa chiqniqku.

Chaymi Jesusqa nirqaraq: “Iskay runakunam  temploman rirqaku Diosta mañakuq, hukninmi karqa fariseo hukninñataqmi impuestokuna mañaq. Fariseom sayaykuspan simin ukullapi kaynata mañakurqa: ‘Dioslláy, wakin runakuna hina mana kasqaymantam agradecekuyki, ñuqaqa manam suwakunichu, manam mana allintaqa ruwanichu, manam hukwanqa pierdekunichu, manataqmi kay impuesto mañaq runa hinachu kani, semanapim iskay kutita ayunani, tukuy huñusqaykunamantapas sapa chunkamantam hukninta quni’”, nispa (Lucas 18:10-12).

Fariseokunaqa hukkuna qawanallankupaqmi allin ruwaq tukuqku. Chaymi lunesninpi hinaspa juevesninpi achkallaña runakunapa kasqan plazakunapi ayunanankupaq mana munastinpas tukuyta ruwaqku. Chaymantapas wakin qurakunamantam sapa chunkamanta hukninta Diospaq quqku (Lucas 11:42). Paykunaqa pasaq killakunallapitaqmi wakin runamasinkumanta nirqaku: “Moisespa leynin mana riqsiq kay runakunam ichaqa ñakasqa kanku”, nispa (Juan 7:49).

Jesusqa nirqataqmi: “Impuesto mañaq runañataqmi karuniqpi sayaykuspan hanaq pachata qawariytapas mana munarqachu, hinaspam qasqunta takakuspanraq nirqa: ‘Dioslláy, kay huchasapa runallaykitayá llakipayaykullaway’”, nispa. Chay runam ichaqa pantaqllaña kasqanta riqsikurqa, chaymi Jesus nirqa: “Nikichikmi: Diospa qawasqanman hinaqa kay runam wasinman kutikurqa fariseomantaqa aswan allin qawasqa. Pipas hatunchakuqqariki humillasqam kanqa, pipas humillakuqñataqmi hatunchasqa kanqa”, nispa (Lucas 18:13, 14).

Chaynata willakuspanmi Jesusqa allintapuni yachachirqa mana hatun tukuq kanamanta. Chay yachachisqanqa ancha allinmi karqa qatiqninkunapaqqa hatun tukuqllaña fariseokunapa kasqanpi wiñasqankurayku. Ancha allintaqmi ñuqanchikpaqpas Jesuspa chay yachachisqanqa.