Habazwa mwa Galilea, Jesu ni balutiwa bahae basilela mwabuse bwa Nuka ya Jordani, mi baya kwa mboela ka kuitusisa nzila yefita mwa Perea. Nako yefelile Jesu hanaali mwa Perea, naabulelezi Bafalisi mubonelo wa Mulimu ka za telekano. (Luka 16:18) Cwale hape bamubuza ka za taba yeo kuli bamulike.

Mushe naañozi kuli muuna wakona kuleleka musalaa hae haiba afumana “nto yemaswe” ku yena. (Deuteronoma 24:1) Kunani mibonelo yeshutana-shutana ka za mabaka atahisa telekano. Babañwi baikutwa kuli nihaiba mabaka amanyinyani feela akona kutahisa telekano. Ka mukwa ocwalo, Bafalisi babuza kuli: “Kana kwalumelezwa kuli muuna aleleke musalaa hae ka libaka lifi kamba lifi?”—Mateu 19:3.

Mwa sibaka sa kualaba ka kuya ka mibonelo ya batu, Jesu ka butali ubonisa ka mo Mulimu naalukiselize linyalo. Uli: “Kana hamusika bala kuli yena yana babupile kuzwa kwa makalelo naababupile bali muuna ni musali mi naaize: ‘Ka libaka leo, muuna ukasiya ndatahe ni mahe mi ukakumalela musalaa hae, mi bubeli bwabona bakaba nama iliñwi’? Kabakaleo, mane habasali bababeli, kono sebali nama iliñwi. Hakulicwalo, sakopanyize Mulimu, kusike kwaba ni mutu yasikauhanya.” (Mateu 19:4-6) Mulimu hanaalukisize linyalo la Adama ni Eva, naasika fa mabaka anaakatahisa kuli linyalo labona likone kufela.

Bafalisi babuza Jesu kuli: “Cwale ki kabakalañi Mushe hanaalaezi za kufa musali liñolo la teleko ni kumulukulula?” (Mateu 19:7) Jesu ubabulelela kuli: “Mushe naamilumelelize kuleleka basali bamina kabakala pilu-taata yamina, kono nekusi cwalo kuzwa kwa makalelo.” (Mateu 19:8) “Makalelo” atalusa Jesu fo, nesi mwa linako za Mushe kono neli mwa simu ya Edeni, Mulimu hanaakalisize linyalo.

Jesu kihona abulela taba ya butokwa, ali: “Namibulelela nili, mutu kaufela yaleleka musalaa hae, isiñi ka libaka la muzamao wa buhule [por·neiʹa ka Sigerike], mi anyala usili, wabuka.” (Mateu 19:9) Ka mukwa ocwalo, muzamao wa buhule ki ona feela okona kutahisa telekano ya ka Mañolo.

Habautwa cwalo, balutiwa babulela kuli: “Haiba kona mokuinezi cwalo ku mutu ni musalaa hae, uzibe ki hande kusanyala.” (Mateu 19:10) Kaniti, mutu hanahana za kukena mwa linyalo, uswanela kuziba kuli linyalo liina kuya kuile!

Ka za bukwasha, Jesu utalusa kuli babañwi nebapepilwe basakoni kunyala kamba kuba ni takazo ya somano. Babañwi habakoni kunyala bakeñisa kuli baezizwe cwalo ki batu. Kono babañwi batibela litakazo zabona za manyalo. Baeza cwalo ilikuli bakone kuisa hahulu pilu ku za Mubuso. Jesu ususueza bateelezi bahae kuli: “Yakona kueza cwalo [kuba likwasha] aeze cwalo.”—Mateu 19:12.

Cwale batu bakalisa kutisa bana babona babanyinyani ku Jesu. Kono balutiwa bakalimela batu kuli basike batisa banana ku Jesu, mwendi ka mulelo wa kuli basike bamufilikanya. Habona cwalo, Jesu wafilikana mi uli: “Hamutuhele banana babanyinyani batahe ku na; musike mwalika kubahanisa, kakuli Mubuso wa Mulimu ki wa babacwalo. Kaniti namibulelela nili, mutu kaufela yasaamuheli Mubuso wa Mulimu sina mwanana yomunyinyani haana kukena mwateñi nikamuta.”—Mareka 10:14, 15; Luka 18:15.

Yeo ki tuto yende luli! Kuli luamuhele Mubuso wa Mulimu, luswanela kuba babaishuwa ni babakona kulutiwa, sina mobainezi banana babanyinyani. Jesu cwale ubonisa lilato lahae kwa banana babanyinyani ka kubaswala mwa mazoho ahae ni kubafuyaula. Mi unani lilato lelicwalo kwa batu kaufela babaamuhela “Mubuso wa Mulimu sina mwanana yomunyinyani.”—Luka 18:17.