Muna nzil’a Pereia, Yesu olongele vo “ayingi bavita besukinina, ana basukinina bevita.” (Matai 19:30) Una kavovele e mvovo miami, otele kingana kia asadi muna mpatu a vinyu, oku vo:

“Kintinu kia zulu kina nze mfumu a nzo, ona ovaikidi mu mene-mene, wele vavi asadi benda sadila muna mpatu andi a vinyu. Vava kawizanene ye asadi vo denali imosi kekubafuta muna lumbu, ubatumini muna mpatu andi a vinyu. Ovaikidi diaka muna tezo kia ola yetatu, omwene ankaka bakondelo e salu, batelamene vana zandu, ubavovese vo, ‘Oyeno mpe, nwenda sala muna mpatu a vinyu, ikunufuta konso kina kinufwene.’ Bele kuna mpatu. Ovaikidi diaka muna tezo kia ola yasambanu ye ina yevua, ovangidi diau dimosi. I bosi, muna tezo kia ola ya 11, ovaikidi, omwene ankaka batelamene, ubayuvuidi vo, ‘Ekuma nutelamene ovava mwini amvimba yeno ke nukadi ye salu?’ Bavutwidi vo, ‘Kadi ke vena muntu ko utubakidi mu salu.’ Ubavovese vo, ‘Oyeno mpe nwenda sala muna mpatu a vinyu.’”—Matai 20:1-7.

Nanga o Yesu vava kavovele “Kintinu kia zulu” ye “mfumu a nzo,” o wantu babenze vo Yave wa Nzambi kavovele. Muna Sono, Yave oyikilwanga nze mfumu a mpatu a vinyu. E mpatu a vinyu, zula kia Isaele isunzulanga. (Nkunga 80:8, 9; Yesaya 5:3, 4) Awana bena muna kangu dia Nsiku, betezaneswanga ye asadi muna mpatu a vinyu. Kansi tu, o Yesu kavovele mambu ma nz’ankulu ko. Mambu mevangamanga omu tandu kiandi i kavovele.

Tulenda vova vo, e mfumu za mabundu salu kia Nzambi besalanga, musungula Afarisi ana bavavidi tonta Yesu muna diambu dia vonda longo. Bena nze wantu basadidi lumbu kiamvimba, owau mfutu au bevingilanga. Denali imosi befutwa.

Anganga yo wantu ankaka beyindulanga vo Ayuda ana bevezuanga, ke basadilanga Nzambi una ufwene ko. Bena nze asadi basadidi ndambu a lumbu muna mpatu a vinyu ya Nzambi. Muna kingana kia Yesu, o wantu awaya i yau bayantika sala mu “tezo kia ola ya tatu” (9:00 mu mene) yovo kuna mfoko a lumbu, muna ola ya sambanu, ya nana ye ola ya kumi ye mosi (5:00 mu masika).

Akala ye akento belandanga Yesu, bebadikilwanga nze ‘wantu basibwa.’ (Yoane 7:49) Kadi oyau abaki a mbizi za maza ye avati a nsengo muna zingu kiau kiawonso. Kansi, kuna mfoko a mvu wa 29 wa tandu kieto, “mfumu a mpatu a vinyu” otumini Yesu kababokela beza sadila Nzambi yo kituka se alongoki a Kristu. O Yesu i yau kayikidi vo “basukinini,” ana bezidi sala mu mpatu a vinyu muna ola ya kumi ye mosi.

Muna fokola e kingana kiandi, Yesu osasidi dina diavangama kuna mfoko a lumbu, ovovele vo: “Muna nkokela, o mfumu a mpatu a vinyu ovovese selo kiandi vo, ‘Bokela asadi, wabafuta, yantikila muna awana basukinini yo fokolwela muna awana bavitidi.’ Vezidi awana bayantikidi e salu muna ola ya 11, konso muntu otambwidi denali imosi. Ana bavitidi vava bezidi, bayindwidi vo nzimbu zayingi befutwa, kansi oyau mpe batambwidi denali imosi. Una batambwidi yo, bayantikidi yidimina mfumu a nzo, oku vo, ‘Awaya basukinini ola mosi kaka basadidi; kansi batambwidi mfutu wau mosi yo yeto tufuntukidi lumbu kiamvimba ye mwini!’ Mfumu a nzo ovovese mosi muna yau, oku vo, ‘E nkwame, kivangidi diambi ko. Ke denali imosi ko tuwizanene? Tambula o mfutu aku, wenda kwaku. Nzolele vana kwa ndiona osukinini mfutu wau mosi yo ngeye. Ke diansongi ko kwa mono yavanga konso dina nzolele muna nzimbu zame? Yovo disu dia kimpala una diau wau ibavangidi edi diambote?’ Dianu vo, ana besukinina bevita, ana bevita besukinina.”—Matai 20:8-16.

Nanga alongoki mu kukiyuvula bena kana aweyi uvangamena e diambu diansuka o Yesu kayikidi muna kingana kiaki. Aweyi e mfumu za mabundu ma Kiyuda, ana bekuyibadikilanga vo yau “bavita,” kansi owau “besukinina”? Aweyi alongoki a Yesu ‘bevitila’?

Alongoki a Yesu, ana bebadikilwanga kwa Afarisi ye kwa wantu akaka vo yau i “basukinina,” owau se “bevita” tambula o mfutu amvimba. E lumbu kina o Yesu kefwa, Nzambi obembola Yerusaleme ya nza, osola zula kiampa, i sia vo, “Isaele ya Nzambi.” (Ngalatia 6:16; Matai 23:38) Yoane wa Mvubi wayika e buka kiaki vava kavovela o vubwa muna mwand’avelela. Awana “basukinina” yau bevita tambula luvubu lwalu yo vewa e lau dia kala se mbangi za Yesu “yakuna nsuk’a nza.” (Mavangu 1:5, 8; Matai 3:11) Avo alongoki a Yesu batomene visa e nsobani zina Yesu kavovele, balenda bakula vo mfumu za mabundu bekubafungila makasi wau “basukinini.”