Yezu me katuka kuzabisa bawi na yandi na Perea nde “bantu mingi yina kele bantu ya ntete ta vanda bantu ya nsuka mpi bantu ya nsuka ta vanda bantu ya ntete.” (Matayo 19:30) Sambu na kubenda dikebi na diambu yai, yandi me pesa bo mbandu ya bantu yina ke sala na kilanga ya vinu; yandi me tuba nde:

“Kimfumu ya zulu kele bonso muntu mosi ya kele ti kilanga ya vinu yina basikaka na suka-suka sambu na kubaka bantu ya kisalu sambu bo sala na kilanga na yandi. Ntangu yandi manisaka kuwakana ti bantu ya kisalu nde yandi ta futa bo denari mosi na kilumbu mosi, yandi tindaka bo na kilanga na yandi ya vinu. Ntangu yandi basikaka diaka pene-pene ya ngunga ya tatu, yandi monaka bantu ya nkaka me telama na zandu kukonda kisalu; mpi yandi tubilaka bo nde, ‘Beno mpi, beno kwenda na kilanga ya vinu, mpi mono ta pesa beno konso kima yina me fwana.’ Ebuna bo kwendaka. Yandi basikaka diaka pene-pene ya ngunga ya sambanu mpi ya uvwa, ebuna yandi salaka mutindu mosi. Nsuka-nsuka, pene-pene ya ngunga ya 11, yandi basikaka mpi kutaka bankaka me telama, mpi yandi tubilaka bo nde, ‘Sambu na nki beno me telama awa kilumbu ya mvimba kukonda kisalu?’ Bo vutulaka nde, ‘Sambu muntu mosi ve me baka beto na kisalu.’ Yandi tubilaka bo nde, ‘Beno mpi, beno kwenda na kilanga ya vinu.’”—Matayo 20:1-7.

Ntangu Yezu me tubila “Kimfumu ya zulu” mpi “muntu mosi ya kele ti kilanga,” ziku bawi na yandi me yindula nde yandi ke tubila Yehowa Nzambi. Masonuku ke tubaka nde Yehowa kele munkwa-kilanga ya vinu mpi kilanga yina ya vinu ke monisa dikanda ya Izraele. (Nkunga 80:8, 9; Yezaya 5:3, 4) Bantu yina kele na kati ya kuwakana ya Nsiku me fwanana ti bantu yina ke sala na kilanga ya vinu. Kansi, Yezu ke tubila ve mambu yina me lutaka ntama. Yandi ke tubila diambu yina ke salama na bilumbu na yandi.

Bonso Bafarize yina me katuka kumeka Yezu na yina me tala kufwa makwela, bamfumu ya mabundu ke tubaka nde bo ke sadilaka Nzambi kisalu ya ngolo ntangu yonso. Bo me fwanana ti bantu ya kisalu yina me sala kilumbu ya mvimba mpi ke vingila nde bo futa bo mbongo yina me fwana sambu na kisalu na bo, disongidila denari mosi sambu na kilumbu mosi.

Banganga-nzambi mpi bamfumu ya nkaka ya mabundu ke monaka nde Bayuda ya kukonda mfunu ke sadilaka ve Nzambi kisalu ya ngolo, bo kele bonso bantu yina salaka ve kilumbu ya mvimba na kilanga ya vinu ya Nzambi. Na mbandu ya Yezu, Bayuda yango kele bonso bantu yina mfumu bakaka na kisalu na “ngunga ya tatu” (9:00) to na nima ya midi disongidila na ngunga ya sambanu, ya uvwa, mpi nsuka-nsuka na ngunga ya kumi na mosi (17:00).

Bo ke monaka babakala ti bankento yina ke landa Yezu bonso “bantu ya bo me singaka.” (Yoane 7:49) Mingi na kati ya bantu yai kele balobi-mbisi to bantu ya ke salaka bisalu ya maboko. Ebuna, na nsungi ya mvula ya mvu 29 ya ntangu na beto, “munkwa-kilanga ya vinu” tindaka Yezu na kubinga bantu ya kudikulumusa sambu bo sadila Nzambi bonso balongoki ya Kristu. Bo kele “bantu ya nsuka” yina Yezu me tubila, bantu yina mfumu bakaka na ngunga ya 11 sambu na kusala na kilanga na yandi ya vinu.

Na nsuka, Yezu me tubila mambu yina me salama na nsuka ya kisalu kilumbu yina: “Ntangu nkokila bwaka, munkwa-kilanga ya vinu tubilaka kapita na yandi nde, ‘Binga bantu ya kisalu mpi pesa bo lufutu na bo, yantika na bantu ya nsuka mpi sukisa na bantu ya ntete.’ Ntangu bantu yina yantikaka kisalu na ngunga ya 11 kwisaka, konso muntu bakaka denari mosi. Ebuna ntangu bantu ya ntete kwisaka, bo yindulaka nde bo ta baka mbongo mingi, kansi bo futaka bo mpi kaka denari mosi. Ntangu bo bakaka yo, bo yantikaka kubokutila munkwa-bilanga nde, ‘Bantu yai ya nsuka me sala kaka ngunga mosi; kansi nge me futa bo kiteso mosi ti beto bantu me sala kilumbu ya mvimba na nsi ya ntangu ya ngolo!’ Kansi yandi vutudilaka mosi na kati na bo nde, ‘Mpangi, mono me sala nge mbi ve. Beto wakanaka nde mono ta futa nge denari mosi, mpidina ve? Baka lufutu na nge mpi kwenda. Mono ke zola kupesa muntu yai ya nsuka lufutu kiteso mosi ti nge. Keti mono kele ve ti nswa ya kusadila bima na mono mutindu mono me zola? To keti disu na  nge ke lula sambu mono kele mbote?’ Na mutindu yai, bantu ya nsuka ta vanda bantu ya ntete, mpi bantu ya ntete ta vanda bantu ya nsuka.”—Matayo 20:8-16.

Ziku, balongoki ke kudiyula sambu na mambu yai ya Yezu me tuba na kitini ya nsuka ya mbandu na yandi. Inki mutindu bamfumu ya dibundu ya Bayuda yina vandaka kumona nde bo kele “bantu ya ntete” ta kuma “bantu ya nsuka”? Mpi, inki mutindu balongoki ya Yezu ta kuma “bantu ya ntete”?

Balongoki ya Yezu, yina Bafarize ti bantu ya nkaka vandaka kumona bonso “bantu ya nsuka,” ta vanda na ndonga ya bantu yina ta kuma “bantu ya ntete” sambu na kubaka lufutu ya mvimba ya kisalu na bo. Ntangu Yezu ta fwa, Nzambi ta buya Yeruzalemi ya ntoto mpi yandi ta pona dikanda ya mpa, “Izraele ya Nzambi.” (Bagalatia 6:16; Matayo 23:38) Yoane Mbotiki tubilaka bantu ya dikanda yai ya mpa ntangu yandi tubaka nde na bilumbu ke kwisa bantu ta baka mbotika ya mpeve santu. Bantu yina vandaka “bantu ya nsuka” ta kuma bantu ya ntete yina ta baka mbotika yina mpi dibaku ya kuvanda bambangi ya Yezu “tii na kisika ya kuluta ntama ya ntoto.” (Bisalu 1:5, 8; Matayo 3:11) Mutindu balongoki ke bakisa nsoba ya nene yina Yezu ke tubila, bo lenda mona na ntwala mutindu bamfumu ya mabundu yina ta kuma “bantu ya nsuka” ta wila bo makasi.