Jesu wapera kubvunja vapurutani vake ku Pereya kuti “vatungamiri vazinji vanozoita vokupejisira, vokupejisira vanozoita vokutungamira.” (Mateu 19:30) Iyena anozvigogojera ngo kuita muezaniso wo vashandi vo muuvha.

Jesu anoti: “Umambo hwo mugore hwakatojana no muno wo muzi, wakaenda, mambakwaeja, kopsanga vabati vo munda wake. Naazwanana na ivona mutengo wo mare imwe pa njiku, wakavatuma ku munda wake wo muuva. Wakabuda pa ngari yocitatu, wovona vamweni vaigara pa ruvange, vacina co vaiita, wovabvunja kuti: ‘Endanyi imwimwivo ku munda wangu. Ndinozomupa bzinodikana.’ Ivona vakaenda. Wakabudabze pa ngari yocitandhatu no yocipfumbamwe, woitabze bzondhobzo. Wakabudabze pa ngari yo cigumi na imwe, wowana vamweni vaingepo pondhopo, wovabvunja kuti: ‘Munogarirenyi apa zuva rese mucingaiti ciro?’ Ivona vakamupingura kuti: ‘Apana wakatipa basa.’ Yena wakati: ‘Endanyi imwimwivo ku munda wangu.’”—Mateu 20:1-7.

Zvingaita kuti vapurutani va Jesu pavakazwa ngo pamusoro po “Umambo hwo mugore” pomwe no “muno wo muzi,” ivona vakarangarira ndi Jehovha Mwari. Bhaibheri rinofananija Jehovha no muno wo munda wo mu uvha, unoimirira jinja ro vaIziraeri. (Nduyo 80:8, 9; Isaia 5:3, 4) Vari ngo pasi po Mutemo vanoezaniswa no vashandi vo muuvha. Asi Jesu aaripi kuita muezaniso wo zviro izvi zvakaperari kare. Iyena ari kuezanisira zviro zviri kutoitika panguva yondhoyo kamare.

Vatungamiriri vo zviara, vakadari inga vaFarisi vaya vakaejaya Jesu ngo pamusoro po kurambana pa mazuva mashomani apera, vari kuita inga vari kuramba vecishandira Mwari. Ivona vanoita inga vashandi vatakatira vecishanda, wari vari kuvetera kuashira dhenario rimwe. Uwu wainga mutengo wakakwana wo mare yaipocehwa ngo mundhu washanda pa njiku yese.

Kuno vapiri no vamweni vari mu cikwata ici, vanovona vaJudha vakaderera inga vacikanasi kushandira Mwari, zve vanotojaniswa no vashandi vacikapeji nguva zinji maningi mu munda wo muuvha. Mu muezaniso wa Jesu, vandhu ava ndivayani vanonghwiniswa pa basa “pa ngari yocitatu” (nguva 9 jo mangwanani) kana kuti vanononoka kunghwiniswa zvakadari inga vanonghwina pa nguva yo citandhatu, yo cipfumbamwe no yocigumi na imwe (nguva 5 jo madeko).

Vari kutevera Jesu vanovoniwa inga “vandhu . . . vakatukwa.” (Johani 7:49) Mu upenyu hwavo hwese vainga veciita basa ro kubata hove no mabasa amweni akaderera. Asi mu gore ro 29 N.V.Y., “muno wo munda” wo muuvha anotuma Jesu kuti aende kodaninja vandhu vanojidodokesa ava kuti vashandire Mwari inga vajiji va Kristu. Ivona ngo “vokupejisira” vakanangwaya ndi Jesu, vashandi vo nguva yo cigumi na imwe vo mu munda wo muuvha.

Jesu anopejisa muezaniso wake ngo kudurujira zvinoitika pa njiku yo kupejisira yo basa, eciti: “Zuva noravira, muno wo munda wakabvunja muvoneri wo vandhu vake kuti: ‘Danijai vabati uvapocerese, kubva ngo vokupejisira kudanijwa mbhera vokutungamira.’ Novaguma vo pa nguva gumi na imwe, mundhu umwe wakaaxira mare imwe. Novaguma vokutungamira, vairangarira kuti vangazopocera kupinda vokupejisira, kaveta na ivonavo vakapocera mundhu no mundhu mare imwe. Sure ko kuiaxira vain’gun’gutira muno wo munda, veciti: ‘Vokupejisira ava vabata nguva imwe, imwimwi makavaezanisa na itisu, takathwara basa no zia zuva rese.’ Kaveta yena wakapingura ku umwe wavo kuti: ‘Xamwari, andiposi kouri. Atizivi kusungisana no mutengo wo mare imwe? Torai cako, upinde. Ndinoda kupa wokupejisira mutengo wo ndapa iwewe Andikwanisi kuita bzo ndinoda no bziro bzangu? Dangani unoita thima ndini ngokuti ndakarungama.’ Ngokudaro, vokupejisira vanozoita vokutungamira; vokutungamira vanozoita vokupejisira.”—Mateu 20:8-16.

 Kangaije vajiji avazivi kunasa kuzwisisa zvananga Jesu pa kupejisira ko muezaniso wake. Zvinoitisa kudini kuti vatungamiriri vo ciJudha avo vanojiitaya inga “vokutungamira” vave “vokupejisira”? Zve zvinoitisa kudini kuti vajiji va Jesu vave “vokutungamira”?

Vajiji va Jesu vanovoniwaya inga “vokupejisira” ngo vaFarisi no vamweni vanozova “vokutungamira,” Ngo kuti vanozoashira mupfupo wakakwana kamare. Ngo kufa kwa Jesu, Jerusarema ro pasi pano rinozorambhwa, Mwari anozosana jinja rimweni ibza, “Israeli ya Mwari.” (VaGalàsia 6:16; Mateu 23:38) Jinja iri ndirona rainangwaya ndi Johani Mubhabhatiji paakabhuya ngo pamusoro po kubhabhatija ngo mujimu mucena. Vaingaya vari “vokupejisira,” vanozova vo kutanga kuva no rubhabhatijo uhu no kuashira makomborero o kuva zvapupu zva Jesu “mbhera ku magumo o nyika.” (Maitiro o Vapostori 1:5, 8; Mateu 3:11) Pavanozwisisa kucinja uku kunoshamaisa kuri kubhuiwa ndi Jesu, vajiji vanovona kuti vanozoteverehwa maningi ngo vatungamiriri vo zviara, ngo kuti vava “vokupejisira.”