Yezu udi ufuma ku diambila bantu bavua bamuteleja mu Peleya ne: “Ba bungi badi ba kumpala nebikale ba ndekelu, ne ba ndekelu nebikale ba kumpala.” (Matayi 19:30) Udi ushindika bualu ebu ne tshilejilu tshia bena mudimu badi mu budimi bua tumuma tua mvinyo wamba ne:

“Bukalenge bua mu diulu budi bu mfumu wa nzubu uvua mupatuke pa dinda bua kuangata bena mudimu bua budimi buende bua tumuma tua mvinyo. Yeye mumane kumvuangana ne bena mudimu bua kubafuta ndenaliyo umue ku dituku, wakabatuma mu budimi buende bua tumuma tua mvinyo. Wakapatuka kabidi bu pa dîba disatu, yeye kumona bakuabu kabayi ne mudimu wa kuenza, bimane mu tshisalu; wakabambila ne: ‘Nuenu penu ndayi mu budimi bua tumuma tua mvinyo, nennupeshe tshionso tshidi tshiakane.’ Nunku bakaya. Wakapatuka kabidi bu pa dîba disambombo ne pa dîba dia tshitema, kuenzaye bia muomumue. Ndekelu wa bionso, wakapatuka bu pa dîba dia dikumi ne dimue, kusanganaye bakuabu bimane, kubambilaye ne: ‘Nudi bimane muaba eu dituku dijima kanuyi ne mudimu wa kuenza bua tshinyi?’ Bakandamuna ne: ‘Bualu muntu ki mmutuangate ku mudimu to.’ Yeye wakabambila ne: ‘Nuenu penu ndayi mu budimi buanyi bua tumuma tua mvinyo.’”​—Matayi 20:1-7.

Bantu bavua bateleja Yezu bakela meji pamuapa bua Yehowa Nzambi pavuabu bumvue bakula bua “Bukalenge bua mu diulu” ne bua “mfumu wa nzubu.” Bible udi uleja Yehowa bu muena budimi bua tumuma tua mvinyo, budi buleja tshisamba tshia Isalele. (Misambu 80:8, 9; Yeshaya 5:3, 4) Badi bafuanyikija bantu badi mu tshipungidi tshia Mikenji ne bena mudimu ba mu budimi bua tumuma tua mvinyo. Kadi Yezu kena ufila tshilejilu etshi bua kuakula bua malu a kale to. Udi wakula bua nsombelu uvuaku mu tshikondo tshiende.

Bamfumu ba bitendelelu bu mudi Bafalese bavua bafuma ku diteta Yezu bua bualu bua dishipa dibaka, ke badibu bafuanyikija ne bena mudimu badi batungunuka ne kuenza mudimu wa Nzambi. Badi bu bantu badi benza mudimu dituku dijima badi batekemena difutu dijima, dia ndenaliyo umue bua mudimu wa dituku.

Bakuidi ne bantu bakuabu ba mu tshisumbu etshi badi bamona bena Yuda ba tshianana bavua kabayi benzela Nzambi mudimu bikole, bu bena mudimu badi kabayi benza dituku dijima mu budimi bua Nzambi bua tumuma tua mvinyo. Mu tshilejilu tshia Yezu, bantu aba mbantu badibu bangate ku mudimu “pa dîba disatu” (anyi dîba 9 wa dinda) anyi ba ndekelu mu dituku, mmumue ne: pa dîba disambombo, dia tshitema, ne dia dikumi ne dimue (mmumue ne: dîba 5 wa dilolo) ndekelu wa bionso.

Bavua bamona bantu balume ne bakaji bavua balonda Yezu bu ‘bantu bedibue mulawu.’ (Yone 7:49) Mu nsombelu wabu, ba bungi bavua balobi ne bakuabu benza midimu mikole. Nunku pashishe mu tshidimu tshia 29 B.B., “mfumu wa budimi bua tumuma tua mvinyo” wakatuma Yezu bua kubikila bantu bena bupuekele aba bua kuenzela Nzambi mudimu bu bayidi ba Kristo. Bobu ke bantu “ba ndekelu” bavua Yezu muakuile bu bena mudimu ba pa dîba dia dikumi ne dimue.

Yezu mumane kujikija tshilejilu tshiende, wakaleja tshivua tshipitakane ku ndekelu kua mudimu wamba ne: “Pakafika dilolo, mfumu wa budimi bua tumuma tua mvinyo wakambila mutangidi wa bintu biende ne: ‘Bikila bena mudimu, bafuta difutu diabu, utuadija ne ba ndekelu ne ujikija ne ba kumpala.’ Pakalua bena pa dîba dia dikumi ne dimue, bakapeta muntu ne muntu ndenaliyo umue. Nunku, pakalua ba kumpala, bakela meji ne: bavua mua kupeta bia bungi, kadi bakabafuta pabu ndenaliyo umue. Pakamupetabu, bakatuadija kuakula bibi bua mfumu wa nzubu, bamba ne: ‘Bantu ba ndekelu aba mbenze mudimu anu dîba dimue; kadi udi mubavuije diatshimue ne tuetu bavua bambule bujitu bua dituku ne munya mukole!’ Kadi wakandamuna umue wa kudibu ne: ‘Mukuetu, tshiena nkuenzela bualu bubi to. Mvua mumvuangane nebe bua ndenaliyo umue, ki mmuomu anyi? Angata tshidi bu tshiebe, ndaku. Ndi musue kupesha wa ndekelu eu difutu dia muomumue ne diebe. Tshiena ne bukenji bua kuenza tshindi musue ne bintu bianyi anyi? Peshi dîsu diebe didi dialakana bualu ndi muntu muimpe anyi?’ Mu mushindu eu, ba ndekelu nebikale ba kumpala, ne ba kumpala nebikale ba ndekelu.”​—Matayi 20:8-16.

 Bayidi bavua mua kuikala badiebeja bua tshitupa tshia ndekelu tshia tshilejilu tshia Yezu. Mmunyi muikala bamfumu ba bitendelelu bena Yuda bavua badimona “ba kumpala” ne bua kulua “ba ndekelu”? Mmunyi muvua bayidi ba Yezu ne bua kulua “ba kumpala”?

Bayidi ba Yezu, bavua Bafalese ne bantu bakuabu bamona bu “ba ndekelu,” bakavua pa kulua “ba kumpala” bua kupeta difutu dijima. Pavua Yezu ne bua kufua, Nzambi kavua ne bua kuenza kabidi mudimu ne Yelushalema wa pa buloba to, kadi uvua ne bua kusungula tshisamba tshipiatshipia, “Isalele wa Nzambi.” (Galatiya 6:16; Matayi 23:38) Yone Mubatiji wakaleja bantu aba pakakulaye bua dibatijibua ku diambuluisha dia nyuma muimpe divua ne bua kulua kuenzeka. Bantu bavua “ba ndekelu” bavua ne bua kulua ba kumpala bua kupeta batismo au ne kuikala ne diakalenga dia kuikala bantemu ba Yezu “too ne ku miaba ya kule menemene ya pa buloba.” (Bienzedi 1:5, 8; Matayi 3:11) Bu muvua bayidi bumvue bimpe dishintuluka dia mu tshimpitshimpi divua Yezu wakuila, bivua ne bua kubasaka bua kudianjila kumona ntatu minene ivua ne bua kufumina kudi bamfumu ba bitendelelu badi balue “ba ndekelu.”