Sesusi novalongwa vae, vatunda ko Ngalileya, avayauka Ondongi Solondau iya avaende kokumbili kuekumbi, okukuata mo Peleya. Otyikando tyahulilako Sesusi aile mo Peleya, wapopilile ova Faliseu otyitumino tya Huku konthele yokulihenga. (Luka 16:18) Pahe, ova Faliseu avapopi vali konthele yotyo opo valole Sesusi.

Moisesi wahonekele okuti omukai ankho upondola okuhengwa inkha ulinga “otyipuka tyimwe tyapenga.” (Deuteronômio 24:1) Ovanthu ankho vasoka ovipuka vielikalela konthele yetyi tyilihengesa. Vamwe ankho vasoka okuti alo umwe ovipuka ovitutu vilihengesa. Moluotyo, ova Faliseu avapulu okuti: “Tyitavela omulume okuhenga omukai wae mokonda yotyipuka tyimwe vala?” — Mateusi 19:3.

Sesusi ahapopi onkhalelo ovanthu vasoka, mahi nounongo apopi onkhalelo Huku atala otyinepo. Ati: “Kamunetange okuti una wevetunga, ponthyimbi watunga omulume nomukai, iya ati: ‘Moluotyo, omulume masi-po he na ina, ekeliwaneka nomukai wae, vevali avakala ohitu ike’? Ngotyo, kavakala vali vevali, mahi vakala ohitu ike. Moluotyo, etyi Huku awaneka kumwe omunthu ehetyiyapule.” (Mateusi 19:4-6) Etyi Huku anepesa Andau na Eva, kapopile otyipuka natyike ankho tyipondola okuvehengesa.

Ova Faliseu avapulu Sesusi okuti: “Iya omokonda yatyi Moisesi atumina okuti aavelwe omukanda wokulihenga iya ataatwa?” (Mateusi 19:7) Sesusi evekumbulula ati: “Moisesi wemuyeka muhenge ovakai venyi mokonda muatena omitima, mahi etyi Huku atunga omulume wotete nomukai wotete, ankho hangotyo-ko.” (Mateusi 19:8) Onondaka “omulume wotete nomukai wotete” kambupopi pononthiki mba Moisesi, mbupopia omuvo Huku ahinda otyinepo mo Endene.

Konyima, Sesusi apopi otyili tyakolela, ati: “Ame ndyimupopila okuti una uhenga omukai wae uhalingile ouhayo wotyihola [mo Geleku, porneia], akanepa omukuavo ulinga oumbalehi.” (Mateusi 19:9) Ovihonekwa vipopia okuti oumbalehi oo vala ulihengesa.

Otyo atyilundu ovalongwa okupopia okuti: “Inkha omulume una okutualako okukala nomukai wae, muaina hahe vali okuhanepe.” (Mateusi 19:10) Tyayandyuluka nawa okuti omunthu usoka okunepa wesukisa okunoñgonoka okuti otyinepo tyitualako apeho!

Konthele yokukala tyihanepe, Sesusi ahangununa okuti vamwe vatyitwa tyalemana, mokonda yotyo vetupu ehando liokunepa. Ovakuavo valemanekwa novanthu, iya navo vetupu ehando olio. Mahi vamwe namphila vena ehando liokunepa, kavanepe. Valinga ngotyo opo vetyivile vali nawa okupaka pomphangu yotete ovilinga Viouhamba wa Huku. Sesusi aavela ondundo ovateheleli vae, ati: “Una utyivila okukala tyihanepele, akale ngotyo.” — Mateusi 19:12.

Pahe, ovanthu avahimbika okuetela Sesusi ovana vavo. Mahi ovalongwa avevetyilika, tyafuile ankho vahanda vahatyopole Sesusi. Etyi Sesusi etyimona, anumana evepopila okuti: “Yekei ovana veye ku ame. Muhevetyilikei, mokonda Ouhamba wa Huku owa vana vekahi ngovana. Tyotyili ame ndyimupopila okuti, olie uhatambula Ouhamba wa Huku ngomona, kamakanyingila-mo.” — Maluku 10:14, 15; Luka 18:15.

Onondonga ombo onongwa unene ngatyi! Opo tukanyingile Mouhamba wa Huku, tuna okuliola omutima nokutavela okulongeswa, ngovana ovatutu. Sesusi alekesa ohole ankho ena novana mokuevekuata, evepake pekolo iya evekanena nawa. Iya tupu Sesusi ukala nohole onene ngoyo na vana ‘vatambula Ouhamba wa Huku ngovana.’— Luka 18:17.