O loo faaauau pea le faigāmalaga a Iesu i totonu o Perea e agaʻi atu i Ierusalema. Ua tamoʻe atu se alii talavou iā te ia ma faapaʻū i ona vae. O ia o ʻse tasi o alii pule,’ atonu o se pule o se sunako po o se sui o le Saniterini. Ua fesili atu o ia iā Iesu: “Le Aʻoaʻo lelei e, o ā ni mea e tatau ona ou faia ina ia ou maua ai le ola e faavavau?”—Luka 8:41; 18:18; 24:20.

Ua tali ane Iesu: “Aiseā ua e taʻua ai aʻu e lelei? E leai se tasi e lelei ua na o le toʻatasi, o le Atua lea.” (Luka 18:19) E foliga mai o loo faaaogā e le alii talavou le upu “lelei” e pei o se faalupega, lea e masani ona ave i le ʻau rapi. E ui lava e lelei le aʻoaʻo a Iesu, ae ua ia faailoa atu i lenei alii talavou, e na o le Atua e tatau i ai le taʻu “Lelei.”

Ua fetalai atu Iesu: “O lea afai e te fia maua le ola, ia e toʻaga e tausi tulafono.” Ua fesili mai le alii talavou: “O lē fea tulafono?” Ua taʻua e Iesu poloaʻiga e lima mai i Tulafono e Sefulu, e faatatau i le fasioti tagata, mulilua, gaoi, molimau pepelo ma le āva i mātua. Ona ia taʻua lea o se isi poloaʻiga e sili ona tāua: “Ia e alofa atu i lou tuaoi e pei o oe lava iā te oe.”—Mataio 19:17-19.

Ua tali atu le tauleʻaleʻa: “Ua ou tausia na mea uma; o le ā se isi mea ou te leʻi faia?” (Mataio 19:20) Atonu e manatu o ia e iai ni galuega mataʻina e na te lē o faia, lea e mafai ai ona agavaa mo le ola e faavavau. Ua silafia e Iesu le naunau moni o lenei alii talavou, o lea, ʻua ia alofa ai iā te ia.’ (Mareko 10:21) Peitaʻi, o loo feagai lenei alii ma se faafitauli.

Ua pipii le loto o lenei alii talavou i ana ʻoa. O lea ua fetalai atu ai Iesu: “E tasi lava le mea lenā e te lē o faia: Ia e alu e faatau atu au meafaitino ma foaʻi atu i ē matitiva, ona e maua ai lea o ʻoa i le lagi, ona e sau ai lea ma mulimuli mai iā te aʻu.” E mafai e lenei alii talavou ona tufatufa atu ana tupe i tagata matitiva, o ē e lē mafai ona toe totogiina mai na tupe, ma avea o ia ma soo o Iesu. Ua silasila atu nei Iesu ma le faanoanoa iā te ia, a o alu ese ma le tigā o lona loto. O le pipii o le loto o lenei alii talavou i le ʻtele o ana meafaitino,’ ua faatauasoina ai o ia mai i le mauaina o le ʻoa moni. (Mareko 10:21, 22) Ua fetalai atu Iesu: “E matuā faigatā lava mo ē e tele tupe ona ulu atu i le malo o le Atua!”—Luka 18:24.

Ua faateʻia le ʻausoo i na upu faapea le isi fetalaiga lenei a Iesu: “E moni, e sili atu ona faigofie ona sao se kamela i le pū o le nila, nai lo o le sao atu o se tagata mauʻoa i le malo o le Atua.” O lea, ua fesili atu ai le ʻausoo: “O ai moni la e mafai ona faaolaina?” Pe e mafai moni e se tagata ona maua le faaolataga? Ua silasila totoʻa atu Iesu iā i latou ma faapea atu: “O mea e lē mafaia e tagata, e mafaia ia e le Atua.”—Luka 18:25-27.

Ua faailoa atu nei e Peteru le eseesega o la latou filifiliga mai i le filifiliga a le alii talavou: “Faauta! Ua matou tuua mea uma ae mulimuli atu iā te oe; o le ā la se mea e matou te maua?” Ua faamatala e Iesu le iʻuga e oo i ai ona o le saʻo o la latou filifiliga: “Pe a tiʻetiʻe le Atalii o le tagata i lona nofoālii mamalu i le taimi e toe faafouina ai mea uma, tou te tiʻetiʻe ai foʻi o outou o ē na mulimuli mai iā te aʻu i nofoālii e sefulu lua, ma faamasino atu i ituaiga e sefulu lua o Isaraelu.”—Mataio 19:27, 28.

E manino mai la, o loo faasino atu Iesu i le lumanaʻi, pe a toe faafouina le tulaga o mea i le lalolagi e pei ona sa iai i le faatoʻaga o Etena. O le a tauia Peteru ma isi soo i le pule faatasi mai ma Iesu i le lalolagi Parataiso. E mautinoa o se taui e sili ona tāua, ma ua alagatatau ai so o se faataulaga ua latou faia.

Ae e lē na o le lumanaʻi o le a maua ai faamanuiaga. O loo tofo foʻi soo o Iesu i nisi o faamanuiaga i le taimi lava lea. Ua fetalai mai Iesu: “O sē e tuua le fale, le avā, po o uso, po o mātua, po o le fanau, ona o le malo o le Atua, e maua e ia le tele o mea i le taimi nei, ma le ola e faavavau i le lumanaʻi.”—Luka 18:29, 30.

Po o fea lava e iai soo o Iesu, e mafai ona latou olioli i se ʻauuso o tagata tapuaʻi e sili ona māfana ma tautele, nai lo o faiā faaleaiga. Ae pagā lea, e foliga mai e lē maua e le alii pule mauʻoa lenā faamanuiaga, aemaise le taui o le ola i le Malo o le Atua i le lagi.

Ua toe fetalai atu Iesu: “Ae o le toʻatele o ē e muamua e avea ma ē e mulimuli, ma o ē e mulimuli e avea ma ē e muamua.” (Mataio 19:30) O le ā le uiga o ana upu?

Talu ai e aofia le alii pule mauʻoa i taʻitaʻi Iutaia, o lea la e aofia ai o ia i “ē e muamua.” O lona tausisia o poloaʻiga a le Atua, e foliga mai ai o le a taulau manuia lona olaga i le lumanaʻi, ma atonu e tele mea e faatalitalia o le a ia faia. Peitaʻi, ua ia faamuamua i lona olaga ana ʻoa ma ana meafaitino. I se faaeseesega, ua iloa e tagata lautele e maua le upu moni ma le ala e taʻitaʻia atu ai i le ola, i aʻoaʻoga a Iesu. Sa avea la tagata lautele ma “ē e mulimuli,” a o lea ua avea nei i latou ma “ē e muamua.” E latou te tulimataʻia le taimi o le a avea ai i latou ma tupu faatasi ma Iesu, ma pule mai i le lalolagi Parataiso.