Jesús lichuwinalha akgtum liʼakxilhtit xlakata la xlilakaskinka makglhuwa natlawayaw oración (Lucas 11:5-13). La uku, akxni wi kSamaria o kʼGalilea, lichuwinan atanu liʼakxilhtit xlakata namasiya pi makglhuwa natlawaniyaw oración Dios:

«Kʼakgtum lanka kachikin xwi chatum juez tiku ni xpekuani Dios, chu ni xkamaxki kakni lakchixkuwin. Na xlama kʼama kachikin chatum puskat tiku xninita xchixku, chu chuntiya xlakgmin chu xwani: “Kaʼakxilhti pi kakintlawanika tuku xaʼakgstitum akxni naktalakkaxla kintalatlawana niku lakkaxtlawakan taʼakglhuwit”. Titaxtulh kilhtamaku xla ni makgtayaputulh, pero alistalh lakpuwa: “Maski ni kpekuani Dios, nipara kkamaxki kakni lakchixkuwin, xlakata uma puskat chuntiya kimakglhuwima, nakakxilha pi katlawanika tuku xaʼakgstitum, xlakata nialh namin kilimakglhuwi chu nialhla naktayani”» (Lucas 18:2-5).

Alistalh, Jesús wan tuku kilhchanima: «¡Kakgaxpattit tuku wa juez, maski ni xaʼakgstitum xwanit! Xlikana, ¿pi ni katitlawalh Dios tuku xaʼakgstitum xpalakata tiku kalaksaknit, tiku tasaskinikgo tantaku chu tantaskaka? Dios chuna natlawa maski tasiya pi makgapalama, xlakata xla xakgalhkgalhina» (Lucas 18:6, 7). ¿Tuku kinkamasiyaniyan uma tuku wa Jesús xlakata xTlat?

Jesús ni wamputun pi Jehová xtachuna uma juez tiku ni xaʼakgstitum. Wata maklakaskin uma xlakata namasiya pi komo chatum juez tiku ni xaʼakgstitum tlawa tuku tasaskinimaka, liwaka Dios chuna natlawa. Xla xaʼakgstitum chu tlan likatsi chu nakgalhti xʼoracioneskan kskujnin tiku ankgalhin tachuwinankgo. Jesús liwana masiya uma akxni wan: «Kkawaniyan pi xla tunkun nakatlawani tuku xaʼakgstitum» (Lucas 18:8).

Lakglimaxkgenin chu tiku nitu kgalhikgo, ankgalhin nitlan kalikatsinikan, pero tiku kgalhikgo tumin chu limapakgsin tlan kalikatsinikan. Pero Dios nichuna likatsi. Akxni nachan kilhtamaku, natlawa tuku xaʼakgstitum chu nakamalakgaxokge tiku nitlan likatsikgo chu natlawa pi kskujnin kamakglhtinankgolh latamat nema ni katisputli.

Pero ¿tiku kgalhikgo takanajla chuna la puskat tiku xninita xchixku? ¿La kgalhalit lipawankgo pi Dios «tunkun nakatlawani tuku xaʼakgstitum»? Jesús aku lichuwinalh pi xlakaskinka ankgalhin natlawakan oración. Alistalh wan pi xlilat nakanajlayaw pi oración makgtayanan chu kgalhskininan: «Akxni xKgawasa chixku nachin, ¿xlikana natekgsa uma takanajla kkatiyatni?» (Lucas 18:8). Uma wamputun pi akxni Cristo namin, ni lhuwa tiku chuna nakgalhikgo xtakanajlakan.

Makgapitsi tiku kgaxmatnimakgo Jesús, lakpuwankgo pi tliwakga wi xtakanajlakan. Xaʼakgstitum kamakgkatsikan chu nitlan kaʼakxilhkgo amakgapitsin. Wa xlakata Jesús kalitachuwinan atanu liʼakxilhtit:

«Chatiy lakchixkuwin ankgolh tlawakgo oración ktemplo, chatum fariseo chu achatum xmatajina lilakgaxokgon. Fariseo tayalh chu xwan kxʼoración: “Dios, kpaxtikatsiniyan xlakata akit ni xtachuna la putum amakgapitsin tiku kgalhanankgo, tiku ni xaʼakgstitum, akgskgawikgo tiku tamakgaxtokgkgo chu nipara chuna la uma xmatajina lilakgaxokgon. Akgatunu semana makgtiy kkgalhxtakgnan;  kmasta diezmo xlakata putum tuku kkgalhi”» (Lucas 18:10-12).

Fariseos kalilakgapaskan xlakata limasiyaputunkgo kxlakatin amakgapitsin pi xaʼakgstitum likatsikgo. Chuna tlawakgo xlakata kaks namalakawaninankgo. Xafuerza kgalhxtakgnankgo lunes chu jueves akxni anan lhuwa latamanin kmercado chu chuna tlan nakaʼakxilhkan. Asta mastakgo diezmo xla laktsu tuwan (Lucas 11:42). Nachuna, ni lhuwa papaʼ titaxtunit, limasiyakgolh pi kalakgmakgankgo latamanin akxni wankgolh: «Umakgolh latamanin tiku ni lakgapaskgo Limapakgsin, Dios nitlan kaʼakxilha» (Juan 7:49).

Jesús wampara: «Pero xmatajina lilakgaxokgon, lakgamakgat xya, nipara xtalakayawaputun kʼakgapun wata xkuxmukgaxikan chu xwan: “Dios lu kakilakgalhamanti xlakata akit makglakgalhina”». Xlakata xmatajina lilakgaxokgon taktuju chu wan pi makglakgalhina, Jesús xaʼawatiya wan: «Kkawaniyan: uma chixku tlakg xaʼakgstitum litaxtulh akxni alh kxchik nixawa ama fariseo. Xlakata putum tiku lanka namakgkatsikan namaktujukan, pero tiku nataktuju namalankikan» (Lucas 18:13, 14).

Chuna Jesús limasiya pi kilitaktujutkan. Uma tastakyaw lu nakamakgtaya xtamakgalhtawakgen, xlakata stakkgonit niku fariseos, tiku lu laktlankajwa, xlakaskinka akxilhkgo pi latamanin nakamalankikgo. Pero uma tastakyaw na lu xlakaskinka xpalakata putum xtamakgalhtawakgen Jesús.