Jésus amû lani awe mbeni tapande na adisciple ti lo ti fa na ala nene ti ngbâ ti sambela (Luc 11:5-13). Fadeso encore, âmanke na ngoi so lo yeke na Samarie wala na Galilée, lo kiri lo fa nene ti ngbâ lakue ti sambela. Lo fa ni na lege ti mbeni tapande.

Lo tene: “Na yâ ti mbeni gbata, mbeni juge ayeke dä so akpe mbeto ti Nzapa pëpe, nga lo ne zo oko ape. Mbeni wali-mua ayeke nga na yâ ti gbata ni so, na lo yeke gue lakue na juge ni, na lo yeke tene na lo: ‘Fâ yâ ti ngbanga so ayeke na popo ti mbi na mba ti mbi so nzoni.’ Teti mbeni ngoi, juge ni aye pëpe, me na pekoni, lo tene na yâ ti bê ti lo, lo tene: ‘Atâa so mbi kpe mbeto ti Nzapa pëpe nga mbi ne zo oko ape, mbi yeke fâ yâ ti ngbanga ti wali-mua so, tongaso si lo zia ti ga lakue ti son li ti mbi.’”—Luc 18:2-5.

Ti fa ye so lo ye ti fa na lege ti tapande ni so, Jésus atene: “Atâa so juge so ayeke zo ti mbilimbili pëpe, ala mä tënë so lo tene so? Biani, Nzapa nga ayeke sara si a fâ ngbanga nzoni na ala so lo soro ala awe so ape? ala so ayeke toto na lo bï na lâ, atâa so lo yeke kanga bê na ala.” (Luc 18:6, 7). Nyen la Jésus aye ti fa na ndo ti Babâ ti lo?

Jésus aye pëpe ti fa so Jéhovah Nzapa ayeke tongana juge so ayeke mbilimbili pëpe so. Lo ye gi ti sara mbeni hakango ye. Lo ye ti fa so, asingana même juge so ayeke mbilimbili pëpe, si akiri tënë na adema so wali-mua so asara na lo fani mingi so, si Nzapa alingbi ti sara mara ni ape? Teti so lo yeke mbilimbili-kue nga lo yeke nzoni, Nzapa ayeke kiri ande tënë na asambela ti awakua ti lo tongana ala zia pëpe lege ti sara ni. E peut ti bâ pensé ni so na yâ ti atënë so Jésus akiri atene: “Mbi tene na ala: [Nzapa ayeke] sara si, hio, a fâ ngbanga nzoni na ala.”—Luc 18:8.

Mingi ni, a yeke sara ka ye na lege ni ape na mbage ti azo so ayeke na ye mingi ape nga na awayere, me na oko ngoi ni, a yeke sara ka ye nzoni na mbage ti azo so ayeke na mosoro. Me, ti Nzapa ayeke tongaso ape. Tongaso, tongana ngoi ni asi ande, lo yeke bâ si zo ti sioni awara ngbanga, me ala so ayeke awakua ti lo ayeke wara fini ti lakue lakue.

Zo wa la ayeke na mara ti mabe tongana ti wali-mua so zo wa? Zo oke la amä na bê biani so Nzapa ayeke “sara si, hio, a fâ ngbanga nzoni na ala”? Na peko ti so Jésus alondo ti fa nene ti ngbâ ti sambela, lo fa nga nene ti duti na mabe tongana e sambela. Lo hunda ndo, lo tene: “Tongana Molenge ti zo aga, lo yeke wara ande mara ti mabe so na ndo ti sese?” (Luc 18:8). Ye so aye ti fa so, na ngoi so Christ ayeke ga ande, a yeke duti ande azo kue la ayeke fa mara ti mabe ni so ape.

Ambeni zo so ayeke mä lani Jésus apensé so ala yeke biani na mabe. Ala pensé ti ala atene ala yeke mbilimbili, atâa so ala yeke bâ amba ti ala tongana ambumbuse zo. A yeke na mara ti azo ni so la Jésus amû mbeni tapande.

Lo tene: “Akoli use amonté na temple ti sambela, oko ayeke Farizien na oko ayeke zo ti rongo nginza ti impôt. Farizien ni aluti na lo to nda ti sambela tongaso na yâ ti bê ti lo: ‘Nzapa, mbi mû singila na mo so mbi yeke tongana tanga ti azo pëpe: azo ti mungo ye ti azo na likisi, azo so ayeke mbilimbili pëpe, azo so ayeke gi awali nde, wala même tongana zo ti rongo nginza ti impôt so. Mbi yeke mû jeûne fani use na yâ ti dimanche oko. Mbi yeke mû dîme ti aye kue so mbi wara.’”—Luc 18:10-12.

A hinga lani aFarizien tongana azo so aye ti fa na lê ti azo so ala la ayeke mbilimbili mingi. Ala sara ni tongaso ti pika na bê ti azo. Ala ye ka lani ti mû jeûne senge senge na alundi nga na ajeudi, so ayeke lani ambeni lango so azo asi yâ ti agara mingi, tongaso si azo mingi abâ ala. Nga, ala ye lani ti mû dîme ti akete kugbe ti kasa kue (Luc 11:42). Na ambeni nze so ahon lani, na yâ ti mbeni tënë ti ala, ala fa so atanga ti azo ayeke ambumbuse zo, ala tene: “Gbâ ti azo so, so ahinga Ndia ape [so ti tene afango ye ti ani aFarizien], ayeke azo so a deba ala awe.”—Jean 7:49.

Jésus akiri atene: “Me zo ti rongo nginza ti impôt ni aluti ti lo yongoro na lo ye même pëpe ti yô lê ti lo na nduzu, me lo yeke pika ndo ti kate ti lo, lo tene: ‘Nzapa, sara grâce na mbi, mbi so mbi yeke wasiokpari.’” Zo ti rongo nginza ti impôt so asara tere ti lo kete na lo yeda na afaute ti lo. Na nda ni, Jésus atene: “Mbi tene na ala: Tongana zo ti rongo nginza ti impôt so akiri na yanga-da ti lo, na lê ti Nzapa, lo yeke mbilimbili ahon Farizien so, ndali ti so zo kue so ayä iri ti lo, a yeke sara si lo ga kete, me zo so a sara tere ti lo kete, a yeke yä iri ti lo.”—Luc 18:13, 14.

Ni la, na lege ti tapande so Jésus afa nene ti sarango tere kete. A yeke lani mbeni pendere wango ndali ti adisciple ti lo, ndali ti so ala kono na ndo so aFarizien, so abâ tere ti ala mbilimbili, aluti mingi na ndo ti tënë ti kota ndo. Wango ni so ayeke nga mbeni pendere wango ndali ti zo kue so aye ti mû peko ti Jésus.