Jesusampi discipulonakampejja, Galileat mistusajj Jordán Jawir khurkatar paskatasin Perearuw sarapjjäna. Jesusajj Pereanwa kunatsa maynejj divorciasispa uka toqet fariseonakar nayrajj parläna (Lucas 16:18). Jichhajja, fariseonakajj mayampiw yantʼañataki ukjjat parlapjjäna.

Mä jaqejj warmipan ‘jan wali sarnaqatapat’ divorciasispawa sasaw Moisesajj qellqäna (Deuteronomio 24:1). Kunatsa maynejj divorciasispa uka toqetjja, may maywa parlapjjäna. Amuytʼañataki, yaqhepajj kuna jan wali utjipansa maynejj divorciasikispawa sasaw amuyapjjäna. Ukatwa fariseonakajj Jesusar akham jisktʼapjjäna: “¿Mä jaqejj kun utjipans warmipat divorciasispa ukhajj walikïspati?” sasa (Mateo 19:3).

Jaqenakajj kunsa amuyapjje uk istʼañat sipansa, Diosajj kuna amtampis matrimonior uttʼayäna uka toqetwa Jesusajj parläna. Jupajj sänwa: “¿Janit liytʼapkta? Khititejj qalltatpach jupanakar lurki ukajja, chacha warmi luräna. Jupajj akham sänwa: ‘Ukatwa chachajj awkiparus taykaparus jaytjjani, ukatsti warmipampiw mayachasjjarakini, panipasti mä jañchikëjjapjjaniwa’ sasa. Ukhamasti janiw paninëjjapjjeti, jan ukasti mä jañchikëjjapjjewa. Ukhamajj kuntï Diosajj mä yukur mayachki ukjja, jan khiti jaqes jaljtaypanti” sasa (Mateo 19:4-6). Diosajj Adanampir Evampir panichkäna ukhajja, janiw jaljtañat parlkänti.

Fariseonakatakejj janiw ukajj walïkänti, ukatwa akham sapjjäna: “Ukhamajj ¿kunatsa Moisesajj warmir khitjjañatakejj divorcio papelaw churasiñapa sasin säna?” sasa (Mateo 19:7). Jesusasti sarakïnwa: “Jumanakajj qala chuymanïpjjtawa, ukatwa Moisesajj warmit divorciasiñ toqet ukham arsuwayäna, ukampis qalltanjja janiw ukhamäkänti” sasa (Mateo 19:8). ‘Qalltana’ sasinjja Jesusajj janiw Moisesajj jakkäna uka tiempot parlkänti, jan ukasti Diosajj Edenan matrimonior uttʼaykäna uka tiempotwa parlaskäna.

Ukjjarojj Jesusajj mä cheqa yatichäwitwa parläna, akham sasa: “Nayajj sapjjsmawa, khititejj jan qʼañu jucha utjkipan warmipat divorciaski, ukatsti yaqhampi casaraski ukajja, adulterio juchwa luri” sasa (Mateo 19:9). Bibliarjamajja, maynejj qʼañu jucha utjipanakwa divorciasispa.

Discipulonakajj akham sapjjarakïnwa: “Mä chachatejj warmipamp ukham jakañapächi ukhajja, jukʼamp walïspawa jan casarasiñajja” sasa (Mateo 19:10). Khititï casarasiñ munki ukajja, janiw jaljtañ amtampi casarasiñapäkiti.

Jesusajj solteröñatwa parlarakïna, akham sasa: “Yaqhepajj eunucow nasipjje [mä arunjja, ukham nasipjjatapatjja janiw warminïpkaspati], yaqhepasti jaqenakan eunucoptayatäpjjewa [mä arunjja, jan warminïñapatakiw ukham lurapjje]. Yaqhepajja alajjpachankir Reino laykuw eunucöñ amtapjjaraki [mä arunjja, casarasiñ munkasasa solteröñ amtapjje]” sasa. Jesusajj akham sänwa: “Khitinakatejj ukham sarnaqañ [jan ukajj solteröñ] amtapki ukanakajja, ukham lurasipkakpan” sasa (Mateo 19:12).

Ukatjja jaqenakajj wawanakaparuw Jesusan ukar apanipjjäna. Ukampis discipulonakajj uka jaqenakar toqenoqapjjänwa, inas Jesusar jan colerayapjjañapatak ukham lurapjjchïna. Ukham jarkʼapjjatapatjja Jesusajj colerasïnwa, sarakïnwa: “Uka wawanakajj nayan ukar jutasipkpan, jan jarkʼapjjamti. Khitinakatejj aka wawanakjamäpki ukanakankiw Diosan  Reinopajja. Qhanakwa sapjjsma, janitï maynejj Diosan Reinop mä wawjam katoqki ukajja, janipuniw kunjamatsa ukar mantkaniti” sasa (Marcos 10:14, 15; Lucas 18:15).

¡Ukajj wali wakiskir yatichäwiwa! Diosan Reinopar mantañatakejja, wawanakjam humilde chuymanïñasawa yatichayasiñatakisa yateqañatakis jankʼakïñasawa. Jesusajj munasiñatwa wawanakarojj ichjjartʼäna. Ukhamarakiw ‘Diosan Reinop mä wawjam katoqkapki’ ukanakarojj munasiñampi uñji (Lucas 18:17).