Ekhumaka o Kalileya, Yesu ni amuhuserya awe annalapuwa Muhice Yortano nave annavira musewe woomoko wo Pereya. Vaavaa Yesu aaphin’yeiye o Pereya, owo aahaaleela Afarisi malakiheryo a Muluku vooloca sa omwalana. (Luka 16:18) Vano awo annakumiherya vaate mwaha yoola wi emweererye.

Mose aahirepa wi mulopwana onaphwanela omwalana ni mwaariye amphwanyerya “etxhu yohimusivela.” (Malamulo 24:1) Sookhalavo miyoonelo soohiyana hiyana sa mathowa aneeriha wi achu emwalane. Akina aneemererya wi sinnaphitaanyeryiwa miyaha mikhaani. Mwawiihiiha Afarisi annakoha: “Ennemmwa wi mulopwana amuhiye mwariye nakhalaru nthowa?”—Mateu 19:3.

Ohiya olekecha ni muupuwelo woomuchu, Yesu onnaloca mwamiruku marehereryo a Muluku ntakhara othela. “Himwalakhannye wi Mpatusa, wopatxeryani, apatunse yawo mulopwana ni muthiyana, ni àlotxa: Tivanto mulopwana onereiye ahiye atithinya ni amannya ni aphitàne ni mwariye, nave oweli awo eni ekhale mutxhu mmoharu. Vano hari eli, nto mutxhu mmoharu. Tiva, yeyo Muluku ophitànnyeiye, mutxhu ahimwalanye.” (Mateu 19:4-6) Vaavaa Muluku aatikithenryeiye othela variyari va Atamu ni Eva, owo haavaherenrye malakiheryo a omaliha othela.

Afarisi annamwaakaaha Yesu, elocaka: “Vano Mose olamuleleni onvaha ekarta yomwalana ni yomurowiha?” (Mateu 19:7) Yesu onnaaleela: “Mose, wa nthowa na oturuwa wanyu murima, t’owemihenreiyeni omwalana ni asarinyu. Nto wopatxeryani hiyari hiha.” (Mateu 19:8) “Wopatxeryani” hiyaari mahiku a Mose; waari vaavaa Muluku aapaceryinheiye othela mu emaca ya Eteni.

Voocharela Yesu onnaloca eparipari yoochuneyaxa: “Vano miyo kinnolèlani wi yole oni amurowihe mwariye, vohiya okhala nthowa na othela wawotha, [mu Ekiriki por·neiʹa] ni amuthelà mukina, yowo onamuraruwa.” (Mateu 19:9) Oraruwa pahiru tari mathipelo a omwalana.

Ela ennaweeriha amuhuserya oloca: “Mukhalelo wa mulopwana ni mwariye wakhalaka wawihiha, ti yaphama ohithela.” (Mateu 19:10) Mwawooneya, muchu yoowo onachuna othela naari otheliwa onaphwanela woona ntoko woowiikhalelaru!

Alocaka sa ociye, Yesu onnathariha wi akina anayariwa oohuliwa naari ohiyara, ahinawerya okumanela. Akina anniihula meekhaaya, wi ehikhaleno nchuno na okumanela. Nave akina anniiphelela munkhela aya wa opuha mukhalelo wa okumanela. Awo aneerano yeeyo wi eteteiwe mmiyaha siniiwanana ni Omwene. Yesu onnaaceenyerya alipa oowiriyana awe: “Yowo anawerya wakhela [ociye] ákhele.”—Mateu 19:12, Nlakano Nahihano.

Vano, achu annapacerya waakeriha anamwane aya wa Yesu. Nto, amuhuserya annaahiiha achu, akhweya echunaka wi Yesu ahuukhuliwe. Va woona yeela Yesu onnatikhiniheya nave onnaloca wa yaawo. “Mwahiye anamwane erweke wa miyano, nave muhahihe ntakhara omwene wa Muluku ti wawaya. Paripari kinnolèlani wi mutxhu ohinakhela omwene wa Muluku ntoko mwana, havolowamo.”—Marko 10:14, 15; Luka 18:15.

Nla nihusiheryo naphaama chiryene! Wi naakhele Omwene wa Muluku nnaphwanela okhala awiiyeviha ni oohusiheya ntoko anamwane.  Vano, Yesu onnooniherya waasivela wawe anamwane moorweela wa waateesa ni waareeliha. Nave owo ookhalano mukhalelo yoola wa osivela wa muchu ti muchu ‘onakhela omwene wa Muluku ntoko mwana.’—Luka 18:17.