KAPITE 95
Ko He ʼu Ako ʼo ʼUhiga Mo Te Mavete Pea Mo Te ʼOfa Ki Te ʼu Tamaliki
MATEO 19:1-15 MALEKO 10:1-16 LUKA 18:15-17
-
ʼE FAKAHA E SESU IA TE MANATU ʼA TE ʼATUA ʼO ʼUHIGA MO TE MAVETE
-
TE FEALAGIA ʼO TE NOFO SELIPATEA
-
ʼE TONU KE TOU HAGE KO HE ʼU KIʼI TAMALIKI
Neʼe ʼomai ia Sesu mo ʼana tisipulo mai Kalilea ʼo natou fakalaka ʼi te Vai Tafe ʼo Solotane. Neʼe natou toʼo leva te ala ʼae ʼe alu ki te potu saute pea natou fakalaka ʼi Pele. ʼI te alu fakamuli ʼa Sesu ki Pele, neʼe ina fakaha age ki te kau Faliseo te lao ʼa te ʼAtua ʼo ʼuhiga mo te mavete. (Luka 16:18) Pea neʼe natou toe lagaʼi te faʼahi ʼaia moʼo ʼahiʼahiʼi ia Sesu.
Neʼe tohi e Moisese neʼe feala ke mavete he tagata mo tona ʼohoana mo kapau neʼe ina maʼu ʼi tona ʼohoana “he mea fakaufiufi.” (Tetelonome 24:1) Neʼe kehekehe te ʼu manatu ʼo ʼuhiga mo te ʼu tupuʼaga ʼae neʼe fakagafua ai ke mavete he taumatuʼa. Neʼe manatu ʼihi neʼe kau ki ai he ʼu faʼahi neʼe mole faʼa maʼuhiga. Koia neʼe fehuʼi fenei e te kau Faliseo: “ ʼE gafua koa ʼi te lao ki he tagata ke mavete mo tona ʼohoana ʼi he faʼahiga meʼa pe?”—Mateo 19:3.
Neʼe mole tali age e Sesu ʼo ina fakaha age he manatu fakatagata, kaʼe ʼaki he poto lahi, neʼe talanoa ia ki te fakatuʼutuʼu ʼa te ʼAtua ʼo ʼuhiga mo te ʼohoana. Neʼe ina ui fenei: “Neʼe heʼeki kotou lau koa la, ko ia ʼae neʼe ina fakatupu naua ʼi te kamata, tagata mo fafine, neʼe ina ui fenei: ‘Koia, ʼe mavae anai te tagata mai tana tamai pea mo tana faʼe pea ʼe pipiki anai ki tona ʼohoana, ʼo nā liliu ai ko he kakano ʼe tahi’? ʼE mole kei nā toko lua, kaʼe kua nā liliu ko he kakano ʼe tahi. Koia, ko te meʼa ʼae neʼe fakatahiʼi e te ʼAtua, ke ʼaua naʼa veteki e te tagata.” (Mateo 19:4-6) ʼI te fakatapuʼi e te ʼAtua ia Atama mo Eva, neʼe mole ina fakaha age he tupuʼaga neʼe feala ai hanā mavete.
Neʼe fakafifihi te kau Faliseo ki te ʼu palalau ʼa Sesu, ʼo natou ui fenei: “Pea he koʼe neʼe fakatotonu e Moisese ke foaki e te tagata ki tona ʼohoana he tohi mavete pea mo ina fakamavae?” (Mateo 19:7) Neʼe tali fenei age e Sesu: “Neʼe fakagafua atu e Moisese ke kotou mavete mo ʼokotou ʼohoana ʼuhi ko te fefeka ʼo ʼokotou loto, kaʼe neʼe mole feia ʼi te kamata.” (Mateo 19:8) Ko te “kamata” ʼae neʼe talanoa ki ai ia Sesu, neʼe mole fakaʼuhiga ki te temi ʼo Moisese, kaʼe ki te temi ʼae neʼe fakatuʼu ai e te ʼAtua te ʼohoana ʼi Eteni.
