Jesu wakalibaambilide kale basikwiiya bakwe cikozyanyo cijatikizya kupaila cakutaleka. (Luka 11:5-13) Lino weelede kuti uli mu Samariya naa mu Galilaya, alimwi wainduluka kukankaizya mbociyandika kutaleka kupaila. Wacita oobo kwiinda mucikozyanyo cimbi eeci:

“Mumunzi umwi kwakali mubetesi iwatakali kuyoowa Leza nokuba kulemeka muntu. Mumunzi mumonya oomo mwakali amukamufwu ooyo iwakali kuunka kulinguwe lyoonse akwaamba kuti, ‘Ukabone kuti akosolwa cabululami makani ngendijisi asitwaamboma.’ Kwaciindi cili mbocibede mubetesi wakali kukaka, pele kumbele wakalyaambauzya wati, ‘Nokuba kuti tandimuyoowi Leza naa kulemeka muntu uuli woonse, akaambo kakuti mukamufwu ooyu wazumanana kundipenzya, ndilamukosweda cabululami makani aakwe kutegwa atazumanani kuboola akundikatazya akulomba kwakwe.’”—Luka 18:2-5.

Ikupandulula ciiyo cili mucikozyanyo eeci, Jesu wati: “Amumvwe ncaakaamba mubetesi ooyo nokuba kuti taluleme! Aboobo sena Leza takaboni kuti basale bakwe ibamukwiilila isyikati amasiku bakoswedwa cabululami makani nokuba kuti ulabakkazikila moyo?” (Luka 18:6, 7) Aboobo, ino ncinzi Jesu ncali mukwaamba kujatikizya Bausyi?

Aawa Jesu taambi kuti Jehova Leza uli mbuli mubetesi ooyu uutaluleme pe. Wiindanya buya: Ikuti naba mubetesi uutaluleme waansi aano ulakonzya kumvwa muntu uuzumanana kulomba, nkokuti kakunyina akudooneka Leza uyoocita oobo. Walo uliluleme alimwi mubotu, aboobo uyakuvwiila ikuti bantu bakwe bazumanana kupaila akutaleka. Eeci tulakonzya kucibona mumajwi Jesu ngaayungizya kwaamba aakuti: “Ndimwaambila kuti, [Leza] uyoobona kuti bakoswedwa makani cabululami alimwi cakufwambaana.”—Luka 18:8.

Bunji bwaziindi bantu bapengede alimwi abacete tabacitilwi cabululami, pele bantu balaanguzu alimwi abavwubi mbabacitilwa zibotu. Pele oobo tabusyi mbwacita Leza pe. Caakusika ciindi, uyoobona masimpe kuti babi basubulwa alimwi babelesi bakwe bapegwa buumi butamani.

Ino mbaani balaalusyomo luli mbuli lwamukamufwu? Ino mbangaye basyoma ncobeni kuti Leza “uyoobona kuti bakoswedwa makani cabululami alimwi cakufwambaana”? Jesu wazwa mukupa cikozyanyo citondezya mbociyandika kuzumanana kupaila. Lino caboola kukuba alusyomo lwakuti mupailo ulabeleka, wabuzya kuti: “Mwanaamuntu aakuboola, sena masimpe uyoolujana lusyomo oolu anyika?” (Luka 18:8) Kuboneka kuti eeci caamba kuti mbasyoonto banoojisi lusyomo luli boobu aakusika Kristo.

Bamwi ibamuswiilila Jesu balimvwa kuti lusyomo lwabo nduyumu. Balalisyoma kapati kuti mbalulami, eelyo banyansya bamwi. Jesu waambila bantu bali boobu cikozyanyo eeci:

“Bantu bobilo bakatanta kuunka kuyoopaila mutempele, umwi wakali mu Farisi, umbi wakali simutelo. Imu Farisi wakaimikila akutalika kupaila kuti, ‘O Leza, ndilakulumba kuti tandili mbuli bantu bamwi—ibabbi, bataluleme, basimamambe—naa mbuli simutelo ooyu. Ndilaliimya kulya ziindi zyobilo ansondo; ndilapa cakkumi cazintu zyoonse nzyondijana.’”—Luka 18:10-12.

Ba Farisi balaacilengwa cakutondezya bululami  bwabo mubuleya. Balacita oobo kutegwa bakkomanisye bantu. Bayandisisya kuliimya kulya mumazuba nokuli bantu banji kumisika, mu Muhulo amuli Bwane, kutegwa bababone. Alimwi balabikkila maano kapati kupa cakkumi nociba catusyango tuniini pe. (Luka 11:42) Myezi misyoonto yainda, bakatondezya kutayanda bantu-bantu buyo, mumajwi aakuti: “Nkamu yabantu eeyi iitazyi Mulawo [kweelana ambobazibona zintu ba Farisi] mbantu basinganizyidwe.”—Johane 7:49.

Jesu wazumanana acikozyanyo cakwe, ulaamba: “Pele simutelo, kaimvwi alaale tanaakali kuyanda nokuba kulanga kujulu, pele wakali kwiide kulyuuma acamba kaamba kuti, ‘O Leza, kondeengelela mebo ndesizibi.’” Inzya, simutelo cakulicesya wazumina kuti ngusizibi. Jesu wamanizya amajwi aakuti: “Ndimwaambila kuti, muntu ooyu wakaunka kuŋanda yakwe kabonwa kuti uliluleme kwiinda mu Farisi. Nkaambo kufwumbwa muntu uulisumpula uyoocesyegwa, pele ooyo uulicesya uyoosumpulwa.”—Luka 18:13, 14.

Aboobo Jesu wacisalazya kuti kulicesya kulayandika kapati. Oolu ndulayo lugwasya kuli basikwiiya bakwe, aabo ibakakomenena akati kabantu ibapona aba Farisi ibalibona kululama alimwi ibayandisya zyuuno akuba ampuwo. Alimwi ndulayo lugwasya kapati kuli basikutobela Jesu boonse.