Yesu kumue lolondonge viaye, va tunda vo Galilea, va yoka Olui Yordão kuenje va enda kombuelo yo Perea. Eci Yesu a kala ko Perea onjanja ya sulako, wa sapuila va Fariseo onumbi ya Suku yatiamẽla koku linyala. (Luka 16:18) Cilo, ovo va tukula ondaka yaco oco va nyike Yesu.

Mose wa soneha okuti, ca tavele oku linyala lukãi umue nda kokuaye kua sangiwa “cimue ka ca sungulukile.” (Esinumuĩlo 24:1) Kuli ovisimĩlo via litepa kueci ci koka oku linyala. Vamue va tava okuti mua kongela ovina vimue ka vi kuete esilivilo lialua. Omo liaco, va Fariseo va pula vati: “Ca sunguluka ulume oku nyala ukãi waye omo liovina viaño?”—Mateo 19:3.

Yesu ka tukula ovisimĩlo viomanu, pole, o lombolola ocisimĩlo ca Suku catiamẽla kolohuela, poku popia hati: “Ka wa tangeli hẽ okuti una wa va lulika tunde kefetikilo wa va lulika ulume lukãi, kuenda hati: ‘Omo liaco, ulume o sia isiaye la inaye, o likakatela kukãi waye kuenje kavali kavo va linga etimba limuamue’? Ovo ka va lingi vali vavali, pole, va linga etimba limuamue. Omo liaco, ca tokekisa Suku, lomue ka ka ci tepe.” (Mateo 19:4-6) Suku poku kuelisa Adama la Eva, ka kongelelemo eliangiliyo lioku linyala.

Va Fariseo ka va tava kocisimĩlo ca Yesu kuenje va popia vati: “Momo lie Mose a handelekela oku eca ukanda woku litepa kuenda woku nyala ukãi?” (Mateo 19:7) Yesu o va sapuila hati: “Omo lioku tĩlisa ovitima viene, Mose wa ecelela okuti vu linyala lakãi vene, pole, haicoko ca kala tunde kefetikilo.” (Mateo 19:8) Ondaka “tunde kefetikilo,” ka yi tiamisiwila koloneke via Mose, pole, yi tiamisiwila kotembo Suku a sovola olohuela vocumbo Cedene.

Noke Yesu o tukula ocili cimue ci kuete esilivilo lialua, poku popia hati: “Ndu sapuili siti, wosi o nyala ukãi waye okuti halevĩhoko liukahonga [Kelimi lio Helasi porneia] kuenje o kuela ukuavo, o linga ukahokolo.” (Mateo 19:9) Omo liaco, evĩho liukahonga olio lika esunga lia lomboluiwa Vovisonehua okuti liecelela oku linyala.

Olondonge vi vetiyiwa oku popia okuti: “Nda eci oco ocitangi culume lukãi waye, hĩse okuti omunu ka ka kuele.” (Mateo 19:10) Omo liaco, omunu o yongola oku kuela o sukila oku tenda olohuela okuti, ocina cimue cenda hũ!

Catiamẽla koku kala omunu ka kuelele, Yesu o lombolola okuti vamue va citiwa okuti va vetiwa kuenje ka va kuata oloñeyi vioku lipekela. Vakuavo va vetiwa lomanu okuti, ka va pondola oku kuata oloñeyi vioku lipekela. Handi kuli vana okuti va nõlapo oku likandangiya koloñeyi kuenje ka va kuela. Ovo va ci lingila omo lioku tiamisila utima kupange Wusoma. Yesu o vetiya olonjeveleli viaye hati: “U o yongola oku kala ndoco, [okuti ka kuela] a ci linge.”—Mateo 19:12.

Omanu va fetika oku nena omãla vavo ku Yesu. Pole, olondonge vi lemela omanu, loku va tiula oco ka va ka tateke Yesu. Poku ci mola, Yesu o tema kuenje o popia hati: “Omãla va kale, ko ka va tateki oku iya kokuange; momo Usoma wa Suku wa tiamẽla komãla ava. Ocili, ndu sapuili siti, wosi ka tambula Usoma wa Suku ndomãla ava, ka ka iñilamo.”—Marko 10:14, 15; Luka 18:15.

Ulandu waco uwa calua! Oco tu iñile Vusoma wa Suku, tu sukila oku kala ambombe loku lekisa onjongole yoku lilongisa ndomãla. Omo liaco, Yesu o lekisa okuti o sole omãla vatito poku va angata loku va sumũlũisa. Eye o lekisa ocisola cocili komanu vosi va “tambula Usoma wa Suku ndomãla.”​—Luka 18:17.