Tikang ha Galilea, hi Jesus ngan an iya mga disipulo tinabok ha Salog Jordan ngan nagtipakadto ha Perea ha sur. Han nakadto hi Jesus ha Perea, iya iginsumat ha mga Pariseo an suruklan han Dios ha pagdiborsyo. (Lucas 16:18) Yana, iginbangon nira ito nga isyu basi sarihan hi Jesus.

Iginsurat ni Moises nga mahimo idiborsyo an usa nga babaye kon may ‘naagian nga bagay nga diri angay’ ha iya. (Deuteronomio 24:1) Iba-iba an opinyon kon ano an mga hinungdan ha pagdiborsyo. An iba naghuhunahuna nga upod hito bisan an gudtiay nga isyu. Salit an mga Pariseo nagpakiana: “Igintutugot ba han balaud nga idiborsyo han usa nga lalaki an iya asawa tungod han bisan ano nga hinungdan?”—Mateo 19:3.

Imbes nga igbasar an iya baton ha opinyon han tawo, may kaabtik nga gin-unabi ni Jesus an kahikayan han Dios ha pag-asawa. “Waray ba niyo mabasa nga hiya nga naghimo ha ira ha tinikangan ginhimo hira nga lalaki ngan babaye ngan nagsiring: ‘Tungod hini, babayaan han lalaki an iya tatay ngan an iya nanay ngan magpapadayon nga kaupod han iya asawa, ngan hira nga duha magigin usa nga unod’? Salit diri na hira duha kondi usa na la nga unod. Kon sugad, an gintampo han Dios diri pagbulagon han tawo.” (Mateo 19:4-6) Han ginhikay han Dios an pag-asawa nira Adan ngan Eva, waray hiya maghatag hin probisyon ha pagtapos han ira pag-asawa.

An mga Pariseo nagbangon hin isyu kan Jesus. Hira nagsiring: “Kay ano man nga nagsugo hi Moises nga an bana sadang maghatag hin kasuratan ha pagdiborsyo basi bulagan an iya asawa?” (Mateo 19:7) Hi Jesus binaton: “Tungod ha katig-a han iyo kasingkasing gintugotan kamo ni Moises nga idiborsyo an iyo asawa, kondi diri sugad hito ha tinikangan.” (Mateo 19:8) Ito nga “tinikangan” diri an panahon ni Moises; ito an panahon han gintikangan han Dios an kahikayan ha pag-asawa didto ha Eden.

Katapos nagsaysay hi Jesus hin importante nga kamatuoran: “Susumatan ko kamo nga an bisan hin-o nga makigdiborsyo ha iya asawa ngan mag-asawa hin iba nag-aadulteryo [ha Griego, por·neiʹa], labot la kon an iya asawa nagbuhat hin imoralidad.” (Mateo 19:9) Salit an seksuwal nga imoralidad la an Kasuratanhon nga rason ha pagdiborsyo.

Tungod hito, an mga disipulo nagsiring: “Kon sugad hito an pag-asawa, mas maopay nga diri na la mag-asawa.” (Mateo 19:10) Matin-aw nga sadang hunahunaon han usa nga nagpaplano pag-asawa nga permanente an pag-asawa!

May kalabotan ha pagin solo, iginsaysay ni Jesus nga an iba igin-anak nga yunuko, kay waray hira kapas nga mag-asawa. An iba ginhimo nga yunuko, salit waray hira kapas ha pakighilawas. Pero, an iba nagpugong han ira hingyap nga magkaada seksuwal nga relasyon basi mas makapokus ha mga buruhaton may kalabotan ha Ginhadian. Ginsagda ni Jesus an iya mga mamarati: “Kon mahihimo han usa nga magin [solo], maopay ito.”—Mateo 19:12.

Yana, gindara han mga tawo an ira gudtiay nga kabataan ngadto kan Jesus. Pero gin-isgan han mga disipulo an mga tawo, kay bangin diri nira karuyag nga madisturbo hi Jesus. Pakakita hini ni Jesus, nasina hiya ngan ginsidngan hira: “Pabay-i an kabataan nga kumadi ha akon; ayaw hira pagdid-i, kay an Ginhadian han Dios para ha mga sugad ha ira. Ha pagkamatuod susumatan ko kamo: Bisan hin-o nga diri kumarawat han Ginhadian han Dios sugad han pagkarawat han usa nga bata, diri gud makakasulod hito.”—Marcos 10:14, 15; Lucas 18:15.

Maopay gud ito nga leksyon! Basi makasulod ha Ginhadian han Dios, kinahanglan kita magin maaghop ngan masayon tutdoan pariho han gudtiay nga kabataan. Katapos, ginkugos ngan ginbendisyonan hira ni Jesus basi ipakita nga hinigugma niya hira. Ngan hinigugma liwat niya an ngatanan nga ‘nakarawat han Ginhadian han Dios sugad han pagkarawat han usa nga bata.’—Lucas 18:17.