Yesu kɛ e kaseli ɔmɛ je Galilea nɛ a po Yordan Pa a, nɛ a gu Perea kɛ yaa dɔ si je. Be ko nɛ Yesu ya Perea a, e tsɔɔ Farisi bi ɔmɛ nɔ́ nɛ Mawu mlaa a de ngɛ gba mi pomi he. (Luka 16:18) Benɛ a na Yesu ɔ, a wo jamɛ a munyu ɔ nɔ ekohu konɛ a kɛ ka lɛ.

Mose ngma kaa ke nyumu ko ngɔ yo nɛ “e na nɔ́ yayami ko ngɛ yo ɔ he” ɔ, e ma nyɛ maa fie lɛ. (5 Mose 24:1) Nihi hɛɛ juɛmi ekpaekpa ngɛ nɔ́ nɛ a ma nyɛ maa da nɔ kɛ po gba mi ɔ he. Ni komɛ susu kaa a ma nyɛ maa da ní nyafinyafi komɛ a nɔ kɛ ngmɛɛ a yihi a he. Enɛ ɔ he ɔ, Farisi bi ɔmɛ bi Yesu ke: “Anɛ wa mlaa a ngmɛɛ blɔ kaa nyumu fieɔ e yo ngɛ nɔ́ tsuaa nɔ́ ko he lo?”​​—Mateo 19:3.

Yesu da we adesahi a susumi nɔ kɛ ha we mɛ heto, mohu ɔ, e gu ga blɔ nɔ nɛ e tsɔɔ mɛ bɔ nɛ Mawu to gba si himi sisi ha. E de mɛ ke: “Anɛ nyɛ kane we ngmami ɔ nɛ deɔ ke sisije ɔ, bɔlɔ ɔ bɔ adesa nyumu kɛ yo lo? Nɛ Mawu de ke, ‘Enɛ ɔ he je ɔ, nyumu ma si e tsɛ ke e nyɛ, nɛ e maa mɛtɛ e yo he, nɛ mɛ ni enyɔ ɔmɛ a ma plɛ pee nɔ kake.’ Lɛɛ a pi nimli enyɔ hu se mohu he lo kake. Lɔ ɔ he ɔ, nɔ́ nɛ Mawu ngɔ tsa a, nɔmlɔ kó gba mi.” (Mateo 19:4-6) Benɛ Mawu ngɔ Hawa kɛ ha Adam kaa e yo ɔ, e de we mɛ ke a ma nyɛ maa po a gba a mi.

Se Farisi bi ɔmɛ kɛ Yesu kpa we gbi nɛ a bi lɛ ke: “Mɛni he je Mose wo mlaa ke nyumu nɛ ha yo fiemi womi nɛ e ngmɛɛ e he mɔ?” (Mateo 19:7) Yesu de mɛ ke: “Mose ha nyɛ he blɔ ke nyɛɛ ngmɛɛ nyɛ yihi a he, ejakaa nyɛ tue wa; pi jã ji sane ɔ kɛ je sisije.” (Mateo 19:8) Benɛ Mawu to gba sisi ngɛ Eden abɔɔ ɔ mi ɔ ji “sisije” nɛ Yesu ngɛ he munyu tue ɔ nɛ, se pi Mose be ɔ mi.

Lɔ ɔ se ɔ, Yesu de mɛ ke: “I ngɛ nyɛ dee ke, nɔ tsuaa nɔ nɛ maa ngmɛɛ e yo he, nɛ pi kaa yo ɔ ya bɔ ajuama [nɛ ji por·neiʹa ngɛ Hela gbi mi], nɛ e ma ya ngɔ yo kpa a, e puɛ gba.” (Mateo 19:9) Ajuama bɔmi pɛ nɛ Ngmami ɔ kplɛɛ nɔ kaa a ma nyɛ maa da nɔ kɛ po gba mi.

Benɛ kaseli ɔmɛ nu nɔ́ nɛ ɔ, a de Yesu ke: “Ke kikɛ nɛ ɔ ji nyumu kɛ e yo sane ɔ, e he hia we kaa nyumu nɛ ngɔ yo mɔ.” (Mateo 19:10) Enɛ ɔ tsɔɔ kaa ke nɔ ko ngɛ hlae nɛ e maa ngɔ yo ɔ, e sa nɛ e hi e juɛmi mi kaa ke e ngɔ yo ɔ, lɛ pɛ nɛ e kɛ maa hi si!

Enɛ ɔ se ɔ, Yesu tsɔɔ kaa nɔ́ he je nɛ ni komɛ ngɔɛ yo ji kaa, ngɛ a bɔ su nya a, a be nyɛe nɛ a kɛ yo ma ná bɔmi. Nyumu komɛ hu ngɛ nɛ a puɛ mɛ, aloo si fɔfɔɛ ko he je ɔ, a be nyɛe nɛ a kɛ yo ma ná bɔmi. Jehanɛ se hu ɔ, ni komɛ ngɛ nɛ a ma nyɛ maa sɛ gba si himi mi, se mɛ nitsɛmɛ nɛ a hla kaa a be gba si himi mi sɛe. A pee jã konɛ a ngɔ a be tsuo kɛ fĩ Matsɛ Yemi ɔ se. Yesu wo nihi nɛ a ngɛ lɛ tue bue ɔ he wami ke: ‘Nɔ nɛ ma nyɛ [maa hi si nɛ e be gba si himi mi sɛe] ɔ, e pee jã.’​​—Mateo 19:12.

Enɛ ɔ se ɔ, ni komɛ ngɔ jokuɛwi kɛ ya Yesu ngɔ. Se kaseli ɔmɛ kuɛ wo ni ɔmɛ ejakaa a sume nɛ a gba Yesu nya. Benɛ Yesu na nɔ́ nɛ kaseli ɔmɛ pee ɔ, e mi mi fu nɛ e de mɛ ke: “Nyɛ ha jokuɛwi ɔmɛ nɛ a ba ye ngɔ; nyɛ ko tsi mɛ blɔ, ejakaa nihi nɛ ngɛ kaa ni nɛ ɔmɛ a nɔ́ ji Mawu matsɛ yemi ɔ nɛ. I ngɛ nyɛ dee anɔkuale mi ke, nɔ tsuaa nɔ nɛ he we Mawu matsɛ yemi ɔ kaa bɔ nɛ jokuɛ nyafii maa pee ɔ, e be mi sɛe kɔkɔɔkɔ.”​​—Marko 10:14, 15; Luka 18:15.

Enɛ ɔ tsɔɔ kaa loko wa ma nyɛ maa sɛ Mawu Matsɛ Yemi ɔ mi ɔ, ja wa he jɔ, nɛ wa ba wa he si kaa jokuɛwi. Ga womi nɛ ɔ sa saminya! Yesu wó jokuɛ ɔmɛ ngɛ e kɔni bɔkɔ mi nɛ e jɔɔ mɛ. Enɛ ɔ tsɔɔ kaa e suɔ jokuɛwi saminya, nɛ e suɔ ‘nɔ tsuaa nɔ nɛ heɔ Mawu Matsɛ Yemi ɔ kaa jokuɛ nyafii ɔ.’​​—Luka 18:17.