Pea neʼe fakaha leva e Sesu te moʼoni maʼuhiga ʼaeni: “ ʼE au tala atu kia koutou, kapau ʼe mavete he tagata mo tona ʼohoana kaʼe neʼe mole fai e te fafine he ʼu felaveʼi fakasino heʼe ʼaoga [ʼi te Fakakeleka, pornéïa], ʼe tono anai mo kapau ʼe toe ʼohoana.” (Mateo 19:9) Koia, ʼi te Tohi-Tapu, ko te tupuʼaga pe ʼe tahi ʼe feala ai ke mavete he taumatuʼa, mo kapau neʼe fai e he tahi ia naua he ʼu felaveʼi fakasino heʼe ʼaoga.
ʼI te logo ʼa te ʼu tisipulo ki te ʼu palalau ʼaia, neʼe natou ui fenei ai: “Kapau ʼe ko te aluʼaga ʼaia ʼo te tagata mo tona ʼohoana, pea ʼe lelei age pe ia te mole ʼohoana.” (Mateo 19:10) ʼE ha lelei ai, ko he tahi ʼe fia ʼohoana ʼe tonu ke mahino kia ia ʼe ʼohoana anai ʼo talu ai.
ʼO ʼuhiga mo te nofo selipatea, neʼe fakamahino e Sesu ko ʼihi neʼe tutupu enuke ake, ko tona fakaʼuhiga ʼe mole feala ke natou fakahoko te nofoʼaga fakataumatuʼa, ʼae ko te ʼu felaveʼi fakasino. Pea ko ʼihi neʼe fakaliliu natou ʼo enuke, ko tona fakaʼuhiga neʼe toʼo ʼonatou koga tapu. Kaʼe ko ʼihi leva neʼe natou lolomi ʼonatou holi ki te ʼu felaveʼi fakasino. Neʼe natou fai te faʼahi ʼaia ke feala hanatou tokakaga lahi age ki te ʼu gaue ʼo te Puleʼaga ʼo te ʼAtua. Neʼe uga fenei e Sesu ia natou ʼae neʼe fagono kia te ia: “Ko ʼae ʼe feala ke ina tali te aluʼaga ʼaia [ke nofo selipatea], ke ina tali.”—Mateo 19:12.
Neʼe kamata ʼaumai leva e te hahaʼi ʼanatou kiʼi tamaliki kia Sesu. Kaʼe neʼe munaʼi e te ʼu tisipulo ia te hahaʼi, he neʼe mole lagi natou loto ke natou fakahohaʼa kia Sesu. ʼI te sio ki ai ʼa Sesu, neʼe ita pea neʼe ina ui fenei ki ʼana tisipulo: “Kotou tuku te ʼu kiʼi tamaliki ke ʼomai kia te au, pea ʼaua naʼa kotou taʼofi natou, koteʼuhi ko natou ʼae ʼe hage ko te ʼu kiʼi tamaliki ʼaeni ʼe ʼa natou anai ia te Puleʼaga ʼo te ʼAtua. ʼE au tala moʼoni atu kia koutou, ko ʼae ʼe mole ina tali te Puleʼaga ʼo te ʼAtua ohage ko he kiʼi tamasiʼi, ʼe mole hu anai ia ki ai.”—Maleko 10:14, 15; Luka 18:15.
ʼE feala ke tou taʼofi ai te ako maʼuhiga ʼaeni: Ke tou tali ia te Puleʼaga ʼo te ʼAtua, ʼe tonu ke tou hage ko he ʼu kiʼi tamaliki, ke tou agavaivai pea tou lotolelei ke akoʼi tatou. Neʼe fakaha leva e Sesu tana ʼofa ki te ʼu kiʼi tamaliki, ʼaki tana faʼufua kia natou pea mo tapuakiʼi natou. Pea ʼe fena la tana ʼofa kia natou fuli ʼae ʼe natou “tali te Puleʼaga ʼo te ʼAtua ohage ko he kiʼi tamasiʼi.”—Luka 18:17.