Manlapud Galilea, binaliw nen Jesus tan saray disipulo to so Ilog Jordan tan dinmalan irad bandad abalaten, diad Perea. Diad samay unor ya inyakar nen Jesus ed Perea, imbaga tod saray Fariseo so prinsipyo na Dios nipaakar ed diborsyo. (Lucas 16:18) Natan et inusar da itan a tema pian suboken si Jesus.

Insulat nen Moises a nayarin idiborsyo so sakey a bii no walay nalmoan a “mabanday” ed sikato. (Deuteronomio 24:1) Nanduruma so opinyon nipaakar ed basiyan na diborsyo. Panisiaan na arum ya anggan saray angkekelag ya isyu et kaibad saya. Kanian intepet na saray Fariseo: “Kasin manepeg ya idiborsyo na sakey a laki so asawa to ed anggan anton sengegan?”​—Mateo 19:3.

Imbes a mandepende ed opinyon na too, marundunong a tinukoy nen Jesus so uksoyan na Dios nipaakar ed panangasawa. “Agyo ta abasa a samay amalsa ed sikara diad gapo et ginawa to ran laki tan bii tan inkuan to: ‘Lapud saya et taynan na laki so ama tan ina to tan iyamong toy asawa to, tan sikaran dua et magmaliw a sakey a laman’? Kanian aliwa la ran duara, noagta sakey a laman. Sirin, say impankasakey na Dios et agnepeg a pansianen na too.” (Mateo 19:4-6) Sanen inggapo na Dios so panangasawa ed panamegley nen Adan tan Eva, anggapoy ginawa ton totontonen parad pansian da.

Kinuestion na saray Fariseo si Jesus, ya inkuan dan: “Akin balet et ingganggan nen Moises so pangiter na kasulatan na pangidiborsyo tan pamataynan ed asawan bii?” (Mateo 19:7) Imbaga nen Jesus ed sikara: “Lapud inkaawet na puso yo, inmabuloy si Moises ya idiborsyo yoy kaasawaan yo, balet ta diad gapo et aliwan ontan so kipapasen.” (Mateo 19:8) Satan a “gapo” et aliwan diad panaon nen Moises; satan et sanen inggapo na Dios so panangasawa diad Eden.

Imbaga nen Jesus iyan importantin katuaan: “Ibagak ed sikayo a siopaman a lakin mangidiborsyo ed asawa to, ya aliwan makasengeg ed seksual ya imoralidad [Griego, porneia], insan mangasawa na sananey et mankasalanan na pikakalugoran.” (Mateo 19:9) Kanian say seksual ya imoralidad labat sirin so Makasulatan a basiyan parad diborsyo.

Inkuan na saray disipulo: “No ontan so kipapasen na laki tan say asawa to, aliwan maabig sirin so mangasawa.” (Mateo 19:10) Malinew a samay mannononot a mangasawa odino miasawa et nepeg ton ipasen a permanente iya!

Nipaakar ed saray andian na asawa, impaliwawa nen Jesus a wala ray niyanak ya eunoko, ya agda nayariay mangasawa. Say arum et pinagmaliw ya eunoko kanian naandi lay pilalek dad sekso. Say arum balet et pupugeran day pilalek dad sekso. Ginawa ra itan pian mas makapanpokus irad Panarian. “Siopaman a makayarin manggawa ed saya [say pansiansian andiay asawa], gawaen to iya,” so impaseseg nen Jesus ed saray ondedengel ed sikato.​—Mateo 19:12.

Inawit natan na saray totoo ed si Jesus iray angkelag ya ananak da. Balet binano na saray disipulo to iray totoo, nayarin lapud agda labay a naisturbo si Jesus. Sanen anengneng itan nen Jesus, agto agustoan, kanian inkuan tod sikara: “Paulyan yo ray ugugaw ya onasingger ed siak. Agyo ra aamperen, ta singa sarayan ugugaw so akankayarian na Panarian na Dios. Ibagak ed sikayoy tua, siopaman ya agmangawat ed Panarian na Dios a singa sakey ya ugaw et agbalot makaloob ditan.”​—Marcos 10:14, 15; Lucas 18:15.

Agaylan abig a leksion! Pian naawat tayo so Panarian na Dios, nepeg a magmaliw tayon mapaabeba tan mainomay ya ibangat a singa saray ugugaw. Impanengneng nen Jesus so panangaro tod saray ugugaw sanen nilalakap tan benendisyonan to ra. Tan inaro to so amin ya ‘mangawat ed Panarian na Dios a singa sakey ya ugaw.’​—Lucas 18:17.