Tingki di Perea, didok Jesus do “torop do na parjolo gabe na parpudi jala na parpudi gabe na parjolo”. (Mateus 19:30) Laho paboahon taringot i, dipatorang Jesus ma sada tudosan taringot tu parkarejo di ladang anggur:

“Tudos do Harajaon banua ginjang i tu sahalak nampuna porlak anggur. Sogot dope ari, borhat ma ibana mangalului halak laho mangula tu porlak anggurna. Dung dos pangkataionna dohot angka pangula i taringot tu upa sadari i ma sadinar, disuru ma nasida tu porlak anggurna. Hira-hira jam sia manogot, laho ma ibana muse tu pasar. Diida ma disi halak na asing, na so karejo jala na sai jongjong. Didok ma tu nasida, ‘Dohot ma hamu karejo tu porlak anggurhu, hulehon pe gaji na patut tu hamu.’ Jadi, borhat ma nasida. Dung i, songon i ma muse dibahen hira-hira jam 12 arian dohot jam tolu botari. Jala laho ma ibana muse hira-hira jam lima botari, jumpangna ma halak na asing na jongjong sambing. Gabe didok ibana ma tu nasida, ‘Boasa sai jongjong hamu dison jala ndang karejo sadari on?’ Dialusi nasida ma, ‘Ndang adong na manjou hami.’ Didok ibana ma tu nasida, ‘Molo songon i, dohot ma hamu laho tu porlak anggurhu.’”​—Mateus 20:1-7.

Tingki didok Jesus “Harajaon banua ginjang” dohot sahalak “nampuna porlak anggur”, diboto angka na mambege i do Jahowa na nidokna. Di piga-piga ayat, dipatudos do Jahowa songon nampuna porlak anggur. Porlak anggur na nidokna i ma bangso Israel. (Psalmen 80:10, 11; Jesaya 5:3, 4) Angka halak na mangihuthon parjanjian Patik dipatudos songon parkarejo ni porlak anggur. Alai ndang taringot tu halak Israel na mangolu di tingki naung salpu maksud ni Jesus, taringot tu na masa di tingki i do.

Di tudosan i, adong do parkarejo naung karejo sadari jala naeng mandapot upa sadinar. On ma na manggombarhon angka pamimpin agama. Ai didok nasida do naung loja nasida karejo tu Debata.

Didok angka pamimpin agama i ma umringgas nasida mangulahon lomo ni roha ni Debata sian na asing. Di tudosan ni Jesus, halak na karejo sian jam 9 manogot, jam 12 arian, jam 3 botari, dohot jam 5 botari manggombarhon halak Jahudi na asing.

“Diburai” halak Parise do angka halak na mangihuthon Jesus. (Johannes 7:49) Godangan sian nasida ndang parkarejo na sangap, umpamana sijala dengke. Alai dung taon 29 M, disuru “nampuna porlak anggur” ma Jesus asa ditogihon angka halak sisongon i gabe parkarejo ni Debata. Nasida ma na dipatudos songon parkarejo na karejo mulai jam 5 botari.

Dung i, didok Jesus ma muse, “Dung holom ari, didok nampuna porlak anggur i ma tu mandurna, ‘Jou ma angka pangula i jala garar ma gaji ni nasida, mulai sian na masuk parpudi sahat tu na masuk parjolo.’ Dung i ro ma halak na masuk jam lima botari, ganup ma nasida manjalo sadinar. Jadi tingki ro angka halak na parjolo masuk i, dirimpu ma gumodang jaloon ni nasida, alai tu nasida pe sadinar do dilehon. Tingki dijalo i, marungut-ungut ma nasida tu nampuna porlak i. Ninna ma, ‘Halak na parpudi masuk i holan sajom do karejo, hape hami karejo sadari didadang las ni ari, alai dos dilehon ho upanami!’ Alai ninna ma tu sahalak sian nasida, ‘Dongan, ndang adong na sala hubahen tu ho. Nda naung dos hian pangkataionta  taringot tu na sadinar i? Jalo ma na di ho jala laho ma. Ai naeng lehononku do tu na parpudi i upa songon na tu ho. Ai nda lomongku do mamangke hepengku? Manang na gabe mangiburu do roham ala burju ahu?’ Songon i ma dalanna, na parpudi hian gabe parjolo jala na parjolo gabe parpudi.”​—Mateus 20:8-16.

Ndang diantusi angka sisean hata ni Jesus i. Boasa gabe “na parpudi” angka pamimpin agama Jahudi, hape didok nasida do “na parjolo” nasida? Jala boasa didok Jesus gabe “na parjolo” angka siseanna i?

Didok halak Parise do “na parpudi” angka sisean ni Jesus. Alai gabe “na parjolo” do nasida jala mandapot upa. Dung mate Jesus, ndang dijangkon Debata be halak Israel, gariada dipillit ma sada bangso na baru i ma “Israel ni Debata”. (Galatia 6:16; Mateus 23:38) Songon na didok si Johannes Pandidi, marhite tondi parbadia do tardidi bangso na baru on. Nasida ma gabe “na parjolo” manjalo pandidion i, jala manjalo hasangapon laho mamaritahon taringot tu Jesus “sahat tu ujung ni tano on”. (Ulaon ni Apostel 1:5, 8; Mateus 3:11) Dung dipaboa Jesus tudosan i, diboto angka sisean ma na laho dihasogohon pamimpin agama nasida. Ai gabe “na parpudi” ma angka pamimpin agama i.