Nlelo Yesu ori va mukwahani aviraka o Pereya ayaaka o Yerusalemu. Mmiravo ooreela onnamuchimakela Yesu nave onnakokhora vamiithoni vawe . Mulopwana owo ti “mutokwene mmoha [a alamuleli],” akhweya owo anarumeela ntoko mutokweene a sinakooka naari ntoko mmoha a nikhuuru no Sineetriyu. Owo onnaamwiichana yesu ariki, “Muhusiha aphama” nave onnakoha: “Kereni wi kikhale ni ekumi yohimala?”—Luka 8:41; 18:18; 24:20.

Yesu onnamwaakhula: “Onakikoheryani wa eri yaphama? Aphama ti Muluku pahi.” Enooneya wi mmiravo ola onapharihela masu awi “aphama” ntoko ncicimiho, nenlo ahusiha anapharihelaaya. Naamwi Yesu ari muhusiha aphaama, onnamweeriha mulopwana ola osuwela wi ncicimiho nawi “Aphama,” nnamphwanela pahiru Muluku.

Yesu onnamulopola owo ariki: “Nto, wakhwelaka ovolowa wekumini, otxhariheke malamulo.” Mwawiihiiha mmiravo onnakoha: “Tavi?” Yesu onnaloca malamulo mathanu a malamulo khumi vooloca sa wiipha, oraruwa, ohikhala namoona awootha ni waacicimiha asitiithi. Voocharela onnaaceererya nlamulo noochuneyaxa: “Omukhweleke, mukhwa à ntoko weyo onikhwelawe.”—Mateu 19:17-19.

Mmiravo onnaakhula: “Sothesene seiho kòtxhariha opatxerya kiyenve. Vano ekihanle ti seni?” (Mateu 19:20) Owo onoona wi ennamuhalela weera echu ekina yaphaama yootikhiniha, yeeyo enahaala omweemereryiha waakhela ekumi yoohimala. Vaavaa oniiwexexeiye yooveka ya mulopwana ola yoovinyerya vathi va murima, Yesu ‘onnanweha nusivela.’ (Marko 10:21) Nyenya, mulopwana ola ookhalano nikacamiho variyari vawe.

Mulopwana ootikitheryeya ni muhakhu awe, mwawiihiiha yesu onnaloca: “Yòhala etxhu emoha wa weyano: Hawè, wakulihe itxhu sà sothene. Yeyo onerawe ophwanye wavahe alipa òhawa,  ni wera hiha onamukhalano muhakhu wirimu. Vaholo vaya orwe ni okitxhareke.” Aai mulopwana ola onaphwanela waakawela alipa oohaawa muhakhu awe, yaawo eni ehimukookiherye echu, nave akhale muhuserya a Yesu. Nto amoriwaka ikharari, Yesu onnamoona mulopwana ola avinyaka ni apwaha ari oohica ene. Okhwelaxa “muhakhu awe” woomwiilini, onnamweeriha mulopwana ola oyeleela muhakhu weeparipari. (Marko 10:21, 22) Yesu onnaloca: “Ti yovila wi mutxhu òrèla avolowe mwa omwene wa Muluku.”—Luka 18:24.

Amuhuserya annatikhiniheya ni masu yaala nave ni yeeyo Yesu onaloceiye voocharela: “Eparipari eri yokhweyasa wi ekamelo evolowe vamwitheni va sikano, vawi mutxhu òrèla avolowe mwa omwene wa Muluku.” Ela ennaweeriha amuhuserya okoha: “Vano tani onawerya ovuluwa?” Apwanne ovulusiwa ti woovila ophiyerya wi muchu ahiwerye ophwanya? Yesu onnaaweha yaawo nave onnawaakhula: “Wa mutxhu eyo henawereya, nto Muluku onnawerya sothene.”—Luka 18:25-27.

Petro onnaloca wi awo aapaka yoothanla yoohiyana ni ya mulipa muhakhu alocaka: “Hiyano nohiya sothene ni nihotxhara, nnaya wakhelani?” Yesu onnathariha yookhumelela ya yoothanla aya yoophwanelela: “Eparipari miyo kinnolèlani nyuwo mukitxhanre, nihiku norèrihiwa elapo. Mwana a mutxhu akirathi vomweneni vawe wovuwa, nyuwotho munamukirathi vehitxeni wi muthoriheke mahimo khumi na pili a Isarayele.”—Mateu 19:27, 28.

Mwawooneya Yesu onuupuwela elukuluku yoomwaahiyu ntakhara elapo yavathi, vaava eneeraaya ekookele okhalano mikhalelo seiho saari mu emaca ya Eteni. Petro vamoha ni amuhuserya akina anahaala waakhelihiwa nchuwelo moorweela wa omulamulela Parataiso veelaponi yavathi ni Yesu, nlivelo neeparipari ni noophwanelela nnahiyana ni wiilipiserya vyakala apankaaya!

Mwawiihiiha nlivelo tahi pahiru noomwaahiyu. Arummwa awe annalawiha hiihaano. “Havo ohin’ye empa, mwara, asinna, atithi, anamwane, wa nthowa na omwene wa Muluku,” Yesu onnatitelela: “ahirwe akhele vopwahasa mwa elukuluku yela, ni omwahiyu ekumi yohimala.”—Luka 18:29, 30.

Aai mapuro oothene amuhuserya awe anayaayawo, anahaala opuha onna wa elapo yoothene vamoha ni alapeli akhwaaya yaawo ari awaacameleya ni oochuneyaxa opwaha opuha emusi vyakala yoomwiilini. Moothananiha, ti yawooneya wi mmiravo ooreela ole onamuyeleela mareeliho yaala ni nlivelo na okumi mu Omwene wa Muluku wawirimu.

Yesu onnaaceererya: “Wona wi antxipale òmaliha anamukhala òpatxerya, nave antxipale òpatxerya anamukhala òmaliha.” (Mateu 19:30) Tiheeni onasipheleiye?

Mulamuleli yoola ooreela ori variyari va “òpatxerya” onakhala variyari va ahooleli a Ayuta. Ntoko muchu onakhapelela malamulo a Muluku, owo onnooniherya soororomeliha sincipale nave sinnaweheryiwa sincipale wa yene. Nave owo onahooliha muhakhu ni ichu oreiyeno mu okumi awe. Moohiyana, achu awunlaana anamoona Yesu ahusihaka eparipari ni ephiro ya wuukumini. Nnanwerya oloca wi awo ari “òmaliha,” nyenya awo anamurwa ekhale “òpatxerya.” Awo ananwehererya okilaathi vamunyukhuni wirimu vamoha ni Yesu nave elamulele elapo yavathi mu Parataiso